Vanhu Lava Tshembekaka Va Yisa Ku Dzuneka Eka Yehovha
Xiviko Xa Vahuweleri Va Mfumo
Vanhu Lava Tshembekaka Va Yisa Ku Dzuneka Eka Yehovha
EMISAVENI hinkwayo, Timbhoni ta Yehovha—vana ni vatswatsi—ti tiveriwa ku tshembeka ka tona. Xiya swikombiso swo huma eka matiko-nkulu manharhu.
Loko siku rin’wana a huma exikolweni a ya ekaya, Olusola wa malembe ya 17 la tshamaka eNigeria u thumbe xipaci xa mali. U xi yise eka nhloko ya xikolo loyi a hlayeke mali ya kona kutani a kuma yi endla ₦6,200 (kwalomu ka R280). Nhloko ya xikolo yi yise xipaci xa kona eka mudyondzisi loyi a xi lahleke. Mudyondzisi u nkhense Olusola hi ₦1,000 (kwalomu ka R45) kutani a n’wi byela leswaku a hakela xikolofisi ha yona. Loko swichudeni swin’wana swi twa leswi humeleleke, swi mukisane na Olusola swi n’wi hlekula. Endzhaku ka mavhikinyana, xichudeni xin’wana xi vike leswaku xi yiveriwe mali, kutani vadyondzisi va komberiwe ku secha swichudeni hinkwaswo. Mudyondzisi u byele Olusola a ku: “Wena yimela etlhelo. Ndza swi tiva leswaku a wu nge yivi tanihi leswi u nga Mbhoni ya Yehovha.” Mali ya kona yi kumiwe eka vafana vambirhi lava hlekuleke Olusola, kutani va xupuriwe ku vava. Olusola u tsale a ku: “Ndza tsaka swinene leswi ndzi tiviwaka ndzi ri Mbhoni ya Yehovha leyi nga yiviki, kutani sweswo swi yisa ku dzuneka eka Yehovha.”
Loko Marcelo wa le Argentina a huma ekaya siku rin’wana, u thumbe bege endzhakunyana ka yindlu ya yena. U teke bege leyi a tlhelela na yona endlwini kutani a fika a yi pfula hi vukheta a ri ni nsati wakwe. Lexi va hlamariseke, va kume mali yo tala swinene, makhadi yo xava ha wona ni ticheke to hlayanyana leti ana se ti sayiniweke, yin’wana ya tona yi tsariwe timiliyoni timbirhi ta tirhandi. Eka xiphephana xin’wana xo komba nxavo wa nhundzu va kume nomboro ya riqingho. Va bele n’wini wa bege riqingho kutani va twanana leswaku a yi landza laha Marcelo a tirhaka kona. Loko n’wini wa yona a fika, a a vonaka a karhatekile. Muthori wa vatirhi va ndhawu yoleyo u n’wi byele leswaku a nga karhateki hi nchumu, hikuva Marcelo i Mbhoni ya Yehovha. N’wini wa bege u nkhense Marcelo hi mali leyi endlaka 20 wa tipesosi ntsena (kwalomu ka R40). Sweswo swi hlundzukise muthori swinene hikuva a a khumbekile hi ku tshembeka ka Marcelo. Kambe Marcelo u kume ndlela yo hlamusela leswaku tanihi leswi a nga Mbhoni ya Yehovha, u lwela ku tshembeka minkarhi hinkwayo.
Le Kyrgyzstan ku vikiwe ntokoto lowu landzelaka. Xifanyetana xa malembe ya tsevu lexi vuriwaka Rinat, xi thumbe xipaci xa mali xa wansati loyi a va tshama emugangeni wun’we. Xipaci xa kona a xi ri na 1 100 wa tisomi (kwalomu ka R150). Loko Rinat a tlherisela xipaci xexo eka n’wini wa xona, wansati loyi u fike a hlaya mali kutani a byela mana wa Rinat leswaku ku kayivela 200 wa tisomi (kwalomu ka R30). Rinat u vule leswaku yena a nga tekanga ni sente. Kutani hinkwavo va hume va ya lava mali leyi kayivelaka ivi va yi kuma ekusuhi ni laha xipaci xi thumbiweke kona. Wansati loyi u sale a yime tindleve. U nkhense Rinat hileswi a tlheriseke mali leyi lahlekeke, a tlhela a nkhensa mana wa Rinat hileswi a kurisaka n’wana wakwe hi ndlela ya Vukreste.