Xana U Vulavurisana Na Vona Lava U Va Rhandzaka?

“VUSWIKOTI bya hina byo vulavurisana ni lava hi va rhandzaka byi tsana hi ndlela yo hlamarisa,” ku vika phepha-hungu ra vhiki ni vhiki ra le Poland leri nge Polityka. Le United States ku ringanyetiwe leswaku vanghana va vukati va vulavurisana timinete ta tsevu ntsena esikwini hi timhaka ta nkoka. Vatshila van’wana va ehleketa leswaku xivangelo-nkulu xa ku lan’wa ni ku dlaya vukati i ku pfumaleka ka ku vulavurisana.

Ku vuriwa yini hi mbulavurisano exikarhi ka vatswari ni vana? Minkarhi yo tala, “mbulavurisano wu hundzuka swivutiso: A ku ri njhani exikolweni? Va njhani vanghana va wena?,” ku vula xiviko lexi nga laha henhla. Xa vutisa: “Xana vana va hina va ta dyondza njhani ku hlakulela vuxaka lebyinene?”

Leswi vuswikoti byo vulavurisana byi nga tiendlekeliki, xana hi nga byi antswisa njhani? Mudyondzisiwa wa Mukreste, Yakobo, u hi nyika ndzayo ya nkoka: “Munhu un’wana ni un’wana u fanele a hatlisa emhakeni yo twa, a nonoka emhakeni yo vulavula, a nonoka emhakeni ya vukarhi.” (Yakobo 1:19) Ina, leswaku hi va ni mbulavurisano lowu akaka, hi fanele ku yingisela hi vurhon’wana, hi nga kavanyeti kumbe ku hatlisela ku gimeta mhaka yi nga si hela. Papalata ku xopaxopa hikuva sweswo swi nga kavanyeta bulo. Tlhandlakambirhi, Yesu u tirhise swivutiso hi vutlhari, a nga vutiseli ku konanisa kambe a lava ku kumisisa leswi nga embilwini ya muyingiseri wakwe ni ku tiyisa vuxaka bya yena ni muyingiseri.—Swivuriso 20:5; Matewu 16:13-17; 17:24-27.

Hi ku tirhisa misinya ya milawu leyinene leyi nga eBibeleni, teka goza u vulavurisana ni lava u va rhandzaka. Sweswo swi nga aka vuxaka lebyikulu lebyi nga ta tsakeriwa malembe yo tala—hambi ku ri vutomi hinkwabyo.