Hi Nga Langutana Ni Ndzingo Wihi Ni Wihi!
Hi Nga Langutana Ni Ndzingo Wihi Ni Wihi!
XANA u langutane ni ndzingo wo karhi evuton’wini sweswi? Xana u titwa u hele matimba swinene lerova a wu koti ku langutana na wona? Xana minkarhi yin’wana u pfa u chava leswaku xiphiqo xa wena a xi tolovelekanga kutani a xi nge tlhantlheki? Loko swi ri tano, u nga heli mbilu! Bibele ya hi tiyisekisa leswaku Xikwembu xi nga endla hi kota ku tiyisela miringo yihi na yihi leyi hi nga langutanaka na yona.
Bibele ya pfumela leswaku malandza ya Xikwembu ma ta “langutana ni miringo yo hambana-hambana.” (Yakobo 1:2) Xiya rito “hambana-hambana” (Xigriki poi·kiʹlos). Hi ku ya hi ndlela leyi a ri tirhisiwa ha yona eminkarhini ya khale, rito ro sungula ri vula “ku hambana-hambana ko tala” kumbe “mivala yo hambana-hambana” naswona ri kandziyisa “ku hambana-hambana ka miringo.” Entiyisweni, eka ndlela leyi tolovelekeke yo vulavula, rito rero kahle-kahle ri vula “mivala yo hambana-hambana.” Xisweswo, “miringo yo hambana-hambana” i miringo leyi taka hi mivala yo hambana-hambana, hi ndlela yo fanekisela. Nilokoswiritano, Yehovha wa hi seketela leswaku hi kota ku langutana ni ndzingo wun’wana ni wun’wana. Ha yini hi nga tiyisekaka hi mhaka yoleyo?
“Musa Lowu Nga Faneriwiki Wa Xikwembu Lowu Kombisiwaka Hi Tindlela To Hambana-hambana”
Muapostola Petro u hlamusela leswaku Vakreste va “vangeriw[a] gome hi miringo leyi hambaneke.” (1 Petro 1:6) Endzhakunyana epapileni ra yena leri huhuteriweke u vule leswaku “musa lowu nga faneriwiki wa Xikwembu” wu “kombisiw[a] hi tindlela to hambana-hambana.” (1 Petro 4:10) Xiga lexi nge “hi tindlela to hambana-hambana” xi ni xivumbeko xa rito leri fanaka ra Xigriki xo sungula. Loko a vulavula hi xiga lexi, mutivi un’wana wa Bibele u ri: “Leyi i mhaka leyi dzikeke. . . . Ku vulavula hi tintswalo [musa lowu nga faneriwiki] ta Xikwembu tanihi poikilos swi vula leswaku a ku na xiyimo lexi munhu a nga taka a nga swi koti ku xi hlula hi tintswalo ta Xikwembu.” U ye emahlweni a ku: “A ku na swiyimo, minkitsikitsi, swiyimo swa xihatla kumbe swilaveko swa xihatla leswi nga humelelaka, leswi tintswalo ta Xikwembu ti nga taka ti nga swi koti ku swi hlula. A ku na xiyimo xa le vuton’wini lexi tintswalo ta Xikwembu ti nga taka ti nga koti ku langutana na xona. Rito leri ri hlamuseriweke kahle ra poikilos ri hi tsundzuxa kahle tintswalo ta Xikwembu ta mivala yo hambana-hambana leti entiyisweni ti endlaka hi kota ku langutana ni swilo hinkwaswo.”
Musa Wu Hi Pfuna Ku Tiyisela Miringo
Hi ku ya hi Petro, musa lowu nga faneriwiki wa Xikwembu wu tlhela wu kombisiwa hi vanhu vo hambana-hambana lava vumbaka vandlha ra Vukreste. (1 Petro 4:11) Nandza un’wana ni un’wana wa Xikwembu u ni tinyiko kumbe vuswikoti bya moya, lebyi nga vaka xihlovo xa xikhutazo eka lava langutaneke ni miringo. (Varhoma 12:6-8) Hi xikombiso, swirho swin’wana swa vandlha i vadyondzisi va Bibele lava hlamarisaka. Marito ya vona ya vutlhari ma khutaza ma tlhela ma susumetela van’wana ku tiyisela. (Nehemiya 8:1-4, 8, 12) Van’wana va endla maendzo ya vurisi ya nkarhi na nkarhi emakaya ya lava va lavaka nchavelelo. Maendzo yo tano i minkarhi ya ku khutazana, ‘ku chaveleriwa ka timbilu.’ (Vakolosa 2:2) Loko valanguteri va endla maendzo yo tano lama tiyisaka ripfumelo, va nyikela nyiko ya moya. (Yohane 21:16) Ku ni van’wana evandlheni lava tiviwaka hikwalaho ka rirhandzu, ntwela-vusiwana ni vunene bya vona loko va tirhisana ni vapfumeri-kulobye lava hlunamisiweke hi miringo. (Mintirho 4:36; Varhoma 12:10; Vakolosa 3:10) Ntwela-vusiwana ni mpfuno lowu tirhaka leswi kombisiwaka hi vamakwerhu vo tano lava nga ni rirhandzu i xikombiso xa nkoka, kumbe “muvala” wa musa lowu nga faneriwiki wa Xikwembu.—Swivuriso 12:25; 17:17.
“Xikwembu Xa Nchavelelo Hinkwawo”
Yehovha u nyikela nchavelelo lowukulu. I “Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Vakorinto 1:3, 4) Vutlhari lebyi kumekaka eRitweni ra Xikwembu leri huhuteriweke ni matimba lama humaka eka moya lowo kwetsima i tindlela ta nkoka leti Yehovha a hlamulaka swikhongelo swa hina swo lava mpfuno ha tona. (Esaya 30:18, 21; Luka 11:13; Yohane 14:16) Hi nga tiyisiwa nhlana hi xitshembiso lexi huhuteriweke lexi vuriweke hi muapostola Pawulo. U te: “Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.”—1 Vakorinto 10:13.
Ina, ku nga khathariseki “muvala,” kumbe muxaka wa ndzingo wa hina, minkarhi hinkwayo ku ta va ni “muvala,” kumbe xikombiso xa musa lowu nga faneriwiki wa Xikwembu lowu nga ta hi pfuna ku wu hlula. (Yakobo 1:17) Nseketelo wa Yehovha lowu fikaka hi nkarhi wu tlhela wu faneleka, lowu nyikiwaka malandza ya yena—ku nga khathariseki leswaku miringo kumbe mintlhontlho ya vona yi hambane ku fika kwihi—i xikombiso xin’we xa “vutlhari byo hambana-hambana swinene bya Xikwembu.” (Vaefesa 3:10) Xana a wu pfumelelani na swona sweswo?
[Swifaniso leswi nga eka tluka 31]
Yehovha wa hi pfuna leswaku hi tiyisela miringo ya hina