Ku Dzunisa Yehovha eXikolweni

EMISAVENI hinkwayo, Timbhoni ta Yehovha leta ha riki vantshwa ti kuma tindlela ta ku dzunisa Xikwembu exikolweni—hi mavulavulelo ya tona na hi ndlela leyi ti tikhomaka ha yona. Xiya mintokoto yin’wana leyi kombisaka ku hiseka ka tona ka vuntshwa.

Mbhoni leya ha riki muntshwa eGreece a a yi averiwe ku tsala xiviko malunghana ni ku thyakisiwa ka atimosifiya ya misava. Endzhaku ko kambisisa eka Watch Tower Publications Index, yi kume rungula leri pfunaka eka magazini wa Xalamuka! laha loko yi heta xitsalwana xa yona yi tsaleke emakumu leswaku yi xi kume eka wona. Mudyondzisi wa yona u yi byele leswaku a xi ri xin’wana xa switsalwana leswinene ngopfu leswi a nga tshama a swi hlaya. Mudyondzisi loyi endzhakunyana u tirhise rungula leri eka seminara yin’wana, laha ku veke ni vuyelo lebyinene. Hikwalaho makwerhu loyi wa xisati lontsongo u anakanye ku nyika mudyondzisi wa yena minkandziyiso leyi engetelekeke ya Xalamuka!, ku katsa ni lowu nga ni ntlhandlamano wa swihloko leswi nge “Vadyondzisi—I Vanhu Vo Tlangeriwa Swinene!” Endzhakunyana mudyondzisi u bumabumele magazini wa Xalamuka! etlilasini, naswona swichudeni swin’wana swi sungule ku kombela tikopi ta swona. Makwerhu loyi wa xisati a a fanele a ta ni tikopi ta magazini lowu exikolweni leswaku swichudeni swi ta hlaya minkandziyiso yin’wana.

Le Benin, eAfrika, Mukreste la nga le malembeni ya kondlo-a-ndzi-dyi u langutane ni ntshikilelo lowu nga tolovelekangiki. Hi ku ya hi ndhavuko, vatswari va swichudeni swo hlayanyana exikolweni lexi a a nghena eka xona va vulavurisanile kutani va hirha vadyondzisi lava a va ta dyondzisa vana va vona tidyondzo to tika leswaku va ta lunghekela swikambelo. Hambiswiritano, vadyondzisi lava va hlawule ku dyondzisa hi Mugqivela nimixo. Mbhoni leya ha riki muntshwa yi arile yi ku: “Hi Mugqivela nimixo i nkarhi lowu vandlha hinkwaro ri chumayelaka swin’we. I nkarhi lowu ndzi tsakisaka swinene evhikini, naswona a ndzi nge kali ndzi ya endla swin’wana ha wona!” Tata wa yena, loyi a a ri mutswari la nga yexe naswona a nga Mbhoni, u pfumerile kutani a ringeta ku vulavula ni ntlawa wun’wana wa vatswari ni vadyondzisi leswaku va cinca xiyimiso lexi. Kambe, hinkwavo va arile. Xinhwanyatana lexi xi endle xiboho xa ku nga ti kumi tidyondzo leti. Ku ri na sweswo xi ye xi ya chumayela ni vandlha ra ka vona. Vadyondzi-kulobye va xi hlekurile, va xi khongotela leswaku xi tshika ku chumayela ni ku tshika Xikwembu xa xona. A va tiyiseka leswaku xi ta feyila swikambelo. Kambe, ntlawa wolowo wa swichudeni leswi dyondzisiweke wu feyirile, ku pasa makwerhu wa hina. Handle ko kanakana, ku vungunyiwa ku herile. Sweswi swichudeni swi n’wi byela leswi, “U fanele u ya emahlweni u tirhela Xikwembu xa wena.”

Le Riphabliki ra Czechoslovakia, nhwanyana wa malembe ya 12 hi vukhale a a fanele a tsala xiviko lexi vulavulaka hi buku yo karhi. Mana wa yena u n’wi khutaze ku tirhisa buku leyi nge Nghwazi Leyi Tshameke Yi Hanya. U sungule xiviko xa yena hi swivutiso leswi nge: “Xana u anakanya yini? I mani la nga vaka nghwazi leyi tshameke yi hanya?” U hlamusele Yesu, vutomi bya yena bya laha misaveni ni tidyondzo ta yena. Kutani u vulavule hi ndzima leyi nge “Dyondzo Ya Ku Rivalela.” Mudyondzisi wa yena u te: “Xexo i xiviko lexinene ngopfu lexi ndzi tshameke ndzi xi twa eka wena!” kutani a tlhela a swi tsakela ku kuma kopi ya buku yoleyo. Ni swichudeni-kulobye a swi yi lava kopi ya buku leyi. Hi siku leri tlhandlamaka, nhwanyana loyi u tsakele ku fambisa 18 wa tikopi.

Vantshwa volavo va tsaka swinene hi ku dzunisa Yehovha exikolweni. Hinkwerhu ka hina hi fanele hi tekelela ku hiseka ka vantshwa lava.