“U Xaniseriwe Ripfumelo Ra Yena”

EDOROBENI ra Cernobbio en’walungwini wa Italy, ku ni ndhawu ya xitsundzuxo ephakeni ya kwalaho laha ku tsundzukiwaka vanhu lava timfanelo ta vona ti tluriweke. Yin’wana ya tibeji leti pfuriweke loko va tsundzukiwa a ku ri ya Narciso Riet. Riet la tswaleriweke eJarimani hi vatswari lava nga Mantariyana u ve Mbhoni ya Yehovha hi va-1930. Hi nkarhi wa ku fuma ka Hitler, Timbhoni ta Yehovha ti xanisiwile hikwalaho ka leswi ti aleke ku rhangisa Hitler emahlweni ka Xikwembu xa ntiyiso, Yehovha.

Loko Magestapo ma kume leswaku Riet a a tisa tikopi ta Xihondzo xo Rindza etikampeni ta nxaniso, u balekele eCernobbio. Loko a fika kwalaho u komberiwe ku hundzuluxela Xihondzo xo Rindza hi Xintariyana ni ku xi yisa eka vapfumeri-kulobye va le kusuhi. Mintirho ya yena ya ku hiseka a yi tlhaveriwanga hi dyambu. Mutirhela-mfumo wa Munazi ni vavanuna vakwe va hlasele kaya ra Riet, va n’wi khoma, kutani va teka vumbhoni bya ku kombisa leswaku i “xigevenga”—ku nga Tibibele timbirhi ni mapapila ma nga ri mangani! Riet u hlongoleriwe eJarimani, a pfaleriwa ekampeni ya nxaniso ya Dachau, kutani a dlayiwa emahlweninyana ka ku hela ka Nyimpi ya Vumbirhi ya Misava. Beji ya le Cernobbio yi ri, u “xaniseriwe ripfumelo ra yena.”

Ripfumelo ra Narciso Riet ni madzana ya Timbhoni tin’wana leti xanisiweke hi Manazi i xikhutazo eka Vakreste namuntlha leswaku va tshama va tshembekile eka Yehovha, Munhu un’we ntsena evuakweni la faneriwaka hi ku gandzeriwa hi vona. (Nhlavutelo 4:11) Yesu u te: “Va tsaka lava xanisiweke hikwalaho ka ku lulama.” Xikwembu xi ta tsundzuka swiendlo swa vona kutani xi va katekisa hikwalaho ka xivindzi xa vona.—Matewu 5:10; Vaheveru 6:10.