Vatswari, Enerisani Swilaveko Swa Mindyangu Ya N’wina
Vatswari, Enerisani Swilaveko Swa Mindyangu Ya N’wina
“Loko munhu a nga va wundli lava nga va ka vona, . . . u landzule ripfumelo.”—1 TIMOTIYA 5:8.
1, 2. (a) Ha yini swi khutaza ku vona mindyangu yi ya eminhlanganweni ya Vukreste swin’we? (b) Hi yihi mintlhontlho yin’wana leyi mindyangu yi langutanaka na yona leswaku yi ta kota ku fika eminhlanganweni hi nkarhi?
LOKO u rhala-rhala evandlheni ra Vukreste loko minhlangano yi nga si sungula, u nga ha vona vana lava baseke va tlhela va ambala kahle, va tshame eswitulwini etlhelo ka vatswari va vona. Xana a swi tsakisi ku vona rirhandzu leri nga kona emindyangwini yo tano—ku rhandza Yehovha ni ku rhandzana? Kambe, swa olova ku rivala leswaku swi lava matshalatshala lamakulu leswaku ndyangu wu fika eminhlanganweni hi nkarhi.
2 Hakanyingi vatswari va tshama va khomekile siku hinkwaro, naswona hi masiku ya minhlangano va khomeka ni ku tlula mpimo. Va fanele va lunghiselela swakudya, va endla swintirhwana swo karhi va tlhela va heta ni ntirho wa le kaya. Vatswari va rhwele ndzhwalo wo tika swinene, va fanele va tiyiseka leswaku un’wana ni un’wana u basile, u dyile naswona u lunghekile ka ha ri na nkarhi. Ina, eka vana ku nga ha humelela nchumu lowu nga languteriwangiki hi nkarhi lowu nga fanelangiki. N’wana lonkulu u handzula buruku rakwe loko a ri eku tlangeni. Lontsongo wa kona u halata swakudya swa yena. Vana lava va sungula ku holova. (Swivuriso 22:15) Vuyelo byi va byihi? Hambiloko mutswari a kunguhate kahle, swilo swi nga ha endleka swi nga fambi kahle. Kambe, ndyangu lowu minkarhi hinkwayo wu fika hi nkarhi eHolweni ya Mfumo. Swa khutaza hakunene ku wu vona eholweni vhiki na vhiki, lembe na lembe vana va ri karhi va kula leswaku va ta tirhela Yehovha!
3. Hi swi tivisa ku yini leswaku Yehovha u teka mindyangu yi ri ya risima swinene?
3 Hambileswi ntirho wa wena wa ku va mutswari wu tikaka minkarhi yin’wana, wu tlhela wu karharisa, u nga tiyiseka leswaku Yehovha wa ma tlangela swinene matshalatshala ya wena. Yehovha i Musunguri wa lunghiselelo ra ndyangu. Xisweswo Rito ra yena ri vula leswaku ndyangu wun’wana ni wun’wana wu “hum[a] eka” Yehovha—wu kona hikwalaho ka yena. (Vaefesa 3:14, 15) Hikwalaho loko n’wina vatswari mi endla matshalatshala yo hetisisa ntirho wa n’wina wa le ndyangwini hi ndlela leyi faneleke, mi fundzha Hosi Leyikulu ya vuako. (1 Vakorinto 10:31) Xana rero a hi lunghelo lerikulu? Kutani, swa fanela leswaku hi kambisisa xiavelo lexi Yehovha a xi nyikeke vatswari. Exihlokweni lexi, hi ta kambisisa mhaka ya ku wundla ndyangu. A hi kambisiseni tindlela tinharhu leti Xikwembu xi languteleke leswaku vatswari va wu wundla ha tona.
Ku Wundla Hi Swilo Leswi Vonakaka
4. Endyangwini, i malunghiselelo wahi lawa Yehovha a ma endleke leswaku a enerisa swilaveko swa vana?
4 Muapostola Pawulo u tsarile: “Hakunene, loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, u landzule ripfumelo naswona u bihe ngopfu ku tlula munhu la nga riki na ripfumelo.” (1 Timotiya 5:8) Loko Pawulo a vulavula hi “munhu” laha, xana a a anakanya hi mani? A a anakanya hi nhloko ya ndyangu, leyi hi ntolovelo ku nga tatana. Xikwembu xi tlhela xi nyika wansati xiavelo lexi xiximekaka xa ku va mupfuni wa nuna wa yena. (Genesa 2:18) Vavasati va le minkarhini ya Bibele hakanyingi a va pfuna vanuna va vona ku wundla ndyangu. (Swivuriso 31:13, 14, 16) Namuntlha, mindyangu ya mutswari un’we se yi tolovelekile. * Vatswari vo tala va Vakreste lava nga voxe va yi wundla kahle mindyangu ya vona. Ina, i swinene leswaku ndyangu wu va ni vatswari havambirhi, tatana ku ri yena la rhangelaka.
5, 6. (a) Hi yihi mintlhontlho leyi langutanaka ni lava va ringetaka ku wundla mindyangu ya vona hi swilo leswi vonakaka? (b) Vawundli lava nga Vakreste va ta kota ku tiyisela loko va hlayisa langutelo rihi malunghana ni ntirho wa ku tihanyisa?
5 Eka 1 Timotiya 5:8, xana Pawulo a a anakanya hi ku wundla ka muxaka muni? Mongo wu ringanyeta leswaku a a vulavula hi ku kongoma hi swilaveko swa nyama swa ndyangu. Emisaveni ya namuntlha, ku ni swihinga swo tala leswi nhloko ya ndyangu yi nga langutanaka na swona leswaku yi ta kota ku enerisa swilaveko swa ndyangu hi ndlela yoleyo. Swiphiqo swa ikhonomi swi andzile emisaveni hinkwayo, tanihi ku tshikisiwa ntirho, ku pfumaleka ka mintirho lokukulu ni ku durha ka swilo. I yini lexi nga pfunaka muwundli leswaku a tiyisela hambiloko a langutane ni mintlhontlho yo tano?
6 Muwundli u fanele a tsundzuka leswaku u hetisisa xiavelo lexi humaka eka Yehovha. Marito ya Pawulo lama huhuteriweke ma kombisa leswaku wanuna loyi a kotaka ku yingisa xileriso lexi kambe a ala ku xi hetisisa u fanisiwa ni munhu loyi a “landzule[ke] ripfumelo.” Mukreste u ta endla leswi nga ematimbeni ya yena leswaku a papalata ku va ni xiyimo xo tano emahlweni ka Xikwembu xa yena. Kambe, khombo ra kona vanhu vo tala emisaveni namuntlha a va na “xinakulobye xa ntumbuluko.” (2 Timotiya 3:1, 3) Entiyisweni, vatatana vo tala va balekela vutihlamuleri bya vona, va sukela mindyangu ya vona. Vavanuna lava nga Vakreste a va wu endli nsele wo tano, va ri tekela ehansi langutelo ra ku wundla vandyangu va vona. Ku hambana ni vo tala va vatirhi-kulobye, vawundli lava nga Vakreste va teka ni mintirho leyi languteriwaka ehansi tanihi leyi xiximekaka yi tlhela yi va ya nkoka, tanihi leswi yi endlaka va kota ku wundla varhandziwa va vona naswona yi ri ndlela yo tsakisa Yehovha Xikwembu.
7. Ha yini swi fanela leswaku vatswari va anakanyisisa hi xikombiso xa Yesu?
7 Tinhloko ta mindyangu ti nga ha kuma swi pfuna ku anakanyisisa hi xikombiso lexi hetisekeke xa Yesu. Tsundzuka, Bibele yi profetile yi kombetela eka Yesu tanihi “Tatana La Nga Riki Na Makumu” wa hina. (Esaya 9:6, 7) Tanihi “Adamu lowo hetelela,” Yesu u sive “munhu wo sungula Adamu” hi ndlela leyi humelelaka tanihi tatana wa vanhu lava kombisaka ripfumelo. (1 Vakorinto 15:45) Ku hambana na Adamu, loyi a veke tatana la nga ni vutianakanyi, Yesu i tatana lonene. Bibele yi vula leswi malunghana na yena: “Xisweswo rirhandzu se ha ri tiva, hikuva yena u nyikete moya-xiviri wakwe a wu nyiketela hina.” (1 Yohane 3:16) Ina, Yesu u nyikele vutomi byakwe hi ku swi rhandza a byi nyikelela van’wana. Hambiswiritano, siku ni siku a a rhangisa swilaveko swa van’wana eka swa yena ni le timhakeni leti nga nyawuriki. N’wina vatswari mi ta va mi endla kahle loko mi tekelela moya wolowo wo tinyikela.
8, 9. (a) Vatswari va nga dyondza yini eka swinyenyana malunghana ni ndlela leyi swi khathalelaka mavondlo ya swona ha yona handle ka vutianakanyi? (b) Vatswari vo tala lava nga Vakreste va kombisa moya wa ku tinyikela hi ndlela yihi?
8 Vatswari va nga dyondza swo tala malunghana ni rirhandzu leri nga riki na vutianakanyi eka marito lawa Yesu a ma byeleke vanhu va Xikwembu lava a va hambukile: “I ko tala ndzi lava ku hlengeleta vana va wena, hi ndlela leyi mbhaha wu hlengeletaka ha yona swiciwana swa wona ehansi ka timpapa ta wona!” (Matewu 23:37) Laha Yesu u yi hlamusele kahle ndlela leyi mbhaha wu swi sirhelelaka ha yona swiciwana swa wona ehansi ka timpapa ta wona. I ntiyiso, vatswari va nga dyondza swo tala eka ndlela ya ntumbuluko leyi xinyenyana lexi nga ni swiciwana xi ti vekaka ekhombyeni ha yona leswaku xi sirhelela swiciwana swa xona eku vavisiweni. Kambe leswi vatswari va swinyenyana va swi endlaka siku ni siku na swona swa hlamarisa loko u swi vona. Swi tshamela ku haha swi ya lava swakudya. Niloko swi twa leswaku swi karhele, swi hoxa swakudya emilon’wini ya swiciwana swa swona leyi ahlameke, ivi swona swi swi mita, hi ntolovelo swi tlhela swi rilela swin’wana. Swo tala swa swivumbiwa swa Yehovha “hi ntumbuluko swi tlharihile” malunghana ni ndlela leyi swi khathalelaka swilaveko swa vana va swona ha yona.—Swivuriso 30:24.
9 Hi ndlela leyi fanaka, vatswari lava nga Vakreste emisaveni hinkwayo va kombisa moya wo pfumala vutianakanyi lowunene. Swi nga antswa mi vavisiwa ematshan’weni ya leswaku mi pfumelela vana va n’wina va vavisiwa. Ku tlula kwalaho, siku ni siku mi titsona swo karhi leswaku mi kota ku va kumela swo karhi. Vo tala va n’wina mi pfuka wa ha ri mixo mi ya emintirhweni leyi karharisaka ni leyi phirhaka. Mi tirha hi matimba leswaku mindyangu ya n’wina yi kota ku kuma swakudya. Ma tikarhata leswaku mi tiyiseka leswaku vana va n’wina va ni swiambalo leswi baseke, ndhawu yo tshama eka yona leyi fanelekaka ni dyondzo leyi faneleke. Naswona mi hambeta mi tikarhata siku ni siku, lembe ni lembe. Handle ko kanakana ku tikarhata ni ku tiyisela ko tano ku tsakisa Yehovha! (Vaheveru 13:16) Kambe, hi nkarhi lowu fanaka a mi rivali leswaku ku ni tindlela ta nkoka swinene leti mi nga khathalelaka mindyangu ya n’wina ha tona.
Ku Wundla Hi Tlhelo Ra Moya
10, 11. Hi xihi xilaveko xa nkoka swinene evanhwini, naswona vatswari lava nga Vakreste va fanele va rhanga va endla yini leswaku va enerisa xilaveko lexi eka vana va vona?
10 Ku wundla hi tlhelo ra moya i nchumu wa nkoka swinene ku tlula ku wundla hi swilo leswi vonakaka. Yesu u te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:4; 5:3) Xana n’wina vatswari mi nga endla yini leswaku mi wundla mindyangu ya n’wina hi tlhelo ra moya?
11 Emhakeni leyi, kumbexana a ku na ndzimana yin’wana eMatsalweni leyi tshahiwaka swinene ku tlula Deteronoma 6:5-7. Hi kombela u pfula Bibele ya wena kutani u hlaya tindzimana toleto. Xiya leswaku vatswari va rhanga va byeriwa leswaku va kurisa vumoya bya vona, va kurisa ndlela leyi va rhandzaka Yehovha ha yona va tlhela va nghenisa marito ya yena embilwini. Ina, u fanele u va xichudeni lexi tiyimiseleke xa Rito ra Xikwembu, u hlaya Bibele nkarhi na nkarhi u tlhela u anakanyisisa hi yona leswaku u ta kota ku ti twisisa kahle tindlela, misinya ya milawu ni milawu ya Yehovha u tlhela u yi rhandza. Hikwalaho, mbilu ya wena yi ta tala hi mintiyiso leyi tsakisaka ya le Bibeleni leyi nga ta ku susumetela ku tsaka, ku xixima ni ku rhandza Yehovha. U ta va ni swilo swo tala leswinene swo swi dyondzisa vana va wena.—Luka 6:45.
12. Vatswari va nga n’wi tekelela njhani Yesu loko swi ta emhakeni ya ku dyondzisa mintiyiso ya Bibele hi ku phindha-phindha eka vana va vona?
12 Vatswari lava tiyeke hi tlhelo ra moya va tiyimiserile ku tirhisa ndzayo leyi kumekaka eka Deteronoma 6:7, ya ku va ‘dyondzisa hi ku phindha-phindha’ vana va vona marito ya Yehovha nkarhi wun’wana ni wun’wana. Ku ‘dyondzisa hi ku phindha-phindha’ swi vula ku dyondzisa ni ku khorwisa hi ku phindha-phindha. Yehovha u swi tiva kahle leswaku hinkwerhu ka hina—ngopfu-ngopfu vana—leswaku hi dyondza hi fanele hi phindha-phindheriwa. Xisweswo, Yesu evutirhelini bya yena a a phindha-phindha. Hi xikombiso, loko a dyondzisa vadyondzisiwa va yena leswaku va titsongahata ematshan’weni yo tikurisa ni ku phikizana, u kume tindlela to hambana-hambana to phindha-phindha nsinya wolowo wa nawu. U dyondzise hi ku endla leswaku vayingiseri vakwe va anakanyisisa, a endla swifaniso a tlhela a swi kombisa. (Matewu 18:1-4; 20:25-27; Yohane 13:12-15) Kambe, lexi hlamarisaka Yesu a nga si tshama a hela mbilu. Hilaha ku fanaka, vatswari va fanele va kuma tindlela to dyondzisa mintiyiso ya xisekelo eka vana va vona, va phindha-phindha misinya ya milawu ya Yehovha hi ku lehisa mbilu kukondza vana va vona va yi twisisa va tlhela va yi tirhisa.
13, 14. Hi yihi minkarhi yin’wana laha vatswari va nga dyondzisaka vana va vona mintiyiso ya le Bibeleni hi ku phindha-phindha, naswona va nga tirhisa yini?
13 Nkarhi lowunene wo dyondzisa hi ndlela yoleyo hiloko ku fambisiwa dyondzo ya ndyangu. Hakunene, dyondzo ya ndyangu ya Bibele ya nkarhi na nkarhi, leyi akaka ni leyi tsakisaka hi yona nsika ya vumoya bya ndyangu. Mindyangu ya Vukreste emisaveni hinkwayo yi tsakela tidyondzo to tano, yi tirhisa tibuku leti humesiweke hi nhlengeletano ya Yehovha yi tlhela yi endla dyondzo yi pfumelelana ni swilaveko swa vana. Buku leyi nge Dyondza Eka Mudyondzisi Lonkulu i nyiko leyi hlamarisaka emhakeni leyi, ku fana ni buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka. * Hambiswiritano, vana a va fanelanga va dyondzisiwa hi nkarhi wa dyondzo ya ndyangu ntsena.
14 Hilaha Deteronoma 6:7 yi kombisaka hakona, ku ni minkarhi yo tala laha n’wina vatswari mi nga bulaka hi swilo swa moya ni vana va n’wina. Ku nga khathariseki leswaku mi famba swin’we, mi endla mintirho ya le kaya swin’we, kumbe mi le ku wiseni swin’we, mi nga ha kuma minkarhi yo enerisa swilaveko swa moya swa vana va n’wina. Ina, a mi fanelanga mi “chumayela” vana va n’wina hi mintiyiso ya Bibele nkarhi hinkwawo. Ku ri na sweswo, ringetani ku endla mabulo ya le ndyangwini ma va lama akaka, mi vulavula hi swilo swa moya. Hi xikombiso, magazini wa Xalamuka! wu ni swihloko swo tala leswi vulavulaka hi swilo swo hambana-hambana. Swihloko swo tano swi nga ha pfula ndlela yo bula hi swiharhi leswi tumbuluxiweke hi Yehovha, tindhawu leti sasekeke hi ntumbuluko emisaveni hinkwayo ni mindhavuko yo hambana-hambana leyi hlamarisaka ya vanhu ni ndlela leyi va hanyaka ha yona. Mabulo yo tano ma nga susumetela vana ku hlaya leswi engetelekeke hi tibuku leti humesiwaka hi ntlawa wa hlonga ro tshembeka ni ro tlhariha.—Matewu 24:45-47.
15. Vatswari va nga va pfuna njhani vana va vona ku teka vutirheli bya Vukreste byi ri lebyi tsakisaka byi tlhela byi vuyerisa?
15 Ku va ni mabulo lama akaka ni vana va wena swi ta ku pfuna leswaku u enerisa xilaveko xin’wana xa moya. Vana va Vakreste va fanele va dyondza ku byela van’wana hi ta ripfumelo ra vona hi ndlela leyi humelelaka. Loko ma ha vulavula hi mhaka yin’wana leyi tsakisaka eka Xihondzo xo Rindza kumbe Xalamuka! u nga ha lava nkarhi wa ku tirhisa mhaka yoleyo evutirhelini. Hi xikombiso u nga ha vutisa: “Xana a swi nga ta tsakisa loko vanhu vo tala a va yi tiva mhaka leyi malunghana na Yehovha? Xana u ehleketa leswaku hi nga swi endlisa ku yini leswaku munhu un’wana a yi tsakela mhaka leyi?” Mabulo yo tano ma nga pfuna vana leswaku va swi tsakela swinene ku byela van’wana leswi va swi dyondzaka. Kutani loko vana va wena va famba na wena evutirhelini, va ta tivonela hi ya vona loko u ri karhi u vula leswi ku buriweke ha swona. Va nga ha tlhela va dyondza leswaku nsimu i ntirho lowu hlamarisaka wu tlhela wu tsakisa, wu tisa ku eneriseka ni ntsako lowukulu.—Mintirho 20:35.
16. Vana va nga dyondza yini loko va yingisela swikhongelo swa vatswari va vona?
16 Vatswari va tlhela va enerisa swilaveko swa moya swa vana va vona loko va khongela. Yesu u dyondzise vadyondzisiwa va yena ndlela yo khongela a tlhela a khongela ko tala a ri na vona. (Luka 11:1-13) Anakanya leswi va swi dyondzeke hi ku yingisa xikhongelo xa N’wana wa Yehovha hi byakwe! Hilaha ku fanaka, vana va wena va nga dyondza swo tala eka swikhongelo swa wena. Hi xikombiso, va nga ha dyondza leswaku Yehovha u lava leswaku hi vulavula na yena swi huma embilwini hi ntshunxekile, hi n’wi byela nchumu wihi na wihi lowu hi karhataka. Ina, swikhongelo swa wena swi nga pfuna vana va wena ku dyondza ntiyiso wa moya wa nkoka: Va nga swi kota ku va ni vuxaka ni Tata wa vona wa le tilweni.—1 Petro 5:7.
Ku Wundla eMintlhavekweni
17, 18. (a) Bibele yi wu paluxa njhani nkoka wa ku kombisa vana rirhandzu? (b) Vatatana va fanele va n’wi tekelela njhani Yehovha eku kombiseni ka vana va vona rirhandzu?
17 Ina, vana na vona va ni swilaveko swa nkoka swa mintlhaveko. Rito ra Xikwembu ri byela vatswari ndlela leyi swi nga swa nkoka ha yona ku enerisa xilaveko lexi. Hi xikombiso, va xisati lavatsongo va khutaziwa leswaku va “rhandza vana va vona.” Ku endla ka vona tano swi fambisana ni ku va vamanana lava ha riki vatsongo va vuyisiwa emianakanyweni ya vona. (Tito 2:4) Hakunene, i vutlhari ku kombisa n’wana rirhandzu. Leswi swi dyondzisa n’wana ku va ni rirhandzu naswona swi tisa vuyelo lebyi nga heriki. Hi hala tlhelo, i vuphukuphuku ku tsandzeka ku kombisa rirhandzu. Swi vavisa swinene naswona swi kombisa ku tsandzeka ku tekelela Yehovha, loyi a hi kombisaka rirhandzu lerikulu ku nga khathariseki ku nga hetiseki ka hina.—Pisalema 103:8-14.
18 Yehovha hi yena a tekeke goza ku sungula eku rhandzeni ka vana va yena va laha misaveni. Hilaha 1 Yohane 4:19 yi vulaka hakona, ‘hi yena a nga sungula a hi rhandza.’ N’wina vatatana ngopfu-ngopfu mi fanele mi tekelela xikombiso xa Yehovha, mi teka goza ku sungula ro aka vuxaka bya rirhandzu ni vana va n’wina. Bibele yi khutaza vatatana ku papalata ku dyisa vana va vona mbitsi, “leswaku va nga heli mbilu.” (Vakolosa 3:21) Ku ni swilo swo hlayanyana leswi dyisaka vana mbitsi swinene ku tlula mhaka ya leswaku mutswari a nga va rhandzi kumbe a nga va teki va ri va nkoka. Vatatana lava kanakanaka ku kombisa ndlela leyi va titwaka ha yona va fanele va tsundzuka xikombiso xa Yehovha. Yehovha u kale a vulavula a ri etilweni a kombisa leswaku wa n’wi amukela N’wana wa yena a tlhela a n’wi rhandza. (Matewu 3:17; 17:5) Sweswo swi fanele swi n’wi khutaze swinene Yesu! Hilaha ku fanaka, vana va va ni matimba swinene ni xivindzi loko vatswari va vona va vula swi huma embilwini leswaku va va rhandza naswona va va amukela.
19. Ha yini ndzayo yi ri ya nkoka, naswona vatswari lava nga Vakreste va tikarhatela ku ringanisela hi ndlela yihi?
19 Ina, ndlela leyi vatswari va rhandzaka vana va vona ha yona a yi fanelanga yi vuriwa ntsena. Rirhandzu ri kombisiwa swinene hi swiendlo. Ku wundla hi swilo leswi vonakaka ni hi tlhelo ra moya ku nga va xikombiso xa rirhandzu ra vatswari, ngopfu-ngopfu loko vatswari va endla tano hi ndlela leyi kombisaka leswaku nsusumeto lowukulu i rirhandzu. Ku engetela kwalaho, ku tshinya i xikombiso xa nkoka wa rirhandzu ra vatswari. Hakunene, “loyi Yehovha a n’wi rhandzaka wa n’wi tshinya.” (Vaheveru 12:6) Hi hala tlhelo, loko u nga tshinyi u kombisa leswaku u mutswari la nga ni rivengo! (Swivuriso 13:24) Minkarhi hinkwayo Yehovha u ringanisela hi ndlela leyi faneleke, a tshinya “hilaha ku faneleke.” (Yeremiya 46:28) A hi minkarhi hinkwayo swi olovaka leswaku vatswari lava nga hetisekangiki va ringanisela hi ndlela yoleyo. Hambiswiritano, swi fanerile leswaku u tikarhatela ku ringanisela hi ndlela yoleyo. Ndzayo leyi tiyeke ya rirhandzu yi pfuna n’wana leswaku a kula a hanya vutomi lebyi tsakisaka, lebyi vuyerisaka. (Swivuriso 22:6) Xana sweswo a hi leswi mutswari un’wana ni un’wana la nga Mukreste a swi lavelaka n’wana wa yena?
20. Xana vatswari va nga nyika vana va vona nkarhi lowunene ngopfu wo “hlawula vutomi” hi ndlela yihi?
20 Loko n’wina vatswari mi endla ntirho wa nkoka lowu Yehovha a mi aveleke wona—ku enerisa swilaveko swa vana va n’wina swa swilo leswi vonakaka, swa moya ni swa mintlhaveko—vuyelo bya kona byi ta va byikulu. Xisweswo mi nyika vana va n’wina nkarhi lowunene ngopfu wo “hlawula vutomi” kutani va “ya emahlweni [va] hanya.” (Deteronoma 30:19) Vana lava hlawulaka ku tirhela Yehovha kutani va tshama endleleni leyi yisaka evuton’wini loko va ri karhi va wupfa, va tisela vatswari va vona ntsako lowukulu. (Pisalema 127:3-5) Ntsako wo tano wu ta tshama hilaha ku nga heriki! Kambe, xana vantshwa va nga n’wi dzunisa njhani Yehovha sweswi? Xihloko lexi landzelaka xi ta vulavula hi mhaka yoleyo.
[Tinhlamuselo ta le hansi]
^ par. 4 Eka bulo leri, muwundli loyi ku nga ta vulavuriwa ha yena i wanuna. Hambiswiritano, misinya leyi ya milawu ya tirha ni le ka vavasati va Vakreste lava ku nga vona vawundli.
^ par. 13 Yi kandziyisiwe hi Timbhoni ta Yehovha.
A Wu Ta Hlamurisa Ku Yini?
Vatswari va nga endla yini leswaku va wundla vana va vona
• hi swilo leswi vonakaka?
• hi tlhelo ra moya?
• emintlhavekweni?
[Swivutiso Swa Dyondzo]
[Xifaniso lexi nga eka tluka 18]
Swinyenyana swo tala swi tirha hi matimba leswaku swi ta wundla mavondlo ya swona
[Xifaniso lexi nga eka tluka 20]
Vatswari va fanele va rhanga va hlakulela vumoya bya vona vini
[Swifaniso leswi nga eka tluka 20, 21]
Vatswari va nga kuma minkarhi yo tala ya ku dyondzisa vana va vona malunghana ni Muvumbi
[Xifaniso lexi nga eka tluka 22]
Vana va va ni matimba ni xivindzi loko vatswari va vona va va amukela