Swivutiso Swa Vahlayi

Deteronoma 14:21 yi ri: “Mi nga tshuki mi dya ntsumbu wun’wana ni wun’wana.” Xana yi kanetana na Levhitika 11:40, leyi nge: “Loyi a nga ta dya ntsumbu wa xona u ta hlantswa tinguvu takwe, naswona u ta va a nga tenganga ku fikela nimadyambu”?

Tindzimana leti timbirhi a ti kanetani. Ndzimana yo sungula yi kombisa ntsena leswaku nawu wu yirisa ku dya xiharhi lexi tifeleke, kumbexana lexi xi dlayiweke hi swivandzana. (Eksoda 22:31; Levhitika 22:8) Leya vumbirhi yi hlamusela leswi Muisrayele a a fanele a swi endla loko a tlule nawu wolowo, kumbexana hi xihoxo.

Leswaku nchumu wo karhi a wu yirisiwa hi Nawu a swi nga tiyisekisi leswaku nawu wolowo a wu nga ta honisiwa minkarhi yin’wana. Hi xikombiso, a ku ri ni milawu leyi a yi yirisa ku yiva, ku dlaya, ku nyikela vumbhoni bya mavunwa ni swin’wana. Kasi hi hala tlhelo, munhu a a ta xupuriwa hi ndlela yo karhi loko a tlule milawu yoleyo ya Xikwembu. Sweswo a swi endla leswaku milawu yi tirha naswona a swi kombisa ndlela leyi yi nga ya nkoka ha yona.

Munhu loyi a tluleke nawu, a dya xiharhi lexi feke a a ta tshama a nga tenganga emahlweni ka Yehovha naswona a a fanele a landzela swileriso swo karhi leswaku a tibasisa. Loko o hluleka ku tibasisa hi ndlela ya kona, a a fanele a ‘tihlamulela hikwalaho ka xihoxo xa yena.’—Levhitika 17:15, 16.