Va Kombisa Moya Wa Ku Tinyikela

“VANHU va wena va ta tinyikela hi ku tirhandzela.” (Pisalema 110:3) Marito wolawo ma ni nhlamuselo yo hlawuleka eka swichudeni swa 46 swa ntlawa wa vu-118 wa Xikolo xa Bibele xa Giliyadi xa Watchtower. Hi wahi malunghiselelo lawa va ma endleke leswaku va ya exikolweni lexi, lexi letelaka swichudeni ntirho wa vurhumiwa leswaku swi ya khathalela swilaveko swa moya swa vanhu va le matikweni mambe? Mike na Stacie, swirho swa ntlawa wa vu-118, va te: “Xiboho xa hina xo hanya vutomi byo olova xi hi pfune ku papalata ku yengiwa hi swilo swo tala kutani hi rhangisa timhaka ta moya. Hambileswi a hi fuwile, a hi pfumelelanga rifuwo ra hina ri hi susumetela ku honisa tipakani ta moya.” Ku fana na Mike na Stacie, swichudeni leswin’wana eka ntlawa lowu swi kombise moya wa ku tinyikela naswona sweswi swi lunghekele ku va vachumayeri va Mfumo eka matiko-nkulu ya mune.

Hi Mugqivela, March 12, 2005, vanhu va 6 843 va wu yingisele hi ntsako lowukulu nongonoko wa lava thwasaka. Theodore Jaracz, xirho xa Huvo leyi Fumaka ya Timbhoni ta Yehovha, hi yena a a ri mutshama-xitulu. Endzhaku ko amukela vaendzi lava a va huma ematikweni ya 28, u kandziyise ndlela leyi dyondzo ya Bibele yi pfunaka ha yona. Xivulavuri xi tshahe marito ya mudyondzisi wa le Amerika la vuriwaka William Lyon Phelps, xi ku: “Un’wana ni un’wana loyi a nga ni vutivi lebyi dzikeke bya Bibele a nga vuriwa xidyondzeki hakunene.” Hambileswi dyondzo ya misava yi nga pfunaka, dyondzo ya Bibele i ya nkoka swinene. Yi pfuna vanhu ku tiva Xikwembu, leswi yisaka evuton’wini lebyi nga heriki. (Yohane 17:3) Makwerhu Jaracz u bumabumele lava thwasaka hikwalaho ka moya wa vona wa ku tiyimisela ku hlanganyela hi xitalo etsimeni ro dyondzisa vanhu Bibele, leri endliwaka hi mavandlha ya Timbhoni ta Yehovha yo tlula 98 000 emisaveni hinkwayo.

Xikhutazo Lexi Fikeke Hi Nkarhi Eka Lava Thwasaka

Endzhaku ka marito yo pfula ya mutshama-xitulu, William Samuelson u vulavule hi nhloko-mhaka leyi nge, “Ndlela Leyi U Nga Fanaka Ha Yona Ni Murhi Wa Mutlhwari Lowu Vekaka Mihandzu Lowu Nga eNdlwini Ya Xikwembu,” leyi seketeriweke eka Pisalema 52:8. U hlamusele leswaku eBibeleni murhi wa mutlhwari wu fanekisela ku tswala mihandzu, vuxongi ni xindzhuti. (Yeremiya 11:16) Xivulavuri xi fanise swichudeni ni mirhi ya mitlhwari, xi ku: “Yehovha u ta mi teka mi ri lava xongeke ni lava nga ni xindzhuti loko mi tshembeka eku endleni ka ntirho wa n’wina wa ku chumayela timhaka ta Mfumo laha mi nga ta averiwa ku ya endla ntirho wa vurhumiwa kona.” Tanihi leswi murhi wa mutlhwari wu faneleke wu dzima timitsu swinene leswaku wu ya emahlweni wu hanya hi nkarhi wa dyandza, ni swichudeni swi fanele swi ti dzima swinene timitsu ta swona ta moya leswaku swi kota ku chumayela hi ku phikelela ensin’wini yo nonon’hwa, eka vanhu lava kanetaka kumbe loko  swi langutane ni miringo yin’wana eswiavelweni swa swona swa le matikweni mambe.—Matewu 13:21; Vakolosa 2:6, 7.

John E. Barr, un’wana wa swirho swinharhu swa Huvo leyi Fumaka leswi hlanganyeleke eka nongonoko lowu, u vulavule hi nhloko-mhaka leyi nge, “N’wina Mi Munyu Wa Misava.” (Matewu 5:13) U vule leswaku tanihi leswi munyu wa xiviri wu sivelaka swakudya ku bola, ni ntirho wa varhumiwa wo chumayela hi Mfumo wa Xikwembu wu ta ponisa lava yingisaka, wu va sirhelela leswaku va nga onhaki emahanyelweni ni le moyeni. Kutani hi musa lowukulu, Makwerhu Barr u khutaze lava thwasaka leswaku va ‘hanyisana hi ku rhula’ ni van’wana. (Marka 9:50) Xivulavuri xi va tsundzuxe xi ku: “Hlakulelani mihandzu ya moya, naswona mi tiyiseka leswaku mahanyelo ni mavulavulelo ya n’wina i manene minkarhi hinkwayo naswona ma kombisa leswaku mi anakanyela van’wana.”

“U Nga Humi eXikepeni Lexi Nga eMatini Yo Enta” a ku ri nhloko-mhaka leyi tlhuvutsiweke hi Wallace Liverance, un’wana wa vadyondzisi va le Giliyadi. Tanihi leswi xikepe lexi tlutaka ematini yo enta xi nga yaka etlhelweni leri faneleke, kutani ku twisisa “swilo leswi enteke swa Xikwembu”—ntiyiso malunghana ni xikongomelo xa Xikwembu ni ndlela leyi xi nga ta hetisisiwa ha yona—swi nga pfuna munhu ku endla nhluvuko emoyeni. (1 Vakorinto 2:10) Ku tshama ematini ya moya lama nga entangiki hi ku eneriseka hi “swilo swa masungulo swa marito lama hlawulekisiweke ya Xikwembu,” swi kavanyeta nhluvuko wa hina naswona swi nga endla leswaku ‘ripfumelo ra hina ri tshoveka ku fana ni xikepe.’ (Vaheveru 5:12, 13; 1 Timotiya 1:19) Makwerhu Liverance u gimete a ku: “Onge ‘ku enta ka rifuwo ni vutlhari ni vutivi bya Xikwembu’ swi nga mi tiyisa eswiavelweni swa n’wina swa vurhumiwa.”—Varhoma 11:33.

Mark Noumair, un’wana wa vadyondzisi va le Giliyadi, u vulavule hi nhloko-mhaka leyi nge “Xana U Ta Hlayisa Ndzhaka Ya Wena?” Hi malembe yo tlula 60, Xikolo xa Bibele xa Giliyadi xa Watchtower xi ve ni ndhuma leyinene hikwalaho ka ‘nhulu ya vumbhoni’ leyi nyikeriweke hi lava thwaseke exikolweni lexi. (Genesa 31:48) Ndzhaka leyi ya Giliyadi yi hundziseriwe eka swichudeni swa ntlawa wa vu-118. Makwerhu Noumair u khutaze swichudeni leswaku swi tekelela Vatekowa va le nkarhini wa Nehemiya, swi tirhisana hi ku titsongahata ni vandlha leri swi nga ta va swi hlanganyela eka rona, swi tlhela swi tirhisana ni varhumiwa-kulobye. Swi khutaziwe leswaku swi papalata langutelo ra vanhu “lavakulu” lava tikurisaka, lava Nehemiya a vulavuleke ha vona, kutani swi tiyimisela ku tirha hi ku rhula, swi nga lavi ku voniwa hi van’wana.—Nehemiya 3:5.

Mintokoto Ni Mimbulavurisano Leyi Akaka

Nkulumo leyi landzeleke eka nongonoko wolowo a yi ku “Rito Ra Xikwembu Ri Ya Ri Kula.” (Mintirho 6:7) Hi ku kongomisiwa hi Lawrence Bowen, loyi a nga mudyondzisi wa le Giliyadi, swichudeni swi endle minkombiso ya mintokoto leyi swi veke na yona entirhweni wa nsimu loko swi ri exikolweni lexi. Mintokoto ya kona yi kombise leswaku swichudeni swi twarise Rito ra Xikwembu hi ku hiseka, naswona Yehovha u ma katekise swinene matshalatshala ya swona.

Richard Ashe u vulavurisane ni swirho swa ndyangu wa Bethele leswi tirhisanaka swinene ni xikolo lexi. Tinhlamuselo ta swona ti yi kombise kahle ndlela leyi ndyangu wa Bethele wu seketelaka swichudeni swa le Giliyadi ha yona leswaku swi pfuneka swinene exikolweni lexi. Endzhaku, Geoffrey Jackson u vulavurisane ni van’wana lava thwaseke enkarhini lowu hundzeke eGiliyadi. Va kandziyise malunghelo yo tala lama pfulekelaka varhumiwa leswaku va yisa ku dzuneka eka Yehovha. Un’wana wa vona u te: “Vanhu va xiya hinkwaswo leswi u swi endlaka tanihi murhumiwa. Va yingisela, va xiyisisa kutani va tsundzuka.” Hikokwalaho, swichudeni swi khutaziwe ku xalamukela ku veka xikombiso lexinene minkarhi hinkwayo. A swi kanakanisi leswaku xitsundzuxo xexo lexinene xi ta pfuna ni le masikwini lama taka.

Stephen Lett, xirho xa Huvo leyi Fumaka, u nyikele nkulumo yo gimeta, leyi nge “Vanani Vatameri Va ‘Mati Lama Hanyaka.’” (Yohane 7:38) U vule leswaku eka tin’hweti ta ntlhanu leti hundzeke, swichudeni swi pfuneke swinene hi ku nwa mati yo tala eRitweni ra Xikwembu ra ntiyiso. Kambe, xana varhumiwa lavantshwa va ta endla yini hi rungula leri va ri tswongeke? Makwerhu Lett u khutaze lava thwasaka leswaku va hundzisa mati  lawa ya moya handle ka vutianakanyi, leswaku van’wana va kuma “nseledyana wa mati lama pfelelaka ma nyika vutomi lebyi nga heriki.” (Yohane 4:14) Xivulavuri xi ye emahlweni xi ku: “Mi nga rivali ku yisa ku dzuneka loku lavekaka eka Yehovha, ‘xihlovo xa mati lama hanyaka.’ Lehisani mbilu loko mi dyondzisa lava humeke eBabilona Lonkulu la weriweke hi dyandza.” (Yeremiya 2:13) Makwerhu Lett u gimete hi ku khutaza lava thwasaka leswaku va lwela ku tekelela moya ni mutekiwa kutani va hambeta va ku: “‘Tana!’ Mani na mani la khomiweke hi torha a a te; mani na mani la swi navelaka a a nwe mati ya vutomi mahala.”—Nhlavutelo 22:17.

Makwerhu Jaracz u gimete nongonoko hi ku hundzisa marungula lama humaka ematikweni yo hambana-hambana. Endzhaku ku hlayiwe papila ro tlangela hi xirho xa ntlawa lowu thwasaka.

Xana na wena u nga kombisa moya wo tinyiketela ku ya tirha laha ku nga ni xilaveko lexikulu? Loko swi ri tano, tivekele tipakani ta moya, hilaha swichudeni leswi thwasaka swi endleke hakona. Kuma ntsako ni ku eneriseka loku kumiwaka hi munhu loyi a tinyiketelaka ku endla ntirho wa Xikwembu hi ku tirhandzela—kumbexana tanihi murhumiwa etikweni rimbe kumbe tanihi muchumayeri endhawini ya ka n’wina.

[Bokisi leri nga eka tluka 13]

TINHLAYO TA NTLAWA

Nhlayo ya matiko lawa va humaka eka wona: 8

Nhlayo ya matiko lawa va averiweke eka wona: 19

Nhlayo ya swichudeni: 46

Xiringaniso xa malembe: 33,0

Xiringaniso xa malembe entiyisweni: 16,5

Xiringaniso xa malembe evutirhelini bya nkarhi hinkwawo: 12,9

[Xifaniso lexi nga eka tluka 15]

Ntlawa Wa Vu-118 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.