“Yi Herile”

HI LEMBE RA 2002, Timbhoni ta Yehovha ti ve ni ntsombano wa muganga edorobeni ra Mbandaka le n’walungu-vupela-dyambu bya Democratic Republic of Congo. Loko ku humesiwa Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi ririmi ra Xilingala entsombanweni wolowo, lava a va ri kwalaho va tlula-tlule hi ntsako, naswona van’wana va khavaxele mihloti. Endzhakunyana, vanhu va tsutsumele epulatifomo leswaku va ya nyanga Bibele leyintshwa, va huwelela va ku: “Basuki, Basambwe,” leswi vulaka: “Yi herile! Va layekile!”

Ha yini vayingiseri a va tsake swonghasi, naswona a va vula yini hi marito wolawo? Etindhawini tin’wana ta Mbandaka, Timbhoni ta Yehovha a ti nga pfumeleriwi ku kuma Tibibele hi Xilingala. Ha yini? Hikuva tikereke a ti ala ku xavisela Timbhoni ta Yehovha. Kutani Timbhoni a ti boheka ku kombela munhu un’wana leswaku a ya ti xavela. Xisweswo a ti tsake ngopfu hikuva tikereke a ti nga ha ta swi kota ku ti sivela leswaku ti kuma Tibibele.

Vuhundzuluxeri lebyi lebyintshwa a byi nge pfuni ntsena Timbhoni ta Yehovha kambe byi ta pfuna ni vanhu van’wana. Wanuna un’wana loyi a a twa nongonoko eka swipikara swa ntsombano a ri ekaya kakwe u tsalele rhavi ra Timbhoni ta Yehovha a ku: “Ndzi tsake ngopfu hi ku humesiwa ka Bibele. Yi ta hi voningela eka swilo swo tala. A ndzi Mbhoni ya Yehovha, kambe ndzi yi langutele hi mahlo-ngati Bibele leyi ma ha ku yi humesaka.”

Vuhundzuluxeri Bya Misava Leyintshwa Bya Matsalwa Yo Kwetsima sweswi byi kumeka hi tindzimi ta 33, naswona Matsalwa Ya Vukreste Ya Xigriki ma kumeka hi tindzimi ta 19, ku katsa ni ririmi ra Xilingala. Ha yini u nga kombeli un’wana wa Timbhoni ta Yehovha a ku byela leswaku u nga yi kuma njhani kopi leyi yi hundzuluxeriweke hi ndlela leyinene swonghasi?