“A Ti Landzulanga Ripfumelo”

YESU KRESTE u byele vadyondzisiwa va yena a ku: “Ma tsaka n’wina loko vanhu va mi rhukana ni ku mi xanisa ni ku mi hembela hi swilo hinkwaswo swo homboloka hikwalaho ka mina.” (Matewu 5:11) Namuntlha Timbhoni ta Yehovha ta tsaka hikuva hi ku pfumelelana ni dyondzo ni xikombiso xa Kreste, ti hambeta ti ‘nga vi xiphemu xa misava’ naswona a ti hlanganyeli nikatsongo eka tipolitiki, kasi ta tshembeka eka Xikwembu ehansi ka swiyimo swo hambana-hambana.—Yohane 17:14; Matewu 4:8-10.

Malunghana ni ku nga landzuli ripfumelo ka Timbhoni ta Yehovha ta le khale ka Soviet Union, ku katsa ni ta le Estonia, Toomas Paul, mufundhisi wa Lutere tlhelo muhundzuluxeri wa Bibele, u tsarile ebukwini ya yena leyi nge Kirik keset küla (Kereke Leyi Nga eXikarhi Ka Muti): “A hi vangani vanhu lava tweke hi leswi nga humelela matakuxa ya April 1, 1951. A ku hleriwe tsima ra ku hlongola Timbhoni ta Yehovha ni vaseketeri va tona hinkwavo—ku khomiwe vanhu va 279 loko va helerile kutani va hlongoleriwa eSiberia . . . Ti nyikiwe nkarhi wa ku sayina fomo ya ku landzula ripfumelo ra tona leswaku ti nga hlongoriwi kumbe ku khotsiwa. . . . Loko ti hlangane ni lava nga khotsiwa ku sungula, a ti ri vanhu va 353 lava pfaleriweke, ku katsa ni vanhu va 171 ntsena lava a va hlanganyela ni mavandlha ya tona. A ti landzulanga ripfumelo—hambiloko ti ri eSiberia. . . . A swi tati ni xandla swirho swa Kereke [ya Lutere ya le Estonia] leswi a swi ri ni ripfumelo leri fanaka ni ra Timbhoni ta Yehovha.”

Timbhoni ta Yehovha emisaveni hinkwayo ti tshemba leswaku Xikwembu xi ta ti pfuna ti tshama ti tshembekile ni ku xi yingisa hambiloko ti xanisiwa. Ta tsaka ku tiva leswaku hakelo ya ku tshembeka ka tona i yikulu.—Matewu 5:12.