Ndlela Leyi Riendzo Ro Leha Ri Katekisiweke Ha Yona

KU FIKE xiviko xa vavasati vambirhi lava nga vamakwavo xi huma eDemocratic Republic of Congo, lava tekeke riendzo ro leha endhawini leyi hlakatiweke hi nyimpi va ya eNtsombanweni wa Muganga lowu nge “Vangamisa Xikwembu” eLisala. Handle ka swiletelo swa moya ni vanghana va Vakreste lava a va ta hlangana na vona entsombanweni, a va swi langutele hi mahlo-ngati ku vona vayimeri va le rhavini ra Timbhoni ta Yehovha ra le Kinshasa. Hikwalaho ka nyimpi ya xin’wana-manana etikweni leri, se a ku hele malembe yo tala va nga si tshama va vona munhu loyi a humaka erhavini, kutani a va nga lavi ku kayela.

Vamakwavo lavambirhi va suke eBasankusu hi xikwekwetsu va ya eLisala, ku nga riendzo ra tikhilomitara ta kwalomu ka 300, va famba exikarhi ka makhwati emilambyeni yimbirhi. Va hete mavhiki manharhu va ri eriendzweni leri. Leswi havumbirhi bya vona va nga vatirheli va nkarhi hinkwawo, laha un’wana a nga ni malembe manharhu un’wana malembe ya 19 entirhweni lowu, loko va ri eriendzweni ra vona a va khondlanga mavoko, va chumayele mahungu lamanene ya Mfumo. Va hete tiawara ta 110 va ri karhi va chumayela vanhu lava a va hlangana na vona endleleni, va fambisa swiphephana swa 200 ni timagazini ta 30.

Loko va ri enambyeni a va boheka ku hundza hi vuxiya-xiya exikarhi ka timpfuvu ni tingwenya leti nga lo vuya endhawini yoleyo. A va nga ta famba enambyeni nivusiku—a swi nga koteki ku tluta emunyameni! Nakambe va hundze etindhawini to tala leti a ti pfariwe hi masocha lama sechaka.

Hambileswi riendzo leri a ri lehile ni ku karharisa, vamakwavo lava a va tsakile leswi va endleke matshalatshala lawa. Havumbirhi bya vona a va tsake ngopfu hileswi va veke kona entsombanweni wa le Lisala. Timbilu ta vona a ti hisekela ntiyiso, naswona va khutaziwe hi ku va exikarhi ka vamakwerhu va 7 000 lava a va ri kona. Loko ntsombano wu hela, va langutane ni mintlhontlho leyi fanaka loko va tlhelela ekaya, laha va kumeke mindyangu ya vona ya ha hlayisekile.