Swivutiso Swa Vahlayi

Xana rito leri nge “kumbexana” eka Sofaniya 2:3 ri vula leswaku malandza ya Xikwembu a ma fanelanga ma tiyiseka hi ku kuma vutomi lebyi nga heriki?

Tsalwa leri ri ri: “Lavani Yehovha, n’wina hinkwenu lavo rhula va misava, n’wina lava mi hanyeke hi ku landza xiboho xa Yena xa vuavanyisi. Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.” Ha yini ndzimana leyi yi ku, “kumbexana”?

Leswaku hi twisisa ndlela leyi Yehovha a nga ta tirhisana ha yona ni malandza yakwe yo tshembeka eArmagedoni, hi fanele ku tsundzuka leswi Bibele yi swi dyondzisaka malunghana ni leswi Xikwembu xi nga ta swi endlela lava faka nkarhi wa ku avanyisa wu nga si fika. Van’wana va ta pfuxeriwa ku ya hanya hi masiku etilweni tanihi swivumbiwa swa moya, kasi van’wana va ta pfuxeriwa emisaveni va ri ni ntshembo wo hanya hilaha ku nga heriki eParadeyisini. (Yohane 5:28, 29; 1 Vakorinto 15:53, 54) Loko Yehovha a tsundzuka ni ku hakela vanhu lavo tshembeka lava faka Armagedoni yi nga si fika, hakunene u ta endla hilaha ku fanaka eka malandza ya yena lama nga ta va ma ha hanya esikwini ra ku hlundzuka kakwe.

Marito ya muapostola Petro lama huhuteriweke ma khutaza na wona. U tsarile: “[Xikwembu xi hlayise] Nowa, muchumayeri wa leswo lulama, ni van’wana va nkombo loko xi tisa ndhambhi ehenhla ka misava ya vanhu lava nga xiximiki Xikwembu; xi [gweve] miti ya Sodoma na Gomora hi ku yi hundzula yi va nkuma, . . . xi [kutsula] Lota wo lulama, . . . Yehovha wa yi tiva ndlela yo va kutsula endzingweni vanhu lava nga ni ku tinyiketela loku nga ni vukwembu, kambe u vekela vanhu lava nga lulamangiki siku ra vuavanyisi leswaku va ta lovisiwa.” (2 Petro 2:5-9) Hambileswi Yehovha a loviseke lavo homboloka eminkarhini ya khale, u ponise Nowa na Lota eka ndzoviso lowu veke kona, tanihi leswi va n’wi tirheleke hi ku tshembeka. Nakambe Yehovha u ta ponisa vanhu lava n’wi chavaka loko a lovisa lavo homboloka eArmagedoni. “Ntshungu lowukulu” wa vanhu lavo lulama wu ta pona.—Nhlavutelo 7:9, 14.

Kutani swi tikomba rito leri nge “kumbexana,” leri nga eka Sofaniya 2:3, ri nga tirhiseriwi ku kombisa ku nga tiyiseki ko karhi hi vuswikoti bya Xikwembu bya ku hlayisa lava amukelekaka eka xona. Ematshan’weni ya sweswo, ku tumbetiwa ka munhu esikwini ra ku hlundzuka ka Yehovha ku nga vula ku pona ka yena ntsena loko ku ri leswaku wa ha ku sungula ku lava ku lulama ni ku rhula. Ku hlayiseka swi ta titshega hi ku va munhu a hambeta a lava ku rhula ni ku lulama.—Sofaniya 2:3.

[Xifaniso lexi nga eka tluka 31]

“Yehovha wa yi tiva ndlela yo va kutsula endzingweni vanhu lava nga ni ku tinyiketela loku nga ni vukwembu”