Yehovha U Hlaye “Misisi Ya Tinhloko Ta N’wina”
Yehovha U Hlaye “Misisi Ya Tinhloko Ta N’wina”
“Ku hava [xindzingiri] ni xin’we . . . lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo.”—MATEWU 10:29, 30.
1, 2. (a) Ha yini Yobo a titwe a lahliwe hi Xikwembu? (b) Xana marito ya Yobo a ma kombisa leswaku u xandzukele Yehovha? Hlamusela.
“WE XIKWEMBU, ndzi huwelela eka wena kambe a wu hlamuli; loko ndzi yima emahlweni ka wena, wo ndzi languta kunene. U hundzukile la nga ni nsele eka mina, u ndzi ba ku tlula mpimo.” Wanuna la vuleke marito wolawo a a ri eku vavisekeni lokukulu, naswona a swi fanerile leswaku a twa ku vava! A a feriwe hi swifuwo swakwe, vana vakwe va file eka mhangu ya mangatsila, naswona sweswi a a hlaseriwe hi vuvabyi lebyi hetaka matimba. Vito ra wanuna loyi a ku ri Yobo, naswona mhaka yakwe leyi hlomulaka mbilu yi tsaleriwe ku pfuna hina eBibeleni.—Yobo 30:20, 21, Bibele—Mahungu Lamanene.
2 Marito ya Yobo ma nga twala onge se a a xandzukele Xikwembu, kambe a swi tano. Yobo u phofule ntsena leswi a swi huma embilwini yakwe leyi tshovekeke. (Yobo 6:2, 3) A a nga swi tivi leswaku maxangu yakwe a ma vangiwa hi Sathana, kutani u hoxisile a gimeta hileswaku Xikwembu xi n’wi lahlile. Siku rin’wana, Yobo u kale a byela Yehovha a ku: “Hikwalaho ka yini u tumbeta xikandza xa wena u ndzi teka ndzi ri nala wa wena?” *—Yobo 13:24.
3. Loko hi weriwa hi maxangu, i yini leswi nga fikaka emianakanyweni ya hina?
3 Namuntlha vanhu vo tala va Yehovha va dya mbitsi va xeva hi nhlomulo hikwalaho ka tinyimpi, hasahasa leyi vangiwaka hi swa tipolitiki kumbe vanhu vo karhi, timhangu ta ntumbuluko, vudyuhari, vuvabyi, vusweti lebyikulu ni ku yirisiwa hi tihulumendhe. Swi nga endleka na wena u karhatiwa hi nchumu wo karhi. Minkarhi yin’wana u nga ehleketa leswaku Yehovha u ku fularherile. U ma tiva kahle marito ya Yohane 3:16: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe.” Hambiswiritano, loko u vona maxangu ya wena ma nga heli, u nga ha tivutisa: ‘Xana Xikwembu xa ndzi rhandza hakunene? Xana xa swi vona leswaku ndzi le ku xanisekeni? Xana xa khathala hi mina hakunene?’
4. I xiyimo xihi lexi phikelelaka lexi Pawulo a bohekeke ku xi tiyisela, naswona xiyimo xo tano xi nga hi khumba hi tindlela tihi?
4 Xiya leswi humeleleke eka muapostola Pawulo. “Ndzi nghenisiwe mutwa enyameni, ntsumi ya Sathana, leswaku yi tshamela ku ndzi makala,” ku tsala yena, ivi a ya emahlweni a ku: “Ndzi kombele Hosi kanharhu leswaku wu suka eka mina.” Yehovha u yingise swikombelo swa yena. Hambiswiritano, u kombise Pawulo leswaku a a nga ta n’wi lamulela hi ku tirhisa masingita. Ematshan’weni ya sweswo, Pawulo a a fanele a titshega hi matimba ya Xikwembu leswaku a kota ku tiyisela “mutwa enyameni” yakwe. * (2 Vakorinto 12:7-9) Ku fana na Pawulo, swi nga endleka u ri eku kamaneni ni ndzingo lowu phikelelaka. Kumbexana wa tivutisa, ‘Xana leswi swi tikombaka onge Yehovha a nga endlanga nchumu hi ndzingo wa mina swi vula leswaku a nga xi lemuki xiyimo xa mina kumbe a nga khathali hi mina?’ Nhlamulo ya kona i e-e hakunene! Ku khathala ka Yehovha hi nandza un’wana ni un’wana wakwe la tshembekaka swi kandziyisiwe hi leswi Yesu a swi byeleke vaapostola vakwe loko a ha ku va hlawula. A hi voneni ndlela leyi marito yakwe ma nga hi khutazaka ha yona namuntlha.
“Mi Nga Chavi”—Ha Yini?
5, 6. (a) Yesu u va pfune njhani vaapostola leswaku va nga chavi leswi a swi ri emahlweni ka vona? (b) Pawulo u swi kombise njhani leswaku a a tiyiseka leswaku Yehovha wa n’wi khathalela?
5 Vaapostola va kume matimba lamakulu eka Yesu, ku katsa ni “matimba yo hlula mimoya leyi nga basangiki, ku endlela leswaku va yi hlongola ni ku horisa swifo swa mixaka hinkwayo ni vulema bya mixaka hinkwayo.” Kambe, sweswo a swi nga vuli leswaku va ta hanya bya ka byandlana. Ku hambana ni sweswo, Yesu u swi hlamusele hi vuxokoxoko swin’wana swa swilo leswi a swi ta va humelela. Hambiswiritano, u va khutaze a ku: “Mi nga va chavi lava dlayaka miri kambe va nga swi kotiki ku dlaya moya-xiviri; kambe ku ri na sweswo chavani loyi a nga lovisaka moya-xiviri ni miri eGehena.”—Matewu 10:1, 16-22, 28.
6 Leswaku a pfuna vaapostola vakwe ku twisisa leswaku ha yini va nga fanelanga va chava, Yesu u ye emahlweni a nyikela swifaniso swimbirhi. U te: “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: Mi ni risima ku tlula swindzingiri swo tala.” (Matewu 10:29-31) Xiya leswaku Yesu u kombise leswaku ku va ni vurhena loko u langutane ni maxangu swi fambisana ni ku tiyiseka leswaku Yehovha u khathalela munhu ha un’we. Swi le rivaleni leswaku muapostola Pawulo a a ri ni ku tiyiseka koloko. U tsarile a ku: “Loko Xikwembu xi ri xa hina, i mani loyi a nga ta lwa na hina? Lexi hambi ku ri N’wana wa xona xi nga n’wi tsetselelangiki, kambe xi n’wi nyiketeke hikwalaho ka hina hinkwerhu, nakambe, xana a xi nge hi nyiki hi musa swilo leswin’wana hinkwaswo hikwalaho ka yena?” (Varhoma 8:31, 32) Ku nga khathariseki swiphiqo leswi u langutanaka na swona, na wena u nga tiyiseka leswaku Yehovha wa ku khathalela ntsendze loko u tshama u tshembekile eka yena. Sweswo swi ta va erivaleni swinene loko hi kambisisa xitsundzuxo lexi Yesu a xi nyikeke vaapostola vakwe.
Ntikelo Wa Xindzingiri
7, 8. (a) Swindzingiri a swi langutiwa njhani enkarhini wa Yesu? (b) Xi tikomba xi ri xihi xivangelo xa ku va ku tirhisiwe rito leri vulaka swindzingiri leswitsongo eka rito ra Xigriki leri vulaka “swindzingiri” eka Matewu 10:29?
7 Swifaniso swa Yesu swi yi hlamusela kahle ndlela leyi Yehovha a khathalaka ha yona hi nandza un’wana ni un’wana wa Yena. Xo sungula, anakanya hi swindzingiri. Enkarhini wa Yesu, swindzingiri a swi dyiwa, kambe tanihi leswi a swi dya swibyariwa, hakanyingi a swi langutiwa ku fana ni switsotswana. Swindzingiri a swi tele ngopfu swi tlhela swi chipa lerova swimbirhi a swi xaviwa hi 30 wa tisente loko hi tirhisa mali ya manguva lawa. Loko u ri na 60 wa tisente a wu nga kumi swindzingiri swa mune kambe swa ntlhanu—lexin’wana a wu bazeriwa hi xona, onge hiloko xi nga ri nchumu!—Luka 12:6.
8 Nakambe anakanya hi mpimo wa xinyenyana xexo lexi tolovelekeke. Loko xi ringanisiwa ni swinyenyana swin’wana swo tala, xindzingiri i xitsongo swinene hambiloko xi kule xi helela. Kambe rito ra Xigriki leri hundzuluxeriweke ri va “swindzingiri” eka Matewu 10:29, hi ku kongoma ri vula swindzingiri leswitsongo. Swi le rivaleni leswaku Yesu a a lava leswaku vaapostola vakwe va anakanya hi xinyenyana lexi nga tivikaniki. Hilaha buku yin’wana ya tinhlamuselo yi vulaka hakona, “Yesu u tirhise xinyenyana lexitsongo ngopfu, hi ndlela leyi kandziyisaka vutsongo bya xona!”
9. Hi yihi mhaka ya nkoka leyi hlamuseriwaka hi xifaniso xa Yesu xa swindzingiri?
9 Xifaniso xa Yesu xa swindzingiri xi hlamusela mhaka ya nkoka swinene: Swilo leswi vonakaka swi nga nyawuli eka vanhu i swa nkoka eka Yehovha Xikwembu. Yesu u tlhele a kandziyisa mhaka leyi hi ku vula leswaku a ku na xindzingiri lexitsongo lexi nga “waka ehansi” Yehovha a nga xi lemuki. * Dyondzo ya kona yi le rivaleni. Loko Yehovha Xikwembu a lemuka xinyenyana lexitsongo ngopfu ni lexi nga tivikaniki, swi le rivaleni leswaku u khathala swinene hi xiyimo xa munhu loyi a hlawuleke ku n’wi tirhela!
10. Xi vula yini xiga lexi nge: “Misisi ya tinhloko ta n’wina yi hlayiwile hinkwayo”?
10 Ku tlhandlekela eka xifaniso xakwe xa swindzingiri, Yesu u te: “Misisi ya tinhloko ta n’wina yi hlayiwile hinkwayo.” (Matewu 10:30) Nhlamuselo yoleyo yo koma leyi dzikeke yi kandziyisa yinhla ya xifaniso xa Yesu xa swindzingiri. Xiya: Hakanyingi nhloko ya munhu yi ni misisi ya kwalomu ka 100 000. Eka vo tala, misisi ya tifanela, kutani a ku na nsisi lowu lavaka ku nyangisisiwa. Kambe Yehovha Xikwembu u lemuka nsisi wun’wana ni wun’wana naswona wa wu hlaya. Leswi swi nga tano, xana ku ni nchumu wo karhi evuton’wini bya hina lowu Yehovha a nga wu tiviki? Yehovha u twisisa xivumbeko xo hlawuleka xa nandza un’wana ni un’wana wa yena. Phela u “vona leswi mbilu yi nga swona.”—1 Samuwele 16:7.
11. Davhida u ku kombise njhani ku tiyiseka ka yena leswaku Yehovha wa khathala hi yena?
11 Davhida, loyi a voneke mahlomulo yo tala, a a tiyiseka leswaku Yehovha wa n’wi lemuka. U tsale a ku: “Oho Yehovha, u ndzi lavisisile, naswona wa ndzi tiva. Wena u tiva ku tshama ka mina ni ku yima ka mina. U ehleketisise hi miehleketo ya mina u ri ekule.” (Pisalema 139:1, 2) Na wena u nga tiyiseka leswaku Yehovha u ku tiva hi ku kongoma. (Yeremiya 17:10) U nga hatliseli ku tibyela leswaku a wu nchumu lerova Yehovha loyi a vonaka hinkwaswo a nge tikarhati hi wena!
“Chela Mihloti Ya Mina eGuleni Ra Wena Ra Dzovo”
12. Hi swi tivisa ku yini leswaku Yehovha u ku vona kahle ku xaniseka ka vanhu vakwe?
12 Yehovha u tiva nandza un’wana ni un’wana wa yena naswona u lemuka ni maxangu hinkwawo lawa a langutanaka na wona. Hi xikombiso, loko Vaisrayele va ri karhi va tshikileriwa tanihi mahlonga, Yehovha u byele Muxe a ku: “Entiyisweni ndzi vone ku xaniseka ka vanhu va mina lava nga aEgipta, naswona ndzi twe xirilo xa vona hikwalaho ka lava va va sindzisaka ku tirha; hikuva ndza ku tiva swinene ku vava loku va ku twaka.” (Eksoda 3:7) Swa chavelela swinene ku xiya leswaku loko hi ri karhi hi tiyisela miringo, Yehovha wa swi vona leswi humelelaka naswona u twa swirilo swa hina! Ina, a nga ku honisi nikatsongo ku xaniseka ka hina.
13. I yini lexi kombisaka leswaku Yehovha u twela malandza yakwe hakunene?
13 Ndlela leyi Yehovha a khathalaka ha yona hi vanhu lava nga ni vuxaka na yena yi kombisiwa hi ndlela leyi a a titwa ha yona hi Vaisrayele. Hambileswi hakanyingi a va xaniseka hikwalaho ka ku nonon’hwa ka timbilu ta vona, Esaya u tsale malunghana na Yehovha a ku: “Enkarhini wa maxangu ya vona hinkwawo, na yena a a ri emaxangwini.” (Esaya 63:9) Kutani loko u ri nandza wa Yehovha la tshembekaka, tiyiseka leswaku loko u vaviseka, na Yehovha wa vaviseka. Xana sweswo a swi ku tiyisi nhlana loko u langutane ni maxangu kutani u hambeta u endla leswi u nga swi kotaka loko u n’wi tirhela?—1 Petro 5:6, 7.
14. Pisalema 56 yi tsariwe ehansi ka swiyimo swihi?
14 Ku tiyiseka ka Hosi Davhida leswaku Yehovha a a n’wi khathalela ni ku n’wi twela, ku kombisiwa eka Pisalema 56, leyi Davhida a yi tsaleke loko a ri karhi a balekela Hosi Sawulo loyi a a lava ku n’wi dlaya. Davhida u balekele eGati, kambe loko a vona leswaku Vafilista va n’wi vonile, u chavile leswaku va ta n’wi khoma. U tsale a ku: “Swirha swa mina swi tshamela ku ndzi kavatlula siku hinkwaro, hikuva va tele lava lwaka na mina hi ku tikurisa.” Leswi a a ri ekhombyeni, Davhida u titshege hi Yehovha. U te: “Siku hinkwaro va tshamela ku onha timhaka ta mina; miehleketo ya vona hinkwayo yi lwa na mina hi leswo biha.”—Pisalema 56:2, 5.
15. (a) Davhida a a vula yini loko a kombela Yehovha leswaku a chela mihloti yakwe eguleni ra dzovo kumbe ku yi tsala ebukwini? (b) Loko hi langutane ni xiyimo lexi ringaka ripfumelo ra hina, i yini lexi hi nga tiyisekaka ha xona?
15 Kutani, hilaha ku tsariweke hakona eka Pisalema 56:8, Davhida u vule marito lama tsakisaka a ku: “Wena u vike ku va ka mina mubaleki. Chela mihloti ya mina eguleni ra wena ra dzovo. Xana a yi kona ebukwini ya wena?” Vona nhlamuselo leyi khumbaka mbilu swonghasi ya nkhathalelo lowukulu wa Yehovha! Loko hi karhatekile, hi nga huwelela eka Yehovha hi ri karhi hi rila. Hambi ku ri Yesu la hetisekeke u endle tano. (Vaheveru 5:7) Davhida a a tiyiseka leswaku Yehovha wa n’wi vona naswona u ta tsundzuka nhlomulo wa yena, onge hi loko a hlayisa mihloti yakwe eguleni ra dzovo kumbe a yi tsala ebukwini. * Kumbexana u vona onge mihloti ya wena yi nga kihlanyisa gula rero ra dzovo kumbe yi tata matluka yo tala ya buku yo tano. Loko swi ri tano, tiya mbilu. Bibele ya hi tiyisekisa yi ku: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Pisalema 34:18.
Ku Va Nakulobye Lonkulu Wa Xikwembu
16, 17. (a) Hi swi tivisa ku yini leswaku Yehovha a nga swi honisi swiphiqo leswi vanhu vakwe va langutanaka na swona? (b) Yehovha u endle yini leswaku a pfumelela vanhu vakwe va va ni xinakulobye na yena?
16 Ku va Yehovha a hlaye ‘misisi ya tinhloko ta hina’ swi hi pfuna ku vona leswaku hi ni lunghelo lerikulu ra ku gandzela Xikwembu lexi nga ni vuxiyaxiya ni lexi khathalaka hakunene. Hambileswi hi nga ta boheka ku rindzela misava leyintshwa leyi hi tshembisiweke yona leswaku ku hela maxangu hinkwawo, Yehovha u endlela vanhu vakwe nchumu lowunene ngopfu sweswi. Davhida u tsarile: “Lava va vaka ni xinakulobye na Yehovha hi lava va n’wi chavaka, ni ntwanano wakwe, u endla leswaku va wu tiva.”—Pisalema 25:14.
17 “Xinakulobye na Yehovha.” Sweswo swi vonaka swi nga koteki eka vanhu lava nga hetisekangiki! Kambe Yehovha u rhamba lava n’wi chavaka leswaku va va vaendzi entsongeni wakwe. (Pisalema 15:1-5) Naswona, xana Yehovha u va endlela yini vaendzi vakwe? Hi ku ya hi Davhida, u endla leswaku va tiva ntwanano wa yena. Yehovha wa va tshemba, a paluxa “mhaka ya yena leyi nga xihundla” eka vaprofeta leswaku va tiva swikongomelo swa yena ni leswi va faneleke va endla swona leswaku va hanya hi ku pfumelelana na swona.—Amosi 3:7.
18. Hi swi tivisa ku yini leswaku Yehovha u lava hi va ni vuxaka lebyinene na yena?
18 Kunene, swa khutaza ku tiva leswaku hina vanhu lava nga hetisekangiki hi nga va vanakulobye va Yehovha Xikwembu xa le Henhla-henhla. Kahle-kahle u hi khutaza leswaku hi endla tano. Bibele yi ri: “Tshinelani eka Xikwembu, kutani xi ta tshinela eka n’wina.” (Yakobo 4:8) Yehovha u lava leswaku hi va ni vuxaka lebyinene na yena. Entiyisweni, ana se u teke magoza yo endla leswaku vuxaka byebyo byi va kona. Gandzelo ra nkutsulo ra Yesu ri endle leswaku swi koteka ku va ni vuxaka ni Xikwembu xa Matimba Hinkwawo. Bibele yi ri: “Loko ku ri hina, hi ni rirhandzu, hikuva hi xona xi nga sungula xi hi rhandza.”—1 Yohane 4:19.
19. Ku tiyisela ku nga byi tiyisa njhani vuxaka bya hina na Yehovha?
19 Vuxaka byebyo lebyinene bya tiya loko hi tiyisela ehansi ka swiyimo swo tika leswi hi langutanaka na swona. Mudyondzisiwa Yakobo u tsale a ku: “Ku tiyisela a ku endle ntirho wa kona wu helela, leswaku mi ta helela ni ku va lava hanyeke etimhakeni hinkwato, mi nga kayiveli nchumu.” (Yakobo 1:4) Hi wihi “ntirho” lowu hetisisiwaka hi ku tiyisela swiphiqo? Tsundzuka “mutwa enyameni” ya Pawulo. Xana u kote ku hetisisa yini hi ku tiyisela kakwe? Pawulo u vule leswi malunghana ni miringo yakwe: “Hi ku tsaka lokukulu, swi nga antswa ndzi tibuma hi ku tsana ka mina, leswaku matimba ya Kreste ma tshama ehenhla ka mina ku fana ni ntsonga. Hikokwalaho ndza tsaka eku tsaneni, eku rhukaniweni, eswiyin’weni swa ku pfumala, eku xanisiweni ni le ku nonon’hweriweni, hikwalaho ka Kreste. Hikuva loko ndzi tsanile, hi kona ndzi vaka ni matimba.” (2 Vakorinto 12:9, 10) Pawulo a a lemuke leswaku Yehovha a a n’wi nyika matimba lama lavekaka—“matimba lama tlulaka lama tolovelekeke” loko swi laveka—leswaku a kota ku tiyisela. Sweswo swi endle leswaku a tshinela ekusuhi na Kreste na Yehovha Xikwembu.—2 Vakorinto 4:7; Vafilipiya 4:11-13.
20. Hi nga tiyiseka njhani leswaku Yehovha u ta hi pfuna a tlhela a hi chavelela loko hi langutane ni maxangu?
20 Kumbexana Yehovha u pfumelele leswaku u hambeta u ringiwa. Loko swi ri tano, tsundzuka leswi a swi tshembisaka lava va n’wi chavaka: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Vaheveru 13:5) A nga ku pfuna a tlhela a ku chavelela hi ndlela yoleyo. Yehovha u hlaye “misisi ya nhloko ya [wena].” Wa ku vona ku tiyisela ka wena. Wa ku twela. Wa ku khathalela hakunene. Naswona a nge pfuki a ‘rivale ntirho wa wena ni rirhandzu leri u ri kombiseke hikwalaho ka vito ra yena.’—Vaheveru 6:10.
[Tinhlamuselo ta le hansi]
^ par. 2 Marito yo fana ni wolawo ma vuriwe hi Davhida wo lulama ni hi vana vo tshembeka va Kora.—Pisalema 10:1; 44:24.
^ par. 4 Bibele a yi swi veki erivaleni leswaku i yini ‘mutwa lowu a wu ri enyameni’ ya Pawulo. Kumbexana a ku ri xiphiqo xa le mirini, xo tanihi ku nga ha voni kahle. Kumbe xiga lexi nge “mutwa enyameni” xi nga ha vula vaapostola va mavunwa ni van’wana lava a va lwisana ni vuapostola kun’we ni vutirheli bya Pawulo.—2 Vakorinto 11:6, 13-15; Vagalatiya 4:15; 6:11.
^ par. 9 Vativi van’wana va ringanyeta leswaku ku wa ka xindzingiri ehansi swi nga va swi nga vuli ku fa ka xona ntsena. Va vula leswaku xiga xa ririmi ro sungula xi nga ha vula ku phatsama ka xinyenyana ehansi leswaku xi lava swakudya. Loko swi ri tano, swi ta va swi vula leswaku Xikwembu xi lemuka xinyenyana xexo naswona xa khumbeka hi mintirho ya xona ya siku ni siku, hayi loko xi fa ntsena.—Matewu 6:26.
^ par. 15 Eminkarhini ya khale, magula ya dzovo a ma endliwa hi swikhumba leswi tlhuvutsiweke swa tinyimpfu, timbuti ni tihomu. Emaguleni ya kona a ku cheriwa ntswamba, botere, chizi kumbe mati. Lawa a ma tlhuvutsiwa hi vurhon’wana a ma kota ni ku chela mafurha kumbe vhinyo.
Wa Tsundzuka Xana?
• Hi swihi swilo leswi nga endlaka leswaku munhu a titwa a lahliwile hi Xikwembu?
• I yini leswi hi swi dyondzaka eka xikombiso xa Yesu xa swindzingiri ni xa ku hlayiwa ka misisi ya tinhloko ta hina?
• Swi vula yini ku va mihloti ya munhu yi cheriwa “eguleni ra dzovo” ra Yehovha kumbe yi tsariwa “ebukwini” ya yena?
• Hi nga swi kotisa ku yini ku va ni “xinakulobye na Yehovha”?
[Swivutiso Swa Dyondzo]
[Xifaniso lexi nga eka tluka 22]
Ha yini Yehovha a nga wu susanga “mutwa enyameni” ya Pawulo?
[Xifaniso lexi nga eka tluka 23]
Hi nga dyondza yini eka xifaniso xa Yesu xa swindzingiri?
[Xihlovo Xa Kona]
© J. Heidecker/VIREO
[Xifaniso lexi nga eka tluka 25]
Loko hi hlaya Bibele nkarhi na nkarhi, hi nga tiyiseka leswaku Xikwembu xi khathalela un’wana ni un’wana wa hina