Ku Hlaya Bibele Swi Tlangeriwile

MARIANNA, la nga Mbhoni ya Yehovha ya le dzongeni wa Italy, u ni malembe ya 18 hi vukhale naswona sweswi u nghena lembe ro hetelela exikolweni xa le henhla. U nghena xikolo xin’we ni vana van’wana lava nga Timbhoni.

Marianna u tsale a ku: “Van’wana va hina se hi ni malembe yo hlayanyana hi ri karhi hi hlaya ndzimana ya Bibele ya siku eka Ku Kambisisa Matsalwa Siku Ni Siku hi nkarhi wa ku wisa exikolweni. A hi yi hlayela eholweni ekusuhi ni hofisi leyi vadyondzisi va tshamaka eka yona. Ndhawu ya kona a yi ri ni pongo. Vadyondzisi vo tala a va hi vona loko va hundza naswona van’wana a a va yima leswaku va vona leswi hi swi endlaka. Sweswo a swi hi nyika nkarhi wo hlamula swivutiso swa vona. Hi xiringaniso a ku yima mudyondzisi un’we siku ni siku. Vo tala a va yima va yingisela bulo ra hina ra ndzimana ya Bibele naswona va tlangele ndlela leyi hina Timbhoni hi rhandzaka swilo swa moya ha yona. Siku rin’wana, mupfuni wa nhloko ya xikolo u hi vitanile leswaku hi ta khoma mbulavurisano wa hina ehofisini leyi vadyondzisi va tshamaka eka yona.

“Endzhaku ko vona ndhawu leyi hi hlayelaka ndzimana ya siku eka yona, mudyondzisi wa mina u kombele nhloko ya xikolo loko swi nga koteka leswaku hi tirhisa yin’wana ya titlilasi, laha a ku nga ri na pongo. Nhloko ya xikolo yi pfumerile naswona mudyondzisi wa mina u hi bumabumerile emahlweni ka tlilasi hinkwayo hikwalaho ka xikombiso lexinene lexi hi xi vekaka. Hinkwerhu hi tsake ngopfu leswi Yehovha a hi nyikeke lunghelo lerikulu swonghasi.”