Xana U Ta Kombisa Ku Vangama Ka Xikwembu?

“Hi vonakarisa ku vangama ka Yehovha kukota swivoni.”—2 VAKORINTO 3:18.

1. Muxe u vone yini, naswona ku humelele yini endzhaku ka sweswo?

AKU ri xin’wana xa swivono leswi chavisaka swinene leswi munhu a tshameke a swi vona. Loko a ri yexe le henhla ka Ntshava ya Sinayi, Muxe u kombiwe nchumu lowu a wu nga tolovelekanga. U pfumeleriwe ku vona nchumu lowu a wu nga si tshama wu voniwa hi munhu—ku nga ku vangama ka Yehovha. Ina, Muxe a nga vonanga Yehovha hi ku kongoma. Xivumbeko xa Xikwembu xi vangama swinene lerova a ku na munhu la nga xi vonaka kutani a hambeta a hanya. Ematshan’weni ya sweswo, Yehovha u veke “xandla” xa yena ehenhla ka Muxe tanihi xifunengeto kukondza A hundza, entiyisweni a tirhisa muyimeri wa yena la nga ntsumi. Kutani Yehovha u pfumelele Muxe ku vona ndzhuti wa ku kombisiwa ka ku vangama ka Xikwembu. Yehovha u tlhele a vulavula na Muxe hi ku tirhisa ntsumi. Bibele yi hlamusela leswi humeleleke endzhaku ka sweswo: “Loko Muxe a rhelela a suka eNtshaveni ya Sinayi . . . nhlonge ya xikandza xakwe a yi humesa miseve hikwalaho ka leswi a vulavuleke na [Yehovha].”—Eksoda 33:18–34:7, 29.

2. Muapostola Pawulo u tsale yini malunghana ni ku vangama loku kombisiwaka hi Vakreste?

² Tianakanye u ri entshaveni yoleyo na Muxe. A swi ta nyanyula ku vona ku vangama lokukulu ka Lowa Matimba Hinkwawo ni ku yingisela marito ya yena! A ku ta va lunghelo lerikulu ku rhelela eNtshaveni ya Sinayi u famba na Muxe, muhlanganisi wa ntwanano wa Nawu! Kambe, xana a wu swi tiva leswaku Vakreste va ntiyiso va kombisa ku vangama ka Xikwembu hi tindlela to karhi, hi ndlela leyi tlulaka leyi Muxe a ku kombiseke ha yona? Mhaka yoleyo leyi tlhontlhaka mianakanyo yi kumeka epapileni leri tsariweke hi muapostola Pawulo. U tsale leswaku Vakreste lava totiweke va “vonakarisa ku vangama ka Yehovha kukota swivoni.” (2 Vakorinto 3:7, 8, 18) Vakreste lava nga ni ntshembo wa laha misaveni na vona va kombisa ku vangama ka Xikwembu hi ndlela yo karhi.

Ndlela Leyi Vakreste Va Kombisaka Ku Vangama Ka Xikwembu Ha Yona

3. Hi tiva Yehovha ku tlula Muxe hi tindlela tihi?

³ Hi nga ku kombisa njhani ku vangama ka Xikwembu? A hi si tshama hi vona Yehovha kumbe ku n’wi twa hi ndlela leyi Muxe a n’wi tweke ha yona. Hambiswiritano, hi tiva Yehovha hi tindlela leti tlulaka ndlela leyi Muxe a a n’wi tiva ha yona. Yesu a nga humelelanga tanihi Mesiya kukondza ku va endzhaku ka malembe ya kwalomu ka 1 500 Muxe a file. Xisweswo, Muxe a a ta va a nga yi tivanga ndlela leyi Nawu a wu ta hetisisiwa ha yona eka Yesu, loyi a feke leswaku a kutsula vanhu eka ntshikilelo wo biha swinene wa xidyoho ni rifu. (Varhoma 5:20, 21; Vagalatiya 3:19) Ku tlula kwalaho, Muxe a a ta byi vona hi ndlela leyi pimiweke vukulu bya xikongomelo xa Yehovha, lexi fambisanaka swinene ni Mfumo wa Mesiya, ni Paradeyisi ya laha misaveni leyi wu nga ta yi tisa. Xisweswo hi vona ku vangama ka Yehovha, ku nga ri hi mahlo ya hina ya xiviri, kambe hi mahlo ya ripfumelo leri sekeriweke etidyondzweni ta Bibele. Ku tlula kwalaho, hi twe rito ra Yehovha, ku nga ri eka ntsumi, kambe eBibeleni, ngopfu-ngopfu eka Tievhangeli leti hlamuselaka tidyondzo ni vutirheli bya Yesu hi ndlela leyi tsakisaka.

4. (a) Vakreste lava totiweke va ku kombisa njhani ku vangama ka Xikwembu? (b) Lava nga ni ntshembo wo hanya laha misaveni va nga kombisa ku vangama ka Xikwembu hi tindlela tihi?

⁴ Hambileswi Vakreste va nga kombisiki ku vangama ka Xikwembu hi miseve leyi vangamaka eswikandzeni swa vona, swikandza swa vona swa vangama loko va byela van’wana hi vumunhu bya Yehovha lebyi vangamaka ni hi swikongomelo swa yena. Malunghana ni siku ra hina, muprofeta Esaya u vule ka ha ri emahlweni leswaku vanhu  va Xikwembu va ta “vulavula hi ku vangama ka [Yehovha] exikarhi ka matiko.” (Esaya 66:19) Ku tlula kwalaho, eka 2 Vakorinto 4:1, 2, ha hlaya: “Leswi hi nga ni vutirheli lebyi . . . , hi fularhele swilo leswi ngungumerisiwaka leswi khomisaka tingana, a hi fambi hi vukanganyisi, hambi ku ri ku nyakapfarisa rito ra Xikwembu, kambe hi ku kombisa ntiyiso ha tibumabumela eka ripfalo ra munhu un’wana ni un’wana emahlweni ka Xikwembu.” Laha Pawulo kahle-kahle a a vulavula hi Vakreste lava totiweke, lava nga “vatirheli va ntwanano lowuntshwa.” (2 Vakorinto 3:6) Kambe vutirheli bya vona byi khumbe ni vanhu lava nga hlayekiki lava kumeke ntshembo wa vutomi lebyi nga heriki emisaveni. Vutirheli bya mintlawa leyimbirhi byi katsa ku kombisa ku vangama ka Yehovha malunghana ni leswi va swi dyondzisaka ni ndlela leyi va hanyaka ha yona. Hi ni vutihlamuleri ni lunghelo ra ku kombisa ku vangama ka Xikwembu Lexi nge Henhla-henhla!

5. Ku humelela ka hina hi tlhelo ra moya ku nyikela vumbhoni bya yini?

⁵ Namuntlha, mahungu lamanene lama vangamaka ya Mfumo wa Xikwembu ma chumayeriwa emisaveni hinkwayo leyi akiweke, hilaha Yesu a vuleke hakona ka ha ri emahlweni. (Matewu 24:14) Vanhu lava humaka ematikweni hinkwawo, va tinxaka hinkwato ni va tindzimi hinkwato va amukele mahungu lamanene hi mbilu hinkwayo naswona va hundzule vutomi bya vona leswaku va ta endla ku rhandza ka Xikwembu. (Varhoma 12:2; Nhlavutelo 7:9) Ku fana ni Vakreste vo sungula, a va nge tshiki ku vulavula hi swilo leswi va swi voneke va tlhela va swi twa. (Mintirho 4:20) Vanhu vo tlula tsevu wa timiliyoni, lava nga tala ku tlula ematin’wini hinkwawo, va kombisa ku vangama ka Xikwembu namuntlha. Xana u un’wana wa vona? Ku humelela hi tlhelo ra moya ka vanhu va Xikwembu ku nyikela vumbhoni lebyi khorwisaka bya nkateko ni nsirhelelo wa Yehovha. Leswaku moya wa Yehovha wu le henhla ka hina swi vonaka swinene tanihi leswi ku nga ni mavandla ya matimba swinene lama lwaka na hina. A hi voneni leswaku ha yini hi ri ni moya wa Yehovha.

Vanhu Va Xikwembu A Va Nge Miyetiwi

6. Ha yini ku laveka ripfumelo ni xivindzi leswaku hi seketela Yehovha?

⁶ A hi nge a wu vitaniwile leswaku u ya nyikela vumbhoni malunghana ni xigevenga xa tihanyi. Wa swi tiva leswaku xigevenga lexi xi ni nhlengeletano ya matimba swinene naswona xi ta tirhisa ndlela yin’wana ni yin’wana leswaku xi ku sivela leswaku u xi paluxa. Leswaku u nyikela vumbhoni malunghana ni xigevenga xolexo u fanele u va ni xivindzi swin’we ni ntshembo wa leswaku valawuri va ta ku sirhelela eka xona. Na hina hi le xiyin’weni lexi fanaka. Loko hi nyikela vumbhoni hi Yehovha ni hi swikongomelo swa yena, hi tiyisa vumbhoni malunghana na Sathana Diyavulosi, hi n’wi paluxa tanihi mudlayi wa vanhu ni muhembi loyi a xisaka misava hinkwayo leyi akiweke. (Yohane 8:44; Nhlavutelo 12:9) Leswaku u seketela Yehovha naswona u lwisana na Diyavulosi u fanele u va ni ripfumelo ni xivindzi.

7. Nkucetelo wa Sathana wu fika kwihi, naswona u ringeta ku endla yini?

⁷ Ina, Yehovha hi La Tlakukeke. Matimba ya yena ma ya tlula kule ya Sathana. Hi nga tiyiseka leswaku Yehovha wa swi kota ku hi sirhelela naswona u tiyimiserile ku hi sirhelela loko hi n’wi tirhela hi ku tshembeka. (2 Tikronika 16:9) Nilokoswiritano, Sathana u lawula madimona ni misava ya vanhu lava hambukeke eka Xikwembu. (Matewu 12:24, 26; Yohane 14:30) Leswi a lahleriweke emisaveni naswona a ‘hlundzukeke swinene,’ Sathana u lwisana ni malandza ya Yehovha swinene  naswona u tirhisa misava leyi a yi lawulaka leswaku a ringeta ku pfala milomu ya hinkwavo lava chumayelaka mahungu lamanene. (Nhlavutelo 12:7-9, 12, 17) Xana u swi endlisa ku yini sweswo? U swi endla hi tindlela tinharhu.

8, 9. Sathana u ri tirhisa njhani rirhandzu leri hoxeke, naswona ha yini hi fanele hi hlawula vanghana va hina hi vukheta?

⁸ Ndlela yin’wana leyi Sathana a ringetaka ku hi hambukisa ha yona i ku tirhisa mivilelo ya vutomi. Emasikwini lawa ya makumu vanhu va rhandza mali, va tirhandza naswona va rhandza mintsako. A va rhandzi Xikwembu. (2 Timotiya 3:1-4) Leswi va khomekeke swinene hi timhaka ta vutomi ta siku ni siku, vanhu vo tala ‘a va na mhaka’ ni mahungu lamanene lawa hi va tiselaka wona. A va swi tsakeli ku dyondza ntiyiso wa Bibele. (Matewu 24:37-39) Langutelo ro tano ri nga hi tlulela, ri hi endla hi khudzehela hi tlhelo ra moya. Loko ho pfumela ku hlakulela ku rhandza swilo leswi vonakaka ni mintsako ya vutomi, a hi nge he xi rhandzi Xikwembu.—Matewu 24:12.

⁹ Hikwalaho ka xivangelo lexi, Vakreste va va hlawula hi vukheta vanghana va vona. Hosi Solomoni u tsarile: “Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.” (Swivuriso 13:20) Onge hi nga ‘famba’ ni lava va kombisaka ku vangama ka Xikwembu. A hi ku tsakisa ka swona ku endla sweswo! Loko hi hlangana ni vamakwerhu va moya eminhlanganweni ni hi minkarhi yin’wana, hi khutaziwa hi rirhandzu ra vona, ripfumelo ra vona, ntsako wa vona ni vutlhari bya vona. Vunakulobye byo tano lebyinene byi tiyisa ku tiyimisela ka hina ku tiyisela evutirhelini.

10. Sathana u tirhise ku hlekuriwa ka lava kombisaka ku vangama ka Xikwembu hi tindlela tihi?

¹⁰ Ndlela ya vumbirhi leyi Sathana a ringetaka ha yona ku tshikisa Vakreste hinkwavo leswaku va vonakarisa ku vangama ka Xikwembu i ku hlekula. Rhengu leri a ri fanelanga ri hi hlamarisa. Loko a endla vutirheli bya yena laha misaveni, Yesu Kreste u hlekuriwile—a hlekiwa, a khovoleriwa, ku endliwa xihlekiso ha yena, a rhukaniwa a tlhela a tshwuteleriwa marha. (Marka 5:40; Luka 16:14; 18:32) Vakreste vo sungula na vona a va vungunyiwa. (Mintirho 2:13; 17:32) Malandza ya manguva lawa ya Yehovha ma khomiwa hi ndlela leyi fanaka ya tihanyi. Entiyisweni, hi ku ya hi muapostola Petro, a va ta vuriwa “vaprofeta va mavunwa.” Petro u vule ka ha ri emahlweni a ku: “Emasikwini ya makumu ku ta va ni vahlekuri lava hlekulaka, va famba hi ku ya hi ku navela ka vona va ku: ‘Byi kwihi vukona byakwe lebyi tshembisiweke? Hikuva, . . . swilo hinkwaswo swa ha tshame hilaha a swi ri hakona eku sunguleni ka ntumbuluko.’” (2 Petro 3:3, 4) Vanhu va Xikwembu va hlekuriwa va vuriwa lava nga byi tiviki vutomi. Mimpimanyeto ya mahanyelo ya Bibele yi tekiwa tanihi leyi hundzeriweke hi nkarhi. Eka vo tala, rungula leri hi ri chumayelaka i vuphukuphuku. (1 Vakorinto 1:18, 19) Leswi hi nga Vakreste hi nga ha hlekuriwa exikolweni, entirhweni minkarhi yin’wana ni le ndyangwini. Handle ko chava, hi hambeta hi kombisa ku vangama ka Xikwembu hi ku chumayela ka hina, hi ri karhi hi swi tiva leswaku Rito ra Xikwembu i ntiyiso, hilaha Yesu na yena a a swi tiva hakona.—Yohane 17:17.

11. Sathana u wu tirhise njhani nxaniso leswaku a ringeta ku miyeta Vakreste?

¹¹ Rhengu ra vunharhu leri Diyavulosi a ri tirhisaka leswaku a ringeta ku hi pfala milomu i nkaneto  kumbe nxaniso. Yesu u byele valandzeri va yena a ku: “Vanhu va ta mi nghenisa enhlomulweni, va mi dlaya, naswona mi ta vengiwa hi matiko hinkwawo hikwalaho ka vito ra mina.” (Matewu 24:9) Hakunene, tanihi Timbhoni ta Yehovha hi langutane ni nxaniso wa tihanyi eswiphen’wini swo tala swa misava. Ha swi tiva leswaku Yehovha u vule khale leswaku rivengo kumbe vulala, byi ta va kona exikarhi ka lava va tirhelaka Xikwembu ni lava va tirhelaka Sathana Diyavulosi. (Genesa 3:15) Ha swi tiva na leswaku loko hi hlayisa vutshembeki ehansi ka ndzingo, hi nyikela vumbhoni eka ku lulama ka vuhosi bya Yehovha bya vuako hinkwabyo. Ku tiva leswi swi nga hi tiyisa hambi ku ri ehansi ka swiyimo leswi tikeke swinene. A ku na nxaniso lowu nga hi miyetelaka makumu loko hi tshama hi tiyimiserile ku vonakarisa ku vangama ka Xikwembu.

12. Ha yini hi fanele hi tsaka loko hi hambeta hi tshembeka hambiloko Sathana a hi kaneta?

¹² Xana u lwisana ni swirimbana swa misava kutani u tshembeka hambiloko u hlekuriwa ni ku kanetiwa? Kutani u ni xivangelo xo tsaka. Yesu u tiyisekise lava a va ta n’wi landzela a ku: “Ma tsaka n’wina loko vanhu va mi rhukana ni ku mi xanisa ni ku mi hembela hi swilo hinkwaswo swo homboloka hikwalaho ka mina. Tsakani mi khana, hikuva hakelo ya n’wina i yikulu ematilweni; hikuva ni vaprofeta lava mi rhangeleke va xanisiwe tano.” (Matewu 5:11, 12) Ku tiyisela ka wena ku nyikela vumbhoni bya leswaku moya lowo kwetsima wa Yehovha lowu nga ni matimba wu le henhla ka wena, wu ku nyika matimba ya ku vonakarisa ku vangama ka yena.—2 Vakorinto 12:9.

Ku Tiyisela Hi Ku Pfuniwa Hi Yehovha

13. Hi xihi xivangelo lexikulu lexi endlaka hi tiyisela evutirhelini bya hina bya Vukreste?

¹³ Xivangelo lexikulu lexi endlaka hi tiyisela evutirhelini hileswaku hi rhandza Yehovha naswona hi tsakela ku kombisa ku vangama ka yena. Vanhu va rhandza ku tekelela vanhu lava va va rhandzaka va tlhela va va xixima, naswona a ku na munhu un’wana loyi a faneriwaka hi ku tekeleriwa ku tlula Yehovha Xikwembu. Hikwalaho ka rirhandzu ra yena lerikulu, u rhumele N’wana wa yena emisaveni leswaku a ta nyikela vumbhoni malunghana ni ntiyiso ni ku kutsula vanhu lava yingisaka. (Yohane 3:16; 18:37) Ku fana ni Xikwembu, hi navela leswaku vanhu va mixaka hinkwayo va hundzuka naswona va ponisiwa; hi yona mhaka leyi endlaka hi va chumayela. (2 Petro 3:9) Ku navela loku, swin’we ni ku tiyimisela ku tekelela Xikwembu, swi hi susumetela ku kombisa ku vangama ka xona evutirhelini bya hina.

14. Yehovha u hi tiyisa njhani leswaku hi tiyisela evutirhelini bya hina?

¹⁴ Kambe, xa nkoka hileswaku matimba ya hina yo tiyisela evutirhelini bya Vukreste ma huma eka Yehovha. Wa hi seketela a tlhela a hi tiyisa hi ku tirhisa moya wa yena, nhlengeletano ya yena ni Rito ra yena, Bibele. Yehovha u ‘nyika ku tiyisela’ eka lava va tiyimiseleke ku kombisa ku vangama ka yena. U hlamula swikhongelo swa hina naswona  u hi nyika vutlhari bya ku langutana ni miringo. (Varhoma 15:5; Yakobo 1:5) Ku tlula kwalaho, Yehovha a nga pfumeli leswaku hi weriwa hi ndzingo lowu hi nga taka hi nga swi koti ku wu tiyisela. Loko hi tshemba Yehovha, u ta hi nyika ndlela yo huma leswaku hi ta hambeta hi kombisa ku vangama ka yena.—1 Vakorinto 10:13.

15. I yini lexi hi pfunaka leswaku hi tiyisela?

¹⁵ Ku tiyisela evutirhelini bya hina swi nyikela vumbhoni bya leswaku moya wa Xikwembu wu le henhla ka hina. Hi xikombiso: A hi nge munhu un’wana u ku kombele leswaku u famba hi yindlu ni yindlu u nyika vanhu muxaka wo karhi wa xinkwa, mahala. U ku byele leswaku ntirho wolowo u ta tihakelela wona naswona u ta wu endla hi nkarhi wa wena. Ku tlula kwalaho, u hatla u xiya leswaku a hi vanhu vangani lava xi lavaka xinkwa lexi xa wena; van’wana va lwisana ni matshalatshala ya wena yo xi phakela vanhu. Xana u anakanya leswaku a wu ta heta tin’hweti kumbe malembe u tirha ntirho wolowo? Nikatsongo. Kambe, swi nga ha endleka u tikarhatile u twarisa mahungu lamanene hi nkarhi wa wena naswona u tirhise swilo swa wena ku ringana malembe yo tala, hambi ku ri makume ya malembe. Ha yini? Xana a hi leswi u rhandzaka Yehovha naswona hi ku tirhisa moya wa yena a katekiseke matshalatshala ya wena hi ku ku pfuna leswaku u tiyisela? Swi tano hakunene!

Ntirho Lowu Nga Ta Tsundzukiwa

16. Ku tiyisela ka hina evutirhelini swi vula yini eka hina ni le ka lava va hi yingisaka?

¹⁶ Vutirheli bya ntwanano lowuntshwa i nyiko leyi nga ringanisiwiki na nchumu. (2 Vakorinto 4:7) Hilaha ku fanaka, vutirheli bya Vukreste lebyi endliwaka hi tinyimpfu tin’wana emisaveni hinkwayo i ndzalama. Loko u ri karhi u ya emahlweni u tiyisela evutirhelini bya wena, u nga “tiponisa wena swin’we ni lava va ku yingisaka,” hilaha Pawulo a tsaleleke Timotiya hakona. (1 Timotiya 4:16) Anakanya hileswi sweswo swi vulaka swona. Mahungu lamanene lawa u ma chumayelaka ma nyika van’wana lunghelo ra ku hanya hi masiku. U nga va ni vuxaka lebyi tiyeke ni lava u va pfunaka hi tlhelo ra moya. Anakanya ndlela leyi swi nga ta tsakisa ha yona ku hanya hi masiku eParadeyisini swin’we ni lava u va pfuneke leswaku va dyondza hi Xikwembu! Hakunene a va nge ma rivali matshalatshala ya wena yo va pfuna. Swa tsakisa sweswo hakunene!

17. Ha yini nkarhi wa hina wu ri wo hlawuleka ematin’wini ya vanhu?

¹⁷ U hanya enkarhini lowu hlawulekeke ematin’wini ya vanhu. Mahungu lamanene a ma nge he pfuki ma chumayeriwile emisaveni leyi hambukeke eka Xikwembu. Nowa a a hanya emisaveni yo tano, naswona u yi vonile loko yi hundza. U fanele a tsake swinene hi ku tiva leswaku u endle ku rhandza ka Xikwembu hi ku tshembeka hi ku aka ngalava, leyi poniseke yena ni ndyangu wa yena! (Vaheveru 11:7) Na wena u nga va na wona ntsako wo tano. Anakanya ndlela leyi u nga ta titwa ha yona emisaveni leyintshwa loko u languta ntirho lowu u wu endleke emasikwini yo hetelela, u tiva leswaku u endle leswi u swi koteke leswaku u yisa timhaka ta Mfumo emahlweni.

18. Yehovha u nyika malandza ya yena xitiyisekiso ni xikhutazo xihi?

¹⁸ Hikwalaho, a hi hambeteni hi kombisa ku vangama ka Xikwembu. Loko hi endla ntirho wolowo hi ta wu tsundzuka hilaha ku nga heriki. Yehovha na yena wa yi tsundzuka mintirho ya hina. Bibele yi nyikela xikhutazo lexi: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona, hileswi mi tirheleke vakwetsimi naswona ma ha ya emahlweni mi va tirhela. Kambe hi navela leswaku un’wana ni un’wana wa n’wina a kombisa ku chivirika loku fanaka leswaku a va ni ku tiyiseka loku heleleke ka ntshembo ku fika emakumu, leswaku mi nga vi na vulolo, kambe mi tekelela lava dyaka ndzhaka ya switshembiso hikwalaho ka ripfumelo ni ku lehisa mbilu.”—Vaheveru 6:10-12.

Xana U Nga Hlamusela?

• Vakreste va ku kombisa njhani ku vangama ka Xikwembu?

• I marhengu wahi lawa Sathana a ma tirhisaka loko a ringeta ku miyeta vanhu va Xikwembu?

• I vumbhoni byihi lebyi kombisaka leswaku moya wa Xikwembu wu le henhla ka hina?

[Swivutiso Swa Dyondzo]

[Xifaniso lexi nga eka tluka 15]

Xikandza xa Muxe xi vonakarise ku vangama

[Swifaniso leswi nga eka tluka 16, 17]

Hi kombisa ku vangama ka Xikwembu evutirhelini bya hina