“Mpfuno Wa Mina Wu Huma Eka Yehovha”

Vunyingi Byi Amukela Vugandzeri Bya Yehovha

VUPROFETA bya Bibele lebyi vulavulaka hi siku ra hina byi vule ka ha ri emahlweni leswaku vanhu lava humaka ematikweni hinkwawo a va ta khitikanela evugandzerini bya Yehovha lebyi tlakukeke. Hi xikombiso, hi ku tirhisa muprofeta Hagayi, Yehovha Xikwembu u te: “Ndzi ta ninginisa matiko hinkwawo, kutani swilo leswi navelekaka swa matiko hinkwawo swi fanele swi nghena; ndzi ta tata yindlu leyi hi ku vangama.” (Hagayi 2:7) Esaya na Mikiya va profete leswaku enkarhini wa hina—“exiphen’wini xo hetelela xa masiku”—matiko ni vanhu a va ta gandzela Yehovha hi ndlela leyi amukelekaka.—Esaya 2:2-4; Mikiya 4:1-4.

Xana vuprofeta byolebyo bya hetiseka hakunene namuntlha? A hi kambisiseni vumbhoni bya kona. Eka malembe ya khume lama hundzeke ntsena, vanhu lavantshwa vo tlula 3 110 000 va tinyiketele eka Yehovha ematikweni yo tlula 230. Hakunene, Timbhoni ta Yehovha ta tsevu eka tin’wana ni tin’wana ta khume leti sweswi ti tirhaka emisaveni hinkwayo ti khuvuriwe eka malembe ya khume lama hundzeke. Hi 2004, hi xiringaniso, nandza un’we la ha ku tinyiketelaka eka Xikwembu u engeteriwile evandlheni ra Vukreste eka timinete tin’wana ni tin’wana timbirhi! *

Ku fana ni hi lembe-xidzana ro sungula, namuntlha ‘nhlayo leyikulu yi va vapfumeri naswona yi hundzukela eHosini.’ Hambileswi ku andza ka tinhlayo ku nga riki vumbhoni bya nkateko wa Xikwembu, swi nyikela vumbhoni bya leswaku “voko ra Yehovha” ri ni vanhu va yena. (Mintirho 11:21) I yini lexi endlaka vanhu va timiliyoni va ta evugandzerini bya Yehovha? Naswona xana ku andza loku ku ku khumba njhani wena?

Vanhu Va Timbilu Letinene Va Kokiwa

Yesu u vule hi ku kongoma a ku: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.” (Yohane 6:44) Hikwalaho, entiyisweni, Yehovha hi yena a kokaka vanhu lava nga ni “mboyamelo lowunene eka vutomi lebyi nga heriki.” (Mintirho 13:48) Moya wa Xikwembu wu nga endla vanhu va xalamukela xilaveko xa vona xa moya. (Matewu 5:3) Ripfalo leri karhatekeke, ku navela swinene ku va ni ntshembo, kumbe khombo lerikulu ri nga ha vangela van’wana leswaku va lavisisa Xikwembu xisweswo va dyondza hi xikongomelo xa xona hi vanhu.—Marka 7:26-30; Luka 19:2-10.

Vanhu vo tala va kokeriwa evugandzerini bya Yehovha hikuva nongonoko wo dyondzisa Bibele wa vandlha ra Vukreste wu va pfuna ku kuma tinhlamulo ta swivutiso leswi va karhataka.

“Loko Xikwembu xi ri kona, ha yini vanhu va hambeta va khomiwa hi ndlela leyi pfumalaka vululami?” Xexo a ku ri xivutiso lexi a xi karhata Davide, muxavisi wa swidzidzirisi wa le Italy. A a nga ri na mhaka na timhaka ta vukhongeri, hikwalaho u vutise xivutiso lexi xi tlhontlhaka mianakanyo leswaku a sungula njhekanjhekisano. U ri: “A ndzi nga anakanyi leswaku ndzi nga kuma nhlamulo leyi twalaka yi tlhela yi khorwisa. Kambe Mbhoni leyi vulavuleke na mina yi lehise mbilu swinene naswona yi seketele leswi a yi swi vula hi tindzimana ta le Bibeleni. Bulo rolero ri ndzi khumbe swinene.” Namuntlha, Davide u lulamise mahanyelo ya yena naswona u tirhela Yehovha.

 Van’wana va kokeleka exiphen’wini xa nhlengeletano ya Yehovha ya laha misaveni hikwalaho ka leswi va lavaka ku tiva xikongomelo xa vutomi. Dokodela wa miehleketo wa le Zagreb, eCroatia, u endzele mutirhi-kulobye loyi a a dume swinene a ya lava vutshunguri bya swiphiqo swa yena swa mintlhaveko. Lexi n’wi hlamariseke, dokodela loyi u n’wi nyike tinomboro ta riqingho ta hofisi ya rhavi ya Timbhoni ta Yehovha ya le Zagreb, swin’we ni vito ra Mbhoni leyi a a yi tiva. U te: “Ndzi anakanya leswaku vanhu lava va nga ku pfuna. Loko ndzo ku rhumela ekerekeni, u ta ya kuma ntsena swifaniso leswi nga hanyiki—a ku na munhu la vulavulaka, naswona nchumu wun’wana ni wun’wana wu le munyameni wa moya. A ndzi tshembi leswaku u nga wu kuma mpfuno ekerekeni. Ndzi rhumele vavabyi van’wana eka Timbhoni ta Yehovha, kutani ndzi tshemba leswaku na wena u ta pfuneka.” Hi musa Timbhoni ti n’wi endzerile naswona ku nga ri kungani ku sunguriwe dyondzo ya Bibele na yena. Hi mavhiki ma nga ri mangani, dokodela yoloye wa mianakanyo u vule a tsakile a ku, ku tiva xikongomelo xa Xikwembu swi n’wi endle a va ni xikongomelo evuton’wini.—Eklesiasta 12:13.

Loko vanhu va hlaseriwa hi makhombo yo karhi, vo tala va kume leswaku i ntiyiso wa Bibele ntsena lowu nyikaka nchavelelo wa xiviri. Le Greece, jaha ra malembe ya nkombo ri we elwangwini ra xikolo kutani ri fa. Endzhaku ka tin’hweti ti nga ri tingani, Timbhoni timbirhi ti hlangane ni mana wa rona kutani ti ringeta ku n’wi chavelela hi ku bula na yena hi ntshembo wa ku pfuxiwa ka vafi. (Yohane 5:28, 29) Hiloko wansati loyi a ku xibuku! Vamakwerhu lava va xisati va vutisile: “Loko u lava ku tiva leswi engetelekeke hi Bibele, hi nga ku endzela rini?” U hlamurile: “Kona sweswi.” Wansati loyi u fambe na vona ekaya ra yena, hiloko ku sunguriwa dyondzo ya Bibele. Namuntlha, ndyangu wa yena hinkwawo wu tirhela Yehovha.

Xana Wa Hlanganyela eNtirhweni Lowu?

Mintokoto leyi yi kombisa swilo leswi endlekaka emisaveni hinkwayo. Yehovha u hlengeleta a tlhela a letela ntshungu lowukulu wa tinxaka to hambana-hambana ta vagandzeri va ntiyiso. Ntlawa lowu wu humaka ematikweni hinkwawo wu ni ntshembo lowu tsakisaka wa ku pona makumu lama tshinelaka ya mafambiselo lawa yo homboloka ya swilo ni ku ya hanya emisaveni leyintshwa ya ku lulama.—2 Petro 3:13.

Hikwalaho ka nkateko wa Yehovha, ntirho lowu lowukulu wa ku hlengeleta wu ya emakumu hi ndlela leyikulu. (Esaya 55:10, 11; Matewu 24:3, 14) Xana u hlanganyela entirhweni lowu wo chumayela hi Mfumo hi ku hiseka? Loko u hlanganyela hi ku hiseka, u nga tiyiseka leswaku Xikwembu xi ta ku seketela naswona u nga phindha marito lawa ya mupisalema: “Mpfuno wa mina wu huma eka Yehovha.”—Pisalema 121:2.

[Nhlamuselo ya le hansi]

[Marito lama tshahiweke exihlokweni lama nga eka tluka 9]

“Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.”—YOHANE 6:44

[Bokisi leri nga eka tluka 8]

I MANI LA VANGELAKA LESWAKU KU VA NI KU ANDZA LOKU?

“Loko Yehovha a nga yi aki yindlu, i swa hava leswi vaaki va yona va tirheke hi matimba eka yona.”—Pisalema 127:1.

“Xikwembu hi xona lexi hambeteke xi swi kurisa; loyi a byalaka a hi nchumu, hambi loyi a cheletaka, kambe i Xikwembu lexi xi swi kurisaka.”—1 Vakorinto 3:6, 7.