Ku Hlamusela Swikombiso I Mhaka Ya Nkoka!

“Eku sunguleni a ndzi anakanya leswaku n’wana wa hina Andreas a a pandziwa hi nhloko ntsena. Kambe a a nga ha naveli swakudya naswona a a hisa miri. Ku pandza ka nhloko yakwe ku ye ku nyanya kutani ndzi sungule ku karhateka. Loko nuna wa mina a vuyile, hi yise Andreas eka dokodela. U kambele Andreas kutani a namba a n’wi rhumela exibedlhele. A ku nga ri ku pandza ka nhloko ntsena. Andreas a a khomiwe hi vuvabyi byo pfimba nkuva wa byongo. U tshunguriwile naswona endzhakunyana u hlakarherile.”—Gertrud, manana wa le Jarimani.

NTOKOTO wa Gertrud wu fanele wu tolovelekile eka vatswari vo tala. Va vona swikombiso leswi kombisaka loko n’wana wa vona a vabya. Hambileswi ku nga riki vuvabyi hinkwabyo lebyi nga ni khombo, vatswari a va nge swi honisi swikombiso swa vuvabyi eka vana va vona. Ku vona swikombiso ivi u teka goza leri faneleke swi nga vula swo tala. I mhaka ya nkoka.

Sweswo a hi swa nkoka etimhakeni ta rihanyo ntsena. Xikombiso xa xiviri xa mhaka leyi i xa mhangu ya tsunami leyi humeleleke hi December 2004 etindhawini leti nga eribuweni ra Lwandle ra Indiya. Minhlangano ya vativi va ta maxelo etindhawini to kota Australia ni le Hawaii yi lemuke ku tsekatseka lokukulu ka misava en’walungu wa Sumatra kutani yi swi vona ka ha ri emahlweni leswaku khombo ra ta. Kambe a swi nga koteki ku lemukisa vanhu lava a va ri etindhawini leti nga ekhombyeni. Hikokwalaho, vanhu lava tlulaka 220 000 va lovile.

Swikombiso Leswi Nga Swa Nkoka Swinene

Loko Yesu Kreste a ha ri emisaveni, u dyondzise vayingiseri vakwe swo karhi malunghana ni ku vona swikombiso ivi u teka goza leri faneleke. A a vulavula malunghana ni nchumu wa nkoka swinene. Bibele ya hlamusela: “Vafarisi ni Vasaduki va n’wi tshinelela kutani va n’wi kombela ku va endlela singita leri humaka etilweni, leswaku va n’wi ringa. A va angula a ku: ‘Loko ri pela mi tolovele ku vula mi ku, “Ku ta va ni maxelo lamanene, hikuva xibakabaka xi tshwuke bya ndzilo”; naswona nimixo mi ri, “Namuntlha ku ta va ni maxelo yo titimela, ya mpfula, hikuva xibakabaka xi tshwuke bya ndzilo, kambe xi visinganile.” Ma swi tiva  ku hlamusela ku languteka ka xibakabaka, kambe a mi swi koti ku hlamusela swikombiso swa minkarhi.’”—Matewu 16:1-3.

Loko a vulavula hi “swikombiso swa minkarhi,” Yesu a a kombisa leswaku vayingiseri vakwe va Vayuda va lembe-xidzana ro sungula a va fanele va xiye nkoka wa minkarhi leyi a va hanya eka yona. Mafambiselo ya swilo ya Vayuda a ma ri ekusuhi ni ku weriwa hi khombo leri a ri ta va khumba hinkwavo. Masiku ma nga ri mangani emahlweni ko fa kakwe, Yesu u vulavule ni vadyondzisiwa vakwe malunghana ni xikombiso xin’wana—ku nga xikombiso xa vukona byakwe. Leswi a swi vuleke enkarhini wolowo i swa nkoka swinene eka un’wana ni un’wana namuntlha.