I Dyondzo Ya Njhani Leyi Nga Endlaka Vutomi Bya Wena Byi Humelela?

XANA u tshame u hlaseriwa hi swiphiqo lerova u twa onge u le ku nweleni ematini ya maboboma? Wa nga anakanya ndlela leyi a wu ta xaniseka ha yona loko wo endla xihoxo, loko u ri karhi u kamana ni swin’wana swa swiphiqo sweswo! A ku na munhu loyi a tswariwaka a ri ni vuswikoti bya ku tlhantlha swiphiqo hinkwaswo hi ndlela leyi humelelaka, a endla swiboho leswinene minkarhi hinkwayo. Laha hi laha dyondzo yi pfunaka kona. Xana u nga yi kuma kwihi dyondzo leyi nga ku endlaka u lunghekela ku langutana ni swiphiqo swa vutomi hi ndlela leyi humelelaka?

Vanhu vo tala lavatsongo ni lavakulu va tlangela nkoka wa ku ya exikolweni. Vatshila van’wana va kala va vula leswaku va “tshemba hi ku hetiseka leswaku a wu nge swi koti ku kuma ntirho [lowu faneleke] loko u nga ri na digri ya le kholichi.” Kambe, ku ni swilaveko swo hlayanyana leswi nga enerisiwiki hi ku va na timali ta wena. Hi xikombiso, xana ku dyondzeka ku nga ku pfuna leswaku u va mutswari lonene, munghana wa vukati lonene kumbe munghana lonene? Hikwalaho, vanhu lava xiximiwaka hikwalaho ka mabyongo ya vona va nga ha va ni mikhuva leyi nga tsakisiki, mindyangu ya vona yi nga ha hahluka, kumbe va hetelela va tisungile.

Van’wana va lava nkongomiso eka vukhongeri, tanihi xihlovo xa dyondzo, kambe va hetiwa matimba hikuva a va kumi mpfuno wo langutana ni swiphiqo swa vutomi. Xikombiso xa mhaka leyi i xa Emilia * wa le Mexico, loyi a nge: “Malembe ya 15 lama hundzeke a ndzi swi twa leswaku a ndzi nga ha ta swi kota ku hambeta ndzi tshama ni nuna wa mina. A hi tshamela ku holova. A ndzi nga swi koti ku n’wi tshikisa ku nwa byala. Nkarhi na nkarhi a ndzi boheka ku siya vana va hina lava a va ha ri vatsongo va ri voxe leswaku ndzi ya lava nuna wa mina. Mintlhaveko ya mina a yi nga ha lavi nchumu. Ndzi ye ko hlayanyana ekerekeni leswaku ndzi ya lava nchumu lowu nga ndzi pfunaka ku tlhantlha xiphiqo xa mina. Hambileswi Bibele a yi pfa yi hlayiwa, a ndzi nga si tshama ndzi twa ndzayo leyi a yi vulavula hi xiyimo xa mina hi ku kongoma; naswona a ku na munhu loyi a teke eka mina leswaku a ta ndzi byela leswaku ndzi endla yini. Ku tshama swa xinkarhana ekerekeni ni ku phindha-phindha swikhongelo swo karhi a swi nga ndzi enerisi.” Van’wana va nga ha heleriwa hi ntshembo loko va vona leswaku varhangeri va vona va vukhongeri a va veki xikombiso lexinene evuton’wini. Hikwalaho, vo tala a va ha tshembi leswaku vukhongeri byi nga va xihlovo xa ndzetelo kumbe dyondzo leyi nga va pfunaka leswaku va humelela evuton’wini.

Hikwalaho, u nga ha tivutisa, ‘Ndzi fanele ndzi va ni dyondzo ya muxaka muni leswaku ndzi ta humelela evuton’wini?’ Xana Vukreste bya ntiyiso byi ni nhlamulo ya xivutiso lexi xa nkoka? Mhaka leyi yi ta tlhuvutsiwa exihlokweni lexi landzelaka.

[Nhlamuselo ya le hansi]