“Lava Rhelelaka eLwandle Hi Swikepe”

EHLALUKWENI ra le Gloucester, eMassachusetts le U.S.A., ku ni xifaniso xa koporo lexi kombisaka mutluti loyi a lwaka ni magandlati ya lwandle. Xifaniso lexi xi tsundzuxa vanhu hi ta vaphasi va tinhlampfi vo tala va le Gloucester lava feleke elwandle. Le hansi exifanisweni lexi ku tsariwe marito ya Pisalema 107:23, 24, lama nge: “Lava rhelelaka elwandle hi swikepe, lava endlaka bindzu ematini yo tala; Va vona mintirho ya Hosi, mintirho yakwe yo hlamarisa evuentweni bya lwandle.”—King James Version.

Ku phasa tinhlampfi eswidziveni swa lwandle ra Atlantic i ntirho lowu nga ni khombo. Edorobeni ra Gloucester leri nga ni vaaka-tiko va kwalomu ka 30-000, se ku fe vavanuna va kwalomu ka 5 368 loko va ri karhi va phasa tinhlampfi elwandle. Eribyeni ra xitsundzuxo ku tsariwe marito lama nge: “Van’wana va biwe hi magandlati lamakulu lama vangiweke hi swidzedze leswi humaka tlhelo ra n’walungu-vuxa, ivi va dyiwa hi mati. Kasi van’wana va fe va ri voxe loko va ri karhi va famba hi xikwekwetsu lexi nga pembela xi siya xikepe lexi va ngheneke ha xona exikarhi ka lwandle loko va ya phasa tinhlampfi. Swikepe swin’wana swi tlumbanile hikwalaho ka swidzedze leswikulu ivi swi mbombomela elwandle. Kasi swin’wana leswitsongo swi tlumbiwe hi swikepe leswikulu.”

Xifaniso lexi xi komba nhlomulo lowu vaphasi va tinhlampfi va langutaneke na wona eka malembe-xidzana lama hundzeke. Ehleketa hi swirilo swa vavasati vo tala lava feriweke hi vavanuna va vona, vana lava saleke va nga ri na vatatana, ni lava feriweke hi vamakwavo ni vatswari lava feriweke hi vana. Hambiswiritano, Yehovha Xikwembu a nga ti rivali tinoni ni swisiwana ni lava va feleke elwandle. Muapostola Yohane u vulavule hi mhaka leyi loko a ku: “Lwandle ri humesa vafi lava nga eka rona, rifu ni Hayidesi swi humesa vafi lava nga eka swona.” (Nhlavutelo 20:13) Hakunene loko ku pfuxiwa vafi, ‘lava va rheleleke elwandle hi swikepe’ va ta vona ‘mintirho yo hlamarisa ya Hosi.’