Va Yisa Mahungu Lamanene Eka Lava Feke Tindleve

“VA MI tisela timhaka ta moya!” Yoleyo i ndlela leyi mufambisi wa kaya ra vadyuhari le Navalcarnero, edorobeni ra Madrid, eSpain a ha ku ma hlamuselaka ha yona maendzo ya Timbhoni ta Yehovha ekaya ra vadyuhari. I yini leswi n’wi susumeteleke ku vula sweswo?

Vanhu vo hlayanyana lava tshamaka ekaya ra vadyuhari ra Rosas del Camino va fe tindleve. Kambe tanihi leswi Timbhoni ti endleke matshalatshala yo dyondza Ririmi ra Mavoko ra le Spain, ti kota ku vulavula ni vanhu vo tano. Mufambisi u bumabumele Timbhoni hileswi ti tirhisaka nkarhi wa tona ti dyondzisa vanhu lava nga ni torha ra timhaka ta moya. U xiye vuyelo byo tsakisa lebyi veke kona eka vadyuhari hikwalaho ka ku dyondzisiwa mahungu lamanene ya Mfumo. Naswona vadyuhari volavo—ngopfu-ngopfu lava nga twiki kumbe lava nga voniki—na vona va swi tlangela swinene ku endzeriwa hi Timbhoni.

Eulogio, un’wana wa vadyuhari loyi a feke mahlo ni tindleve, sweswi u dyondza Bibele ni Timbhoni ta Yehovha. Siku rin’wana loko va ri eku dyondzeni, ku fike mukhalabye un’wana a nyika Timbhoni xiphato lexi tsariweke hi vadyuhari va kombisa ku tlangela ka vona. Nhloko-mhaka ya xiphato xexo a yi ku “Ku Va Mbhoni.” Hi ku komisa a xi ku: “Ti hanya vutomi lebyinene bya ku anakanyela van’wana, naswona Yehovha u ti nyika vutlhari lebyikulu. Ti tshama ti ri karhi ti gidela etindlwini ta vanhu hileswi ti tshembaka Yehovha.”

Kahle-kahle ku tshemba Yehovha hi swona leswi susumeteleke Timbhoni to tala emisaveni hinkwayo leswaku ti dyondza ririmi ra mavoko ra vanhu lava feke tindleve, va laha ti tshamaka kona. Xisweswo ti va tivisa rungula leri khutazaka ra ntshembo leri kumekaka eBibeleni.