“Rirhandzu Ra N’wina Hinkwenu Ra Kula”

TIMHANGU ta ntumbuluko to hlayanyana ti hlasele tiko ra Japani hi 2004. Tin’wana ta tona a ku ri mimoya ya thayifuni, tindhambhi ni ku tsekatseka ka misava. Ti khumbe vutomi bya vanhu vo tala hi ndlela yo vava, ku katsa ni Timbhoni ta Yehovha. (Eklesiasta 9:11) Kambe, makhombo lawa ma nyike Timbhoni nkarhi wo kombisana xinakulobye xa vumakwerhu.—1 Petro 1:22.

Hi xikombiso, nambu lowu nga le xikarhi ka Japani wu khapakhapile etimbuweni ta wona hikwalaho ka timpfula letikulu leti neke hi July. Tindhambhi ti onhe makaya yo tlula 20 ya Timbhoni ta Yehovha. EHolweni ya Mfumo yin’wana, mati ma tlakuke ku ringana mitara ku suka ehansi. Xikan’we-kan’we, Timbhoni leti humaka emavandlheni ya le kusuhi ti hlanganyerile eku pfuneni. Madzana ya vatirhi vo tirhandzela ma basise tiyindlu leti a ti tele ndzhope. Holo ya Mfumo yi basisiwe hi ku helela yi tlhela yi lunghisiwa ku nga si hela mavhiki mambirhi.

Hi October 23, ku tsekatseka ka misava loku a ku ri 6,8 hi mpimo wa xikalo xa Richter wu hlasele ndhawu yoleyo. Ku fe vanhu va 40, kasi vanhu vo tlula 100 000 a va fanele va rhurhisiwa emakaya ya vona. Mati, gasi na gezi a swi nga ri kona. Hambileswi ndhawu leyi hlaseriweke swinene hi ku tsekatseka loku a yo va mpfhuka wa tikhilomitara ta 50 ntsena, Holo ya Mfumo leyi a ya ha ku lunghisiwa a yi khumbekanga. Yi nambe yi endliwa ndhawu ya mphalalo ya nkarhinyana. Valanguteri lava nga Vakreste va hatle va kambisisa vuhlayiseki bya vapfumeri-kulobye, hiloko va ku hefu, loko va kuma leswaku ku hava ni un’we la vavisekeke kumbe la dlayiweke. Hi mixo lowu landzelaka, Timbhoni ta tsevu leti a ti hlaseriwile eka ndhambi ya hi July ti tirhe hi ku hiseka hi ku tirhandzela ti famba ti phakela swakudya ni mati etindhawini leti khumbekeke. Ku nga si hela tiawara ti nga ri tingani endzhaku ka ku tsekatseka ka misava, nhundzu ya mphalalo se a yi kumeka.

Mulanguteri un’wana u ri: “Lava a va hlaseriwe hi tindhambhi va teke ntirho wo phalala lava hlaseriweke hi ku tsekatseka ka misava wu ri nkarhi lowunene wo kombisa ku tlangela ka vona mpfuno lowu va wu kumeke. Va tirhe hi matimba ku sukela nimixo swinene ku fikela nivusiku swinene. Naswona swikandza swa vona a swi hatima hi ntsako!”

Tindhambhi kumbe ku tsekatseka ka misava a swi nge xungeti xiboho xa rirhandzu xa vamakwerhu lava nga Vakreste lava nga Timbhoni ta Yehovha. Ku hambana ni sweswo, loko ku va ni timhangu to tano, Vakreste va tokota leswi muapostola Pawulo a swi byeleke vapfumeri-kulobye eTesalonika a ku: “Rirhandzu ra n’wina hinkwenu ra kula exikarhi ka n’wina.”—2 Vatesalonika 1:3.