Armagedoni—Xana I Makumu Lama Chavisaka Ya Misava?
Armagedoni—Xana I Makumu Lama Chavisaka Ya Misava?
ARMAGEDONI! Xana rito leri ri endla leswaku u ehleketa hi ku yayarheriwa ka vanhu vo tala kumbe hi ku hisiwa ka vuako hinkwabyo? Vanhu etindhawini to tala va tshamela ku vulavula hi “Armagedoni” ku tlula rito rihi ni rihi rin’wana leri kumekaka eBibeleni. Vo tala va tirhisa rito leri ku hlamusela vumundzuku bya vanhu lebyi chavisaka. Minkombiso ya thelevhixini yi tate mianakanyo ya vanhu hi swivono leswi chavisaka malunghana na “Armagedoni” leyi taka. Vo tala va ni mianakanyo leyi hoxeke hi rito leri. Hambileswi rito leri ri hlamuseriwaka hi tindlela to hambana-hambana, vunyingi bya tinhlamuselo ta kona a ti pfumelelani ni leswi Bibele—laha rito rero ri humaka kona—yi swi dyondzisaka hi Armagedoni.
Tanihi leswi Bibele yi hlanganisaka Armagedoni ni “ku hela ka misava,” xana a wu pfumeli leswaku i swa nkoka ku swi twisisa kahle leswi rito rero ri vulaka swona hakunene? (Matewu 24:3, Bibele Ya Xitsonga) Nakambe, xana a hi vutlhari ku kambisisa xihlovo xa ntiyiso, ku nga Rito ra Xikwembu, leswaku hi kuma tinhlamulo malunghana ni leswaku Armagedoni i yini, naswona yi ta ku khumba njhani wena ni ndyangu wa wena?
Loko hi endla nkambisiso wo tano hi ta kuma leswaku ematshan’weni yo tisa makumu yo chavisa, Armagedoni yi ta tisa masungulo lama tsakisaka eka vanhu lava lavaka ku hanya hi ntsako emisaveni leyintshwa yo lulama. Ntiyiso lowu wa nkoka wa le Matsalweni u ta wu twisisa kahle loko u kambisisa leswi Armagedoni yi nga swona hakunene eka xihloko lexi landzelaka.
[Bokisi/Xifaniso lexi nga eka tluka 3]
XANA U ANAKANYA LESWAKU ARMAGEDONI I YINI?
• Ndzoviso wa nyutliya
• Mhangu ya ntumbuluko
• Ku himana ka misava ni swilo swa le mpfhukeni
• Ku lovisiwa ka vanhu vo biha hi Xikwembu