Ku Pfuna Machayina eMexico

“VAVANUNA va khume lava humaka eka tindzimi hinkwato ta matiko va ta khoma, ina, entiyisweni va ta khoma nguvu ya wanuna la nga Muyuda, va ku: ‘Hi ta famba na n’wina, hikuva hi swi twile leswaku Xikwembu xi na n’wina.’” (Zakariya 8:23) Namuntlha vuprofeta lebyi byo saseka bya hetiseka emisaveni hinkwayo. Vanhu “lava humaka eka tindzimi hinkwato ta matiko” va khoma nguvu ya Vaisrayele va moya leswaku va ta gandzela Yehovha Xikwembu. Timbhoni ta Yehovha ta tsaka swinene hi ku hetiseka ka vuprofeta lebyi. To tala ti dyondza ririmi rimbe leswaku ti hlanganyela entirhweni wo chumayela emisaveni hinkwayo.

Timbhoni ta Yehovha eMexico na tona ti endla tano. Le Mexico ku ringanyetiwa leswaku ku ni Machayina ya 30 000. Hi 2003, 15 wa vona a va ri kona eXitsundzuxweni xa rifu ra Kreste lexi khomeriweke eDorobeni ra Mexico. Kutani Timbhoni ta le Mexico ti lemuke vuthala lebyi kombisaka leswaku nsimu ya Xichayina yi ta tswala mihandzu hi tlhelo ra moya. Leswaku ku va ni vachumayeri vo tala lava nga ta khathalela Machayina lawa, ku simekiwe khoso ya tin’hweti tinharhu yo dyondzisa Timbhoni ta le Mexico swingheniso swo olova hi Xichayina xa Mandarin. Timbhoni ta 25 ti nghenele khoso leyi. Loko khoso leyi yi hela, mutirhela-mfumo wa le Dorobeni ra Mexico la tshamaka endhawini leyi ku vulavuriwaka Ximandarin a a ri kona loko ku thwasiwa, a kombisa vuyelo lebyinene bya khoso yoleyo eka vanhu lava vulavulaka Xichayina. Nhlangano wa kwalaho wa Machayina wu nyike swichudeni swinharhu mali leswaku swi ya entsungeni swi ya yisa tidyondzo ta swona emahlweni leswaku swi antswisa Xichayina xa swona.

Khoso leyi ya ku dyondza ririmi a yi katsa ku endla leswi u swi dyondzaka. Endzhaku ka loko swi dyondze swiga swo karhi, swichudeni swi vhele swi sungula ku chumayela hi Xichayina endhawini ya mabindzu ya le Dorobeni ra Mexico. Swichudeni leswi leswi hisekaka swi sungule tidyondzo ta Bibele ta 21. Broxara leyi nge I Yini Leswi Xikwembu Xi Swi Languteleke Eka Hina? ya Xichayina, leyi a yi ri ni rungula leri a ri tsariwe hi maletere lama tolovelekeke, lama vuriwaka Pinyin, yi pfunile swinene.

Xana Timbhoni leti a ta ha ku nghenela khoso ya Xichayina ti swi kotise ku yini ku fambisa tidyondzo ta Bibele? Eku sunguleni, a ti kota ntsena ku vula leswaku, “Qing Du [Ndzi kombela u hlaya]” kutani ti kombetela ndzimana ti tlhela ti kombetela xivutiso. Endzhaku ka loko munhu a hlayile a tlhela a hlamula hi Xichayina, a ti ku, “Shei shei [Ndza nkhensa]” na “Hen Hao [U endle kahle ngopfu].”

Ku sunguriwe dyondzo yo tano ya Bibele ni wansati un’wana loyi a ri Mukreste hi ro vito. Endzhaku ka loko va dyondze kanharhu, Mbhoni yi tivutisile loko wansati loyi a ri twisisa hakunene rungula leri. Hiloko Mbhoni leyi yi famba ni  makwerhu un’wana wa xinuna loyi a a vulavula Xichayina. Loko makwerhu loyi a vutisa wansati loyi loko a ri ni swivutiso swo karhi, wansati u te: “Leswaku ndzi khuvuriwa, xana swi lava leswaku ndzi kota ku hlambela?”

Ku nga ri kungani, ku simekiwe Dyondzo ya Buku ya Vandlha laha vanhu va kwalomu ka 9 lava vulavulaka Xichayina a va va kona swin’we ni Timbhoni ta 23 ta le Mexico. Eka lava a va va kona a ku ri ni dokodela wa Muchayina, loyi a kumeke timagazini ta Xihondzo xo Rindza ni Xalamuka! hi Xipaniya eka un’wana wa swigulana swa yena. Leswi a a nga swi koti ku hlaya Xipaniya, u kombele un’wana leswaku a n’wi hundzuluxela tilayini to hlayanyana. Loko a xiye leswaku timagazini leti ti vulavula hi Bibele, u vutise xigulana loko xi nga swi kota ku n’wi kumela timagazini leti hi Xichayina. Xigulana xi endle tano naswona hi ku tirhisa rhavi ra Timbhoni ta Yehovha eMexico, ku endliwe malunghiselelo ya leswaku Mbhoni leyi vulavulaka Xichayina yi n’wi endzela. Mana wa dokodela loyi eChayina a a ri ni Bibele naswona dokodela loyi a a rhandza ku yi hlaya. Loko a kunguhata ku ya eMexico mana wakwe u n’wi byele leswaku a nga tshiki ku hlaya Bibele. Kutani a a hamba a khongela leswaku un’wana a n’wi pfuna leswaku a dyondza swo tala malunghana ni Xikwembu xa le Bibeleni. U te: “Xikwembu xi yingise xikhongelo xa mina!”

Van’wana lava a va va kona eka dyondzo ya buku a ku ri ndyangu wun’wana wa Machayina lowu a wu hirhe eka wansati wa le Mexico loyi a dyondzaka Bibele ni Timbhoni ta Yehovha. Hambileswi ndyangu lowu wa Machayina a wu xi twa katsongo Xipaniya, a wu va kona loko ku buriwa hi Bibele. Hi ku famba ka nkarhi, ndyangu lowu wu vutise Mbhoni leyi fambisaka dyondzo loko yi ri na yona minkandziyiso ya Xichayina. Ku nga ri kungani ku sunguriwe dyondzo ya Bibele ni ndyangu lowu hi Xichayina. Swi nga si ya kule ndyangu lowu wu vule leswaku wu lava ku chumayela van’wana va ririmi ra ka vona naswona wu lava ku tinyiketela eka Yehovha.

I ntiyiso, Xichayina i ririmi leri swi tikaka ku ri dyondza. Hambiswiritano, hilaha hi swi voneke hakona eka mintokoto leyi, hi ku pfuniwa hi Yehovha vanhu va tindzimi to tala, ku katsa ni Machayina, va le ku dyondzeni ka ku rhandza ka Xikwembu eMexico, ku katsa ni le swiphen’wini swin’wana swa misava.

[Xifaniso lexi nga eka tluka 17]

Tlilasi ya Xichayina eDorobeni ra Mexico

[Xifaniso lexi nga eka tluka 18]

Mbhoni ya le Mexico yi fambisa dyondzo ya Bibele hi Xichayina

[Xifaniso lexi nga eka tluka 18]

Ku chumayela hi yindlu ni yindlu hi Xichayina, eDorobeni ra Mexico