Tiholideyi Ta Khisimusi Ni Lembe Lerintshwa—Xana Ti Ta Swi Hetisisa Leswi U Swi Languteleke?

“Peter [Lonkulu] hi yena la simekeke nkhuvo wo hlawuleka wo tlangela Lembe Lerintshwa lowu endliwaka etikerekeni hinkwato hi January 1. Ku tlula kwalaho, u lerise leswaku ku tirhisiwa marhavi lama tshamaka ma ri ya rihlaza leswaku ku khavisiwa marimba ya tiyindlu, a tlhela a lerisa leswaku vaaka-tiko hinkwavo va le Moscow va fanele va ‘kombisa ku tsaka ka vona hi ku huwelela va navelelana leswinene’ eka Lembe Lerintshwa.”—Peter the Great—His Life and World.

XANA i yini leswi u swi languteleke eka tiholideyi ta Khisimusi ni Lembe Lerintshwa? Phela i nkarhi wo leha, wa ku wisa. Vatswari ni vana va nga ha ya eku wiseni hi nkarhi lowu, hikwalaho wu nga va nkarhi lowunene wa leswaku mindyangu yi heta nkarhi yi ri swin’we. Khisimusi i siku ra ndhavuko ra ku tswariwa ka Kreste. Vanhu van’wana va lava ku fundzha Kreste hi nkarhi lowu wa lembe tanihi leswi va anakanyaka leswaku lowu i nkarhi wa nkoka swinene. Kumbexana na wena u wu teka wu ri nkarhi wa nkoka swinene.

Ku nga khathariseki leswaku i nkarhi wo xixima Kreste, wo tsaka ni ndyangu kumbe haswimbirhi, timiliyoni ta vavanuna, vavasati ni vana emisaveni hinkwayo ti wu langutela hi mahlo-ngati nkarhi lowu. Ku vuriwa yini hi lembe leri? Xana wu ta va nkarhi wo hlawuleka wa ndyangu naswona xana wu hlawulekile eka Xikwembu? Loko ndyangu wa ka n’wina wu ta hlengeletana swin’we, xana swilo swi ta famba hi ndlela ya kona kumbe swilo swi ta famba ximatsi?

Vanhu vo tala lava va languteleke ku tiphina hi tlhelo ra moya va xiye leswaku swilo leswi endliwaka hi Khisimusi ni Lembe Lerintshwa hakanyingi a swi fambisani ni Vukreste. Kambe ematshan’weni ya sweswo, nkarhi wa tiholideyi wu hundzuke nkarhi wa ku amukela tinyiko, wa ku ya ephatini leyi nga ha katsaka swiendlo leswi nga n’wi xiximiki Kreste kumbe nkarhi lowunene wa leswaku ndyangu wu hlengeletana swin’we. Minkarhi yo tala ku hlengeletana ko tano ku hetelela ku nga tsakisi hikwalaho ka leswi swirho swin’wana swa ndyangu swi dyaka kumbe swi nwaka ku tlula mpimo, swi vanga timholovo leti hakanyingi ti pfuxaka madzolonga endyangwini. U nga ha va u swi xiyile sweswo kumbe u swi tokotile.

Loko swi ri tano, swi nga ha vonaka onge a ku cincanga nchumu ku sukela enkarhini wa Mufumi wa le Rhaxiya, Peter Lonkulu, loyi ku vulavuriweke ha yena eku sunguleni. Hi ku nyangatsiwa hi swilo leswi endlekaka masiku lawa, vo tala va navela onge nkarhi wa tiholideyi wu nga va nkarhi wo anakanyisisa hi swilo swa vukhongeri ni nkarhi lowunene wo hlengeletana ni maxaka. Van’wana va endla matshalatshala yo cinca swilo, hi ku tirhisa swiga swo fana ni leswi nge, hi tlangela holideyi leyi hikwalaho ka Yesu. Xana va ta swi kota ku cinca swilo? Xana ku cinca koloko ku ta endla leswaku Kreste a xiximiwa hakunene? Xana swi kona swivangelo swo cinca langutelo leri u nga na rona malunghana ni nkarhi lowu wa tiholideyi?

Leswaku u kuma tinhlamulo leti enerisaka, a hi languteni xiyimo lexi hi ndlela leyi vanhu lava nga ni xivangelo xo hlawuleka xo tlangela holideyi leyi, va wu langutaka ha yona nkarhi lowu wa lembe.