Endla Leswaku Ku Anakanyisisa Ku Va Loku Tsakisaka

VANHU van’wana va teka ku anakanyisisa ku ri mhaka yo tika. Va nga ha vona onge ku anakanyisisa ku lava leswaku munhu a endla matshalatshala yo hlawuleka swinene. Vanhu vo tano va nga tlhela va tivona nandzu hikwalaho ko honisa ku anakanyisisa, ngopfu-ngopfu loko va dyondza kutani va twa leswaku i ka nkoka swinene. (Vafilipiya 4:8) Hambiswiritano, ku anakanyisisa hi ntiyiso lowu hi wu dyondzeke malunghana na Yehovha, ni timfanelo takwe letinene, swilo swo hlamarisa leswi a swi endleke, swilaveko swakwe ni swikongomelo swakwe swo vangama, ku nga va nchumu lowu tsakisaka. Ha yini?

Yehovha Xikwembu i Mufumi la Tlakukeke wa vuako hinkwabyo naswona u tiyimisele ku hetisisa xikongomelo xakwe lexikulu. (Yohane 5:17) Hambiswiritano, u tinyika nkarhi wo vona leswi mugandzeri un’wana ni un’wana wa yena a swi ehleketaka. Mupisalema Davhida a a swi tiva sweswo naswona u huhuteriwe ku tsala a ku: “Oho Yehovha, u ndzi lavisisile, naswona wa ndzi tiva. Wena u tiva ku tshama ka mina ni ku yima ka mina. U ehleketisise hi miehleketo ya mina u ri ekule.”—Pisalema 139:1, 2.

Loko munhu a twa marito lawa ya mupisalema ro sungula, a nga ha titwa a hela matimba. A nga ha ku, ‘Hambileswi Xikwembu xi nga “ekule,” xi tiva miehleketo hinkwayo ya mina yo biha.’ Ina, swa hi pfuna ku tiva leswaku xa yi vona miehleketo ya hina yo biha. Swi nga hi pfuna ku lwisana ni miehleketo yo biha, naswona loko hi va ni miehleketo yo tano hi fanele hi yi phofula eka Xikwembu, hi tiyiseka leswaku xi ta hi rivalela loko hi kombisa ripfumelo ra hina eka gandzelo ra nkutsulo ra Yesu. (1 Yohane 1:8, 9; 2:1, 2) Hi nkarhi lowu fanaka, hi fanele hi tsundzuka leswaku Yehovha u tlhela a kambisisa vagandzeri vakwe hi ndlela leyinene. U nyikela nyingiso loko hi anakanya hi yena hi ri ni ku tlangela.

U nga ha vutisa u ku: “Xana hakunene Yehovha wa yi vona miehleketo hinkwayo leyinene ya vagandzeri vakwe va timiliyoni?” Ina wa yi vona. Yesu u kandziyise ndlela leyi Yehovha a hi khathalelaka ha yona loko a vule leswaku Yehovha u lemuka hambi ku ri swindzingiri, naswona u ye emahlweni a ku: “Mi ni risima ro tlula swindzingiri swo tala.” (Luka 12:6, 7) Swindzingiri a swi nge ehleketi hi Yehovha. Kutani loko a swi khathalela, hina u fanele a hi khathalela ngopfu naswona wa tsaka loko un’wana ni un’wana wa hina a ehleketa hi yena! Ina, ku fana na Davhida, hi nga khongela hi ku tiyiseka hi ku: “Ku anakanyisisa ka mbilu ya mina a ku tsakise emahlweni ka wena, Wena Yehovha Ribye ra mina ni Mukutsuri wa mina.”—Pisalema 19:14.

Vumbhoni lebyi engetelekeke bya leswaku Yehovha wa khathala hakunene hi leswi vagandzeri vakwe lavo tshembeka va anakanyaka ha swona, byi kumeka eka marito lama huhuteriweke ya muprofeta Malakiya. Loko a vulavula hi masiku ya hina, u profete a ku: “Enkarhini wolowo lava va chavaka Yehovha va vulavurisanile, un’wana ni un’wana ni nakulobye, Yehovha a hambeta a rhiya ndleve, a yingisa. Kutani buku ya xitsundzuxo yi sungula ku tsariwa emahlweni ka yena yi tsaleriwa lava va chavaka Yehovha ni lava va anakanyaka hi vito ra yena.” (Malakiya 3:16) Ku tsundzuka leswaku Yehovha u hambeta a “rhiya ndleve” loko hi anakanya hi yena swi nga endla leswaku ku anakanyisisa ka hina hi Xikwembu ku va loku tsakisaka hakunene. Hikokwalaho, onge hi nga phindha marito ya mupisalema la tsaleke a ku: “Kunene ndzi ta anakanyisisa hi mintirho ya wena hinkwayo, ndzi ta ehleketa hi ntirhisano wa wena.”—Pisalema 77:12.