Swivutiso Swa Vahlayi

Pisalema 102:26 yi vula leswaku misava ni matilo swi “ta lova.” Xana marito wolawo ma vula leswaku pulanete leyi nga Misava yi ta lovisiwa?

Loko a khongela eka Yehovha, mupisalema u te: “U veke masungulo ya misava khale swinene, ni matilo i ntirho wa mavoko ya wena. Ma ta lova, kambe wena u ta tshama u ri kona; ma ta hlakala hinkwawo ku fana ni nguvu. U ta ma siva ku fana ni swiambalo, ma ta tshama nkarhi lowu wu ma ringaneke.” (Pisalema 102:25, 26) Mongo wu kombisa leswaku tindzimana leti a ti vulavuli hi ku lovisiwa ka misava, kambe ti vulavula hi vukona lebyi nga heriki bya Xikwembu. Nakambe mongo wu komba ndlela leyi ntiyiso wolowo wa nkoka wu ma chavelelaka ha yona malandza ya Xikwembu.

Mupisalema, loyi kumbexana a a ri evuhlongeni eBabilona, u sungula hi ku hlamusela maxangu ya yena. U ririsiwa hileswi vutomi byakwe byi hatlaka byi hundza “ku fana ni musi.” Miri wakwe wu hlakatiwa hi ku karhateka kakwe, lerova marhambu yakwe “ma va yo tshwuka ku fana ni xitiko.” Tanihi leswi a karhaleke, u “omile ku fana ni ximila,” naswona u khomiwe hi xivundza ku “fana ni nyenyana leyi nga yoxe ehenhla ka lwangu.” Maxangu yakwe ma n’wi endle leswaku a nga ha tsakeli ni swakudya naswona u tshama a ri eku rileni masiku hinkwawo. (Pisalema 102:3-11) Hambiswiritano, mupisalema loyi a nga heleriwanga hi ntshembo. Ha yini? Hikwalaho ka leswi Yehovha a tshembiseke ku swi endla hi Siyoni kumbe Yerusalema.

Hambileswi muti wa Siyoni wu lovisiweke, Yehovha u tshembise leswaku wu ta pfuxiwa. (Esaya 66:8) Hikwalaho, mupisalema u vulavule na Yehovha hi ku tiyiseka a ku: “U ta komba Siyoni tintswalo, hikuva i nguva leyi tsakeriwaka hi yena, hikuva nkarhi lowu vekiweke wu fikile. Kunene Yehovha u ta aka Siyoni.” (Pisalema 102:13, 16) Kutani mupisalema u tlhele a vulavula hi maxangu yakwe. Kahle-kahle u vula leswaku loko muti wa Yerusalema lowu lovisiweke wo tlhela wu pfuxiwa hi matimba ya Xikwembu, sweswo swi ta vula leswaku Yehovha a nge tsandzeki ku n’wi kutsula exiyin’weni xakwe lexi hlomulaka mbilu. (Pisalema 102:17, 20, 23) Nakambe ku ni swin’wana leswi susumeteleke mupisalema leswaku a tshemba Yehovha hi ku helela. Xana i yini? I mhaka ya leswaku Xikwembu xi tshama xi ri kona hi masiku.

Vukona lebyi nga heriki bya Yehovha byi hambana hi ku helela ni vutomi byo koma bya mupisalema. U byela Yehovha a ku: “Malembe ya wena ma le ka switukulwana hinkwaswo.” (Pisalema 102:24) Nakambe mupisalema u ri: “U veke masungulo ya misava khale swinene, ni matilo i ntirho wa mavoko ya wena.”—Pisalema 102:25.

Hambi ku ri malembe ya misava ni matilo a ma nge ringanisiwi ni vukona bya Yehovha lebyi nga heriki. Mupisalema u ye mahlweni a ku: “[Misava ni matilo swi] ta lova, kambe wena u ta tshama u ri kona.” (Pisalema 102:26) Swi nga koteka ku lovisa misava ni matilo ya xiviri. Kunene, eka tindzimana tin’wana Yehovha u vule leswaku swi ta tshama hi masiku. (Pisalema 119:90; Eklesiasta 1:4) Kambe Xikwembu xi nga swi lovisa loko xi swi lava. Kambe loko ku ri Xikwembu, a xi nge fi. Ntumbuluko wu ‘tshama wu ri kona hi masiku’ hileswi Xikwembu xi wu hlayisaka. (Pisalema 148:6) Loko Yehovha o tshika ku pfuxeta ntumbuluko, a wu “ta hlakala hinkwawo ku fana ni nguvu.” (Pisalema 102:26) Tanihi leswi swiambalo swi hlakalaka swi siya n’wini wa swona a ha hanya, kutani loko Yehovha a a swi lava, a a ta tshika ntumbuluko wakwe wu lova kutani yena a ya emahlweni a hanya. Kambe ha swi tiva leswaku sweswo a hi xikongomelo xakwe, hilaha matsalwa man’wana ma kombisaka hakona. Rito ra Xikwembu ra hi tiyisekisa leswaku xikongomelo xa Yehovha hi leswaku misava ni matilo swi tshama hilaha ku nga heriki.—Pisalema 104:5.

Swa khutaza swinene ku tiva leswaku Yehovha u ta tshama a ri kona leswaku a hetisisa switshembiso swakwe. Ku nga khathariseki maxangu lawa ma nga hi welaka, loko hi kombela mpfuno eka yena, hi nga tiyiseka leswaku “u ta hundzulukela exikhongelweni xa lava va tekeriweke hinkwaswo, naswona a nge xi languteli ehansi xikhongelo xa vona.” (Pisalema 102:17) Ina, xitiyisekiso xa Yehovha lexi kumekaka eka Pisalema 102 xa leswaku u ta hi seketela, xi tiyile swinene ku tlula misava.