Va Rhange Va Hlongorisiwa, Ivi eNdzhaku Va Amukeriwa Hi Mandla Mambirhi

EMALEMBENI lama hundzeke, Santiago ni nghamu yakwe Lourdes va rhurhele edorobeni ro xonga ra Huillcapata le Peru, va ya chumayela vanhu va kwalaho hi rungula ra Bibele leri nyikaka ntshembo. Kambe swi nga si ya kwihi, ku fike mufundhisi wo huma eCuzco kutani a hlengeleta vaaki va ndhawu. Mufundhisi loyi u va lemukise leswaku vukona bya Timbhoni ta Yehovha byi ta vanga ntungu lowu dlayaka ni gamboko leyikulu leyi a yi ta dlaya tihomu ta vona ni ku onha swibyariwa swa vona.

Vanhu vo tala va byi khorwile “vuprofeta” lebyi, kutani ku hele nkarhi wo tlula hafu ya lembe edorobeni, ku nga ri na munhu loyi a amukeleke xirhambo xa Santiago na Lourdes xa ku dyondza Bibele. Ndhuna ya maphorisa ya le dorobeni rero, ku nga Miguel, yi hlongorise Santiago na Lourdes, yi va hoxetela hi maribye. Kambe minkarhi hinkwayo a va kombisa moya wo rhula, va tikhoma tanihi Vakreste.

Hi ku famba ka nkarhi, vaaki van’wana va doroba rero va amukele dyondzo ya Bibele. Hambi ku ri Miguel, u cince langutelo rakwe. U sungule ku dyondza na Santiago, a tshika ku nwa ku tlula mpimo, kutani a va munhu wo rhula. Eku heteleleni, Miguel, nsati wakwe ni vana va vona vambirhi va vanhwanyana va amukele ntiyiso wa Bibele.

Namuntlha ku ni vandlha lerikulu ra Timbhoni ta Yehovha edorobeni rero. Miguel wa tsaka leswi maribye yo tala lawa a hoxeteleke Santiago na Lourdes ha wona ma va hupeke, naswona wa wu rhandza mpatswa lowu hikwalaho ka xikombiso xa wona lexinene xa ku hlanganyeta ku rhula.

[Swifaniso leswi nga eka tluka 32]

Moya wo rhula wa Santiago na Lourdes (laha henhla) wu cince langutelo ra Miguel (exineneni)