Swivutiso Swa Vahlayi
Swivutiso Swa Vahlayi
Xana Yosefa, nandza wo tshembeka wa Yehovha, u teke xinwelo xo hlawuleka xa silivhere a hlahluva ha xona, hilaha Genesa 44:5 yi vonakaka yi kombisa hakona?
A ku na xivangelo xa ku pfumela leswaku Yosefa u tirhise ku hlahluva hi ndlela yo karhi.
Bibele yi swi kombisa kahle leswaku Yosefa a a swi tiva kahle leswaku ku ringeta ku tiva swa nkarhi lowu taka hi ku tirhisa vungoma swi hoxile. Eku sunguleni, loko a komberiwa ku hlamusela milorho ya Faro, Yosefa u vule hi ku phindha-phindha leswaku i Xikwembu ntsena lexi kotaka ku “tivisa” swiendlakalo swa nkarhi lowu taka. Hikwalaho, Faro u pfumerile leswaku Xikwembu lexi Yosefa a a gandzela xona—Xikwembu xa ntiyiso, hayi vungoma—hi xona xi tiviseke Yosefa vuxokoxoko bya swilo swa nkarhi lowu taka. (Genesa 41:16, 25, 28, 32, 39) Eka Nawu lowu nyikiweke Muxe hi ku famba ka nkarhi, Yehovha u yirise ku tirhisiwa ka vungoma kumbe ku hlahluva, xisweswo a tiyisekisa leswaku hi Yena ntsena loyi a tivaka swilo swa nkarhi lowu taka.—Deteronoma 18:10-12.
Kutani ke, ha yini Yosefa a vule hi nomu wa nandza wakwe leswaku u tirhise xinwelo xa silivhere ku ‘hlahluva ha xona’? * (Genesa 44:5) Hi fanele hi kambisisa xiyimo lexi marito wolawo ma vuriweke ehansi ka xona.
Hikwalaho ka ndlala leyi a yi tinyike matimba, vamakwavo va Yosefa a va ye aEgipta va ya lava swakudya. Eka malembe lama hundzeke, vamakwavo lava a va xavise Yosefa leswaku a va hlonga. Kutani handle ko swi xiya, va kombele ku pfuniwa hi makwavo, loyi a a vekiwe ku va mulanguteri wa swakudya etikweni ra Egipta. Yosefa a nga tipaluxanga eka vona. Ku ri ni sweswo u va ringile. Kahle-kahle, Yosefa a a lava ku vona loko va hundzukile hakunene. Nakambe a a lava ku vona loko va n’wi rhandza makwavo Benjamini kun’we ni tata wa vona Yakobe, loyi a a n’wi rhandza swinene Benjamini, naswona loko va va rhandza, a a lava ku vona leswaku va va rhandza ku fikela kwihi. Kutani Yosefa u te ni rhengu.—Genesa 41:55–44:3.
Yosefa u lerise un’wana wa malandza yakwe leswaku a tata minkwama ya vamakwavo hi swakudya, a tlherisela mali ya un’wana ni un’wana wa vona a yi veka enon’wini wa saka, kutani a veka xinwelo xa silivhere xa Yosefa enon’wini wa nkwama wa Benjamini. Eka hinkwaswo leswi, Yosefa a a tiendla mulawuri wa le tikweni ra vahedeni. Hi ku languteka kakwe, swiendlo swakwe ni ririmi rakwe, u tiendle mulawuri wo tano, leswaku vamakwavo va nga xiyi nchumu.
Loko Yosefa a hlangana ni vamakwavo, u ye emahlweni ni rhengu rakwe, a va vutisa a ku: “Xana a mi swi tivanga leswaku munhu wo fana na mina a nga hlahluva?” (Genesa 44:15) Xisweswo, swi le rivaleni leswaku xinwelo lexi a xi ri xiphemu xa rhengu rero. Ku va Yosefa a tirhise xinwelo ku hlahluva a ku nga ri mhaka ya xiviri, tanihi leswi na Benjamini a a nga xi yivanga hakunene xinwelo xexo.
[Nhlamuselo ya le hansi]
^ par. 5 Loko yi hlamusela mukhuva lowu wa khale, The Holy Bible, With an Explanatory and Critical Commentary, leyi hleriweke hi F. C. Cook, yi ri: “A wu endliwa hi ku hoxa nsuku, silivhere kumbe swin’wetsin’wetsi ematini, ivi swi nyangisisiwa kahle; kumbe hi ku languta ematini ku fana ni loko u tilanguta exivonini.” Muhlamuseri wa Bibele la vuriwaka Christopher Wordsworth u ri: “Minkarhi yin’wana xinwelo a xi tatiwa hi mati, kutani ku kumiwa nhlamulo hi xifaniso lexi dyambu ri xi humesaka ehenhla ka mati lama nga eka xinwelo xexo.”