Vutomi Lebyi Enerisaka Hakunene eMisaveni Leyintshwa Ya Xikwembu

DAVID, * Mukreste la nga ni nsati ni vana u rhurhele eUnited States, a tiyiseka leswaku u teke goza leri faneleke. Hambileswi a a nga swi rhandzi ku siya nsati ni vana, a a ri ni ntshembo wa leswaku u ta antswisa vutomi bya vona ntsena loko o kuma mali yo tala. Kutani maxaka yakwe ma kombele leswaku a ta eNew York ivi endzhakunyana a kuma ntirho kwalaho.

Kambe endzhaku ka tin’hweti, David ri sungule ku n’wi xela kambirhi. A a nga ha ri na wona nkarhi wa swilo swa moya. U kale a lava ku heleriwa hi ripfumelo eka Xikwembu. U te a ta xalamuka endzhaku ka loko a hluriwe hi ndzingo wa ku tikhoma ko biha. Ku hlongorisa ka yena rifuwo a swi n’wi hambukisa hakatsongo-tsongo eka pakani-nkulu ya yena. A a fanele a yima hi milenge.

Ku fana na David, lembe ni lembe vo tala va siya matiko ya rikwavo lama sweleke, va  ya ringeta ku ya tihluvukisa. Kambe hakanyingi va hakela hi vumoya bya vona. Van’wana va tivutisile, ‘Xana Mukreste a nga tihlengeletela xuma kambe a tama a ha fuwile eka Xikwembu?’ Vatsari lava dumeke ni vafundhisi va vula leswaku sweswo swa koteka. Kambe hilaha David ni van’wana va dyondzeke hakona, n’hwari-mbirhi yin’we yi ta tshwa nkanga.—Luka 18:24.

Ku Va Ni Mali A Swi Bihanga

Ina, mali yi endliwe hi munhu. Ku fana ni swilo swin’wana swo tala leswi endliweke hi munhu, yona hi yoxe a yi bihanga. Yo va nchumu wo hakela ha wona ntsena. Kutani loko yi tirhisiwa hi ndlela leyinene, yi nga va mpfuno lowukulu. Hi xikombiso, Bibele yi vula leswaku “mali yi nga [va] xisirhelelo,” ngopfu-ngopfu eka swiphiqo leswi fambisanaka ni vusweti. (Eklesiasta 7:12) Kambe eka van’wana swi tikomba onge “mali i ntlhantlho wa swilo hinkwaswo.”—Eklesiasta 10:19, New International Version.

Matsalwa ma sola vulolo, ma khutaza ku gingiriteka. Hi ni vutihlamuleri byo wundla mindyangu ya hina, naswona loko hi ri ni leswi engetelekeke, swi nga vula leswaku hi ni “xo xi avela loyi a pfumalaka.” (Vaefesa 4:28; 1 Timotiya 5:8) Ku tlula kwalaho, ematshan’weni yo hi khutaza ku tidlayisa ndlala, Bibele yi hi khutaza ku tiphina hi rifuwo ra hina. Hi byeriwa leswaku hi “teka xiphemu [xerhu]” kutani hi tiphina hi vuyelo bya mavoko ya hina. (Eklesiasta 5:18-20) Entiyisweni, ku ni swikombiso swo hlayanyana eBibeleni swa vavanuna ni vavasati vo tshembeka lava a va fuwile.

Vanhu Vo Tshembeka Lava A Va Fuwile

Abrahama nandza wo tshembeka wa Xikwembu, a a ri ni mintlhambi leyikulu ya swifuwo, silivhere ni nsuku kun’we ni madzana ya malandza. (Genesa 12:5; 13:2, 6, 7) Yobo wo lulama na yena a a fuwile—a ri ni swifuwo, malandza, nsuku ni silivhere. (Yobo 1:3; 42:11, 12) Hambi ku ri namuntlha vavanuna lava a va ta rhuleriwa xihuku hikwalaho ka rifuwo ra vona, kambe a va fuwile ni le ka Xikwembu.

Muapostola Pawulo u vitana Abrahama “tata wa hinkwavo lava va nga ni ripfumelo.” Abrahama a a nga tsonani naswona a a nga swi rhandzi ku tlula mpimo swilo leswi a a ri na swona. (Varhoma 4:11; Genesa 13:9; 18:1-8) Hilaha ku fanaka, Xikwembu hi xoxe xi hlamusele Yobo tanihi “munhu la pfumalaka xisandzu, wo lulama.” (Yobo 1:8) A a tshama a tiyimisele ku pfuna swisiwana ni lava xanisekaka. (Yobo 29:12-16) Abrahama na Yobo a va tshemba Xikwembu ematshan’weni ya rifuwo ra vona.—Genesa 14:22-24; Yobo 1:21, 22; Varhoma 4:9-12.

Xikombiso xin’wana i Hosi Solomoni. Tanihi mudyandzhaka wa xiluvelo xa Xikwembu eYerusalema, Solomoni u nyikiwe vutlhari lebyi humaka eka Xikwembu, rifuwo ro tala ni ku vangama. (1 Tihosi 3:4-14) U hete malembe yo tala a tshembekile. Kambe eka xiphemu xo hetelela xa vutomi bya Solomoni, “mbilu yakwe a yi  nga ha hetisekanga eka Yehovha.” (1 Tihosi 11:1-8) Entiyisweni, ntokoto wakwe lowu vavisaka wu kombisa mintlhamu yin’wana leyi tolovelekeke ya rifuwo. Xiya yin’wana ya yona.

Mintlhamu Ya Rifuwo

Khombo lerikulu i ku rhandza mali ni leswi yi nga swi xavaka. Eka van’wana rifuwo ri vanga ku navela loku nga enerisekiki. Eku sunguleni, Solomoni u vone mboyamelo wolowo eka van’wana. U tsarile a ku: “La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo. Leswi na swona i vuhava.” (Eklesiasta 5:10) Endzhaku, Yesu na Pawulo va tsundzuxe Vakreste malunghana ni rirhandzu rolero, leri kanganyisaka.—Marka 4:18, 19; 2 Timotiya 3:2.

Loko mali se yi hundzuke nchumu wo sungula eka hina ematshan’weni yo va nchumu wo hakela hi wona ntsena, hi nga va emiringweni yo tala, leyi katsaka ku hemba, ku yiva ni ku kanganyisa. Yudasi Iskariyota, un’wana wa vaapostola va Kreste, u xenge n’wini wakwe hi swiphemu swa silivhere swa 30 ntsena. (Marka 14:11; Yohane 12:6) Hi ku rhandza ngopfu mali, van’wana va kale va tshika ku gandzela Xikwembu va gandzela yona. (1 Timotiya 6:10) Hikokwalaho, minkarhi hinkwayo Vakreste va fanele va lwela ku kuma mali hi nsusumeto lowunene.—Vaheveru 13:5.

Nakambe ku hlongorisa rifuwo swi tisa makhombo man’wana lama tumbeleke swinene. Xo sungula, rifuwo ro tala ri byala moya wa ku titshemba. Yesu u boxe mhaka yoleyo loko a vulavula hi “matimba ya vuxisi bya rifuwo.” (Matewu 13:22) Mutsari wa Bibele Yakobo na yena u tsundzuxe Vakreste hi mhaka leyi fanaka leswaku va nga rivali Xikwembu hambiloko va kunguhata timhaka ta mabindzu. (Yakobo 4:13-16) Leswi mali yi vonakaka yi tisa ntshunxeko wo karhi eka lava nga na yona, ku ni ndzingo wa leswaku va tshemba yona ematshan’weni yo tshemba Xikwembu.—Swivuriso 30:7-9; Mintirho 8:18-24.

Xa vumbirhi, David loyi a boxiweke eku sunguleni, u kume leswaku ku hlongorisa rifuwo hakanyingi swi dyela munhu nkarhi wo tala ni matimba lerova hakatsongo-tsongo swi n’wi tshikisa ku hisekela swilo swa moya. (Luka 12:13-21) Naswona swigwili swi tshama swi ri endzingweni wo tirhisa rifuwo ra swona swi titsakisa ha rona kumbe swi lwela ku fikelela tipakani ta swona.

Xana ku wa ka Solomoni hi tlhelo ra moya swi nga va swi vangiwe hi ku va a pfumelele ku rivatiwa hi vutomi bya vulovolovo? (Luka 21:34) A a swi tiva kahle leswaku Xikwembu a xi swi yirisile ku tekana ni vanhu va matiko mambe. Kambe eku heteleleni u teke tshengwe ra vavasati va kwalomu ka gidi. (Deteronoma 7:3) Hi ku lava ku tsakisa vasati vakwe va matiko mambe, u ringete ku va tsakisa hi ku hlanganyela eka vupfumeri bya vona. Hilaha swi kombisiweke hakona eku sunguleni, mbilu ya Solomoni yi hambuke hakatsongo-tsongo eka Yehovha.

Kunene, leswi swi kombisa ndlela leyi ndzayo ya Yesu yi tiyiseke ha yona loko a ku: “A mi nge vi hlonga ra Xikwembu ni ra Rifuwo.” (Matewu 6:24) Kutani ke, xana Mukreste a nga swi kotisa ku yini ku hlangavetana ni swiphiqo swa timali leswi vo tala va langutaneke na swona sweswi? Xa nkoka swinene, hi nga tiyiseka njhani leswaku ku ta va ni vutomi byo antswa enkarhini lowu taka?

Vutomi Lebyi Enerisaka Hakunene eNkarhini Lowu Taka

Ku hambana na vakokwa wa hina Abrahama na Yobo kun’we ni tiko ra Israyele, valandzeri va Yesu va nyikiwe ntirho wo “endla vanhu va matiko hinkwawo va va vadyondzisiwa.” (Matewu 28:19, 20) Hi fanele hi tirhisa nkarhi ni matshalatshala ya hina eku hetisiseni ka xileriso xexo, ematshan’weni yo swi tirhisela ku hlongorisa swilo leswi vonakaka. Hikwalaho nchumu wa nkoka lowu hi nga wu endlaka leswaku hi kota ku humelela i ku landzela leswi Yesu a hi leriseke ku swi endla: “Kutani, hambetani mi lava mfumo ni ku lulama ka [Xikwembu] ku sungula, xisweswo swilo leswin’wana hinkwaswo mi ta engeteleriwa swona.”—Matewu 6:33.

Loko a pone khombo ra ku lahlekeriwa hi ndyangu wakwe ni ku hola emoyeni, eku heteleleni David u vuye endleleni. Hilaha Yesu a tshembiseke hakona, loko David a tlhele a sungula  ku tikarhatela ku dyondza Bibele, ku khongela ni ku gingiriteka entirhweni wa nsimu, swilo leswin’wana swi sungule ku tshamiseka. Vuxaka bya yena ni nsati swin’we ni vana va yena byi tlhele byi tiya hakatsongo-tsongo. U tlhele a kuma ntsako ni ku eneriseka. Ni sweswi wa ha tirha hi matimba. A swi vuli leswaku u hluvule vusiwana a ambala rifuwo. Hambiswiritano, u dyondze swilo swa nkoka eka ntokoto wakwe lowu vavaka.

David u tivutise swo tala hi xiboho xa yena xo ya eUnited States, naswona u tiyimisele ku ka a nga ha fumiwi hi mali evuton’wini bya yena. Sweswi wa swi tiva leswaku swilo swa nkoka swinene evuton’wini bya yena—ndyangu lowu nga ni rirhandzu, vanghana lavanene ni vuxaka lebyinene ni Xikwembu—a swi nge xaviwi hi mali. (Swivuriso 17:17; 24:27; Esaya 55:1, 2) Kunene, ku tshembeka i swa nkoka swinene ku tlula rifuwo. (Swivuriso 19:1; 22:1) David swin’we ni ndyangu wakwe va tiyimisele ku rhangisa swilo swa nkoka.—Vafilipiya 1:10.

Matshalatshala ya munhu yo fuwisa vanhu-kulobye ma hundzuke nyuku wa mbyana. Hambiswiritano, Xikwembu xi tshembise leswaku Mfumo wa xona wu ta enerisa swilo swa nyama ni swa moya leswi hi swi pfumalaka leswaku hi kota ku hanya kahle. (Pisalema 72:16; Esaya 65:21-23) Yesu u dyondzise leswaku vutomi lebyi enerisaka hakunene byi kumeka hi ku rhangisa swilo swa moya. (Matewu 5:3) Kutani hambiloko hi ri swifumi kumbe swisiwana, ku rhangisa swilo swa moya sweswi i ndlela leyinene swonghasi yo tilunghiselela ku nghena emisaveni leyintshwa ya Xikwembu leyi tshineleke. (1 Timotiya 6:17-19) Misava yoleyo yi ta nyuka hakunene hi vanhu lava fuweke hi tlhelo ra nyama ni ra moya.

[Nhlamuselo ya le hansi]

[Swifaniso leswi nga eka tluka 5]

Yobo a a tshemba Xikwembu, ku nga ri rifuwo ra yena

[Swifaniso leswi nga eka tluka 7]

Swilo swa nkoka swinene evuton’wini a swi nge xaviwi hi mali