Xana U Fana Ni Murhi Wa Lagani Auna?

EMUTINI lowu nga ehandle ka Hlaluko ra Moresby, le Papua New Guinea, vachumayeri vambirhi a va tlhelela ekaya va vuya hi le ntirhweni wa vona wo chumayela. Loko va ri karhi va famba, va vone murhi wo saseka. Un’wana wa vona loyi a a ri mukhalabye u te: “Hmm, murhi wa lagani auna!” U hundzulukele eka jaha leri a fambaka na rona ivi a ya emahlweni a ku: “Vito rero ri vula ‘murhi lowu pfukaka lembe ni lembe.’ Ku hambana ni mirhi yin’wana yo tala ya le tindhawini to hisa, lembe ni lembe wu dzudza matluka, wu sala wu vonaka onge wu file. Kambe loko timpfula ti sungula ku na, wa pfuka, wu humesa swiluva, ivi wu tlhela wu kombisa vuxongi bya wona.”

Ku nga dyondziwa swo karhi eka murhi wa lagani auna. Hi ku ya hi vativi van’wana, wu hlayiwa exikarhi ka mirhi ya ntlhanu ya swiluva leyo saseka ngopfu emisaveni. Hambileswi murhi lowu wu dzudzaka swiluva ni matluka hi vuxika, wu kota ku hlayisa mati yo tala. Timitsu ta wona ti tiyile naswona ti kota ku phasa-phasa maribye lama nga ehansi-hansi emisaveni. Xisweswo wu kota ku yima wu tiyile hambiloko ku ri ni timheho ta matimba. Hi ku kongoma, wu kota ku hanya kahle ehansi ka swiyimo swo tika.

Hi nga tikuma hi ri eswiyin’weni leswi ringaka ndlela leyi ripfumelo ra hina ri tiyeke ha yona. I yini leswi nga ta hi pfuna ku tiyisela? Ku fana ni murhi wa lagani auna, hi nga tswonga mati ya Rito ra Xikwembu lama nyikaka vutomi. Nakambe hi fanele hi namarhela ‘ribye ra hina’ Yehovha ni nhlengeletano ya yena. (2 Samuwele 22:3) Kunene, murhi wa lagani auna i xitsundzuxo lexinene xa leswaku hambiloko hi ri exiyin’weni xo tika, hi nga tshama hi tiyile emoyeni ni ku va lava hanyeke kahle loko hi tirhisa malunghiselelo lawa Yehovha a ma endleke. Loko hi endla tano, hi ta “[dya] ndzhaka ya switshembiso” leswi a swi vuleke, ku katsa ni xitshembiso xa vutomi lebyi nga heriki.—Vaheveru 6:12; Nhlavutelo 21:4.