Ku Hlengeleta Swilo Swa Le Tilweni Ni Swilo Swa Le Misaveni
Ku Hlengeleta Swilo Swa Le Tilweni Ni Swilo Swa Le Misaveni
“Swi fambisana ni leswi tsakeriwaka hi xona . . . ku hlengeleta swilo hinkwaswo nakambe eka Kreste, swilo swa le tilweni ni swilo swa le misaveni.”—VAEFESA 1:9, 10.
1. I yini leswi Yehovha a ‘tsakelaka’ leswaku swi endleka etilweni ni le misaveni?
KU RHULA EMISAVENI HINKWAYO! Lexi i xikongomelo lexi tsakisaka xa Yehovha, “Xikwembu xa ku rhula.” (Vaheveru 13:20) Xikwembu xi huhutele muapostola Pawulo ku tsala leswaku “leswi tsakeriwaka” hi xona i “ku hlengeleta swilo hinkwaswo nakambe eka Kreste, swilo swa le tilweni ni swilo swa le misaveni.” (Vaefesa 1:9, 10) Kahle-kahle, xana marito lawa ma nge ‘ku hlengeleta nakambe’ eka ndzimana leyi ma vula yini? Xidyondzi xa Bibele J. B. Lightfoot u ri: “Xiga lexi xi kombisa leswaku ku ta va ni ku rhula evuakweni hinkwabyo, a swi nge he vi kona swilo leswi nga lavekiki, kambe swilo hinkwaswo swi ta va ni vun’we ni ntirhisano eka Kreste. Xidyoho ni rifu, nhlomulo, ku tsandzeka ku fikelela swo karhi ni ku xaniseka swi ta hela.”
“Swilo Swa Le Tilweni”
2. I vamani “swilo swa le tilweni” leswi faneleke ku hlengeletiwa?
2 Muapostola Petro u wu veke erivaleni ntshembo lowunene lowu Vakreste va ntiyiso va nga na wona loko a ku: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.” (2 Petro 3:13) “Matilo lamantshwa” lawa ma tshembisiwaka laha i vulawuri lebyintshwa, ku nga Mfumo wa Mesiya. “Swilo swa le tilweni” leswi boxiweke hi Pawulo loko a tsalela Vaefesa swi ta hlengeletiwa “eka Kreste.” Lava i vanhu va nhlayo leyi pimiweke lava hlawuriweke ku fuma na Kreste ematilweni. (1 Petro 1:3, 4) Vakreste lava totiweke va 144 000 va ‘xaviwe emisaveni,’ naswona “va xaviwe evanhwini” leswaku va ta fuma swin’we na Kreste eMfun’weni wakwe wa le tilweni.—Nhlavutelo 5:9, 10; 14:3, 4; 2 Vakorinto 1:21; Vaefesa 1:11; 3:6.
3. Ku nga vuriwa njhani leswaku vatotiwa va ‘tshamisiwa etindhawini ta le tilweni’ kasi va ha ri emisaveni?
3 Vakreste lava totiweke va tswariwa nakambe hi moya lowo kwetsima leswaku va ta va vana va Yehovha va moya. (Yohane 1:12, 13; 3:5-7) Tanihi leswi va vaka “vana” va Yehovha, va va vamakwavo wa Yesu. (Varhoma 8:15; Vaefesa 1:5) Hikwalaho ka sweswo, niloko va ha ri emisaveni ku vuriwa leswaku va ‘pfuxiwile kutani va tshamisiwa swin’we etindhawini ta le tilweni evun’weni na Kreste Yesu.’ (Vaefesa 1:3; 2:6) Va kota ku va exiyin’weni lexi xa moya hikuva va “funghiwile hi moya lowo kwetsima lowu tshembisiweke, lowu wu nga mfungho wa le mahlweni wa ndzhaka [ya vona]” leyi va vekeriweke yona ematilweni. (Vaefesa 1:13, 14; Vakolosa 1:5) Kutani lava hi vona “swilo swa le tilweni,” lava va faneleke va hlengeletiwa, lava nhlayo ya vona leyi heleleke yi vuriweke ka ha ri emahlweni hi Yehovha.
Ku Hlengeleta Ku Sungula
4. Ku hlengeletiwa ka “swilo swa le tilweni” ku sungule rini naswona njhani?
4 Hi ku pfumelelana ni “vukongomisi” kumbe ndlela yo endla swilo ya Yehovha, ku hlengeletiwa ka “swilo swa le tilweni” a ku ta sungula “eku heleni ka minkarhi leyi vekiweke.” (Vaefesa 1:10) Nkarhi wolowo wu sungule hi Pentekosta ya 33 C.E. Hi siku rero vaapostola ni vadyondzisiwa van’wana, vavanuna ni vavasati va amukele moya lowo kwetsima. (Mintirho 1:13-15; 2:1-4) Leswi a ku ri vumbhoni bya leswaku ntwanano lowuntshwa a wu sungula ku tirha, swi komba masungulo ya vandlha ra Vukreste ni tiko lerintshwa ra moya ra Israyele, ku nga “Israyele wa Xikwembu.”—Vagalatiya 6:16; Vaheveru 9:15; 12:23, 24.
5. Ha yini Yehovha a vumbe “tiko” lerintshwa leswaku a siva Vaisrayele va nyama?
5 Ntwanano wa Nawu lowu endliweke na Israyele wa nyama a wu humesanga “mfumo wa vaprista ni tiko ro kwetsima” leri a ri ta fuma etilweni hilaha ku nga heriki. (Eksoda 19:5, 6) Yesu u byele varhangeri va vukhongeri va Vayuda a ku: “Mfumo wa Xikwembu wu ta tekiwa eka n’wina wu nyikiwa tiko leri humesaka mihandzu ya wona.” (Matewu 21:43) Tiko rolero, ku nga Israyele wa moya, ri vumbiwa hi Vakreste lava totiweke lava nghenisiweke eka ntwanano lowuntshwa. Muapostola Petro u tsalele vatotiwa lava a ku: “N’wina mi ‘rixaka leri hlawuriweke, vaprista va vuhosi, tiko ro kwetsima, tiko leri nga nhundzu yo hlawuleka, leswaku mi byi twarisa hinkwako-nkwako vunene’ bya loyi a mi vitaneke mi huma emunyameni mi nghena eku vonakaleni kakwe loku hlamarisaka. Hikuva khale a mi nga ri tiko kambe sweswi mi tiko ra Xikwembu.” (1 Petro 2:9, 10) Vaisrayele va nyama a va nga ha ri vanhu lava Yehovha a endleke ntwanano na vona. (Vaheveru 8:7-13) Hilaha Yesu a profeteke hakona, va tekeriwe lunghelo ro va swirho swa Mfumo wa Mesiya, ri nyikiwa lava 144 000 lava nga swirho swa Israyele wa moya.—Nhlavutelo 7:4-8.
Va Nghenisiwe Eka Ntwanano Wa Mfumo
6, 7. I ntwanano wihi wo hlawuleka lowu Yesu a wu endleke ni vamakwavo va moya, naswona leswi swi vula yini eka vona?
6 Hi vusiku lebyi Yesu a simekeke Xitsundzuxo xa rifu ra yena ha byona, u byele vaapostola va yena vo tshembeka a ku: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina, leswaku mi ta dya ni ku nwa etafuleni ra mina emfun’weni wa mina, kutani mi tshama eswiluvelweni leswaku mi avanyisa tinyimba ta 12 ta Israyele.” (Luka 22:28-30) Laha Yesu a a vulavula hi ntwanano wo hlawuleka lowu a wu endleke ni vamakwavo lava tswariweke hi moya va 144 000, lava nga ta tshama va “tshembekile ku ya fikela eku feni” kutani va tikombisa leswaku i ‘vahluri.’—Nhlavutelo 2:10; 3:21.
7 Vanhu volavo va nhlayo leyi pimiweke va heleriwa hi lunghelo ro hanya emisaveni hilaha ku nga heriki va ri vanhu va nyama ni ngati. Va ta fuma na Kreste etilweni, va tshame eswiluvelweni va avanyisa vanhu. (Nhlavutelo 20:4, 6) Sweswi a hi kambisiseni matsalwa man’wana lama kombetelaka eka vatotiwa ntsena ni lawa ma kombaka leswaku ha yini “tinyimpfu tin’wana” ti nga hlanganyeli eku dyeni ka swifanekiselo swa Xitsundzuxo.—Yohane 10:16.
8. Xana vatotiwa va kombisa yini hi ku dya xinkwa? (Vona bokisi eka tluka 23.)
8 Vatotiwa va xaniseka hilaha Kreste a xanisekeke hakona, naswona va tiyimiserile ku fa rifu ro fana ni ra Yesu. Tanihi un’wana wa vatotiwa volavo, Pawulo u vule leswaku a a tiyimiserile ku titsona hinkwaswo leswaku a ta ‘kuma Kreste leswaku a tiva yena ni matimba ya ku pfuka ka yena eka lava feke ni ku hlanganyela eku xanisekeni ka yena.’ Ina, Pawulo a a tiyimiserile ku tinyiketela eka “rifu ro fana ni ra yena.” (Vafilipiya 3:8, 10) Vakreste vo tala lava totiweke va tiyiserile emimirini ya vona ya nyama “ku khomiwa hi ndlela leyi dlayaka leyi Yesu a khomiweke ha yona.”—2 Vakorinto 4:10.
9. Hi wihi miri lowu fanekiselaka hi xinkwa xa Xitsundzuxo?
9 Loko a simeka Xilalelo xa Hosi, Yesu u te: “Leswi swi vula miri wa mina.” (Marka 14:22) A a vula miri wa yena wa xiviri lowu ku nga ri khale a wu ta fumbuteriwa ni ku xiririka ngati. Xinkwa xo ke comela a xi wu fanekisela kahle miri wa yena. Hikwalaho ka yini? Hikuva eBibeleni, comela ri nga yimela xidyoho kumbe vuhomboloki. (Matewu 16:4, 11, 12; 1 Vakorinto 5:6-8) Yesu a a hetisekile, naswona miri wa yena wa nyama a wu ri hava xidyoho. Naswona a a ta nyikela miri wolowo lowu hetisekeke tanihi xitlhavelo xo vuyelelana. (Vaheveru 7:26; 1 Yohane 2:2) Hi ku endla tano a a ta pfuna Vakreste hinkwavo lava tshembekeke, ku nga khathariseki leswaku va ni ntshembo wo hanya etilweni kumbe wo hanya emisaveni leyi nga paradeyisi.—Yohane 6:51.
10. Lava nwaka vhinyo ya Xitsundzuxo va “hlanganyela engatini ya Kreste” hi ndlela yihi?
10 Mayelana ni vhinyo leyi Vakreste lava totiweke va yi nwaka eXitsundzuxweni, Pawulo u tsarile: “Xinwelo xa nkateko lexi hi xi katekisaka, xana a hi ku hlanganyela engatini ya Kreste?” (1 Vakorinto 10:16) Xana lava va nwaka vhinyo va “hlanganyela engatini ya Kreste” hi ndlela yihi? Leswi a swi vuli leswaku va ni xiyenge eku nyikeleni ka nkutsulo hikuva na vona va lava ku ntshunxiwa evuhlongeni bya xidyoho. Hikwalaho ka ripfumelo ra vona engatini leyi ponisaka ya Kreste, swidyoho swa vona swi rivaleriwile naswona va vuriwa lava lulameke leswaku va ya hanya etilweni. (Varhoma 5:8, 9; Tito 3:4-7) Hikwalaho ka ngati ya Kreste leyi halatiweke, vadyandzhaka-kulobye na Kreste va 144 000 va ‘kwetsimisiwile’ va hambanisiwa, va hlantswiwa swidyoho leswaku va ta va “vakwetsimi.” (Vaheveru 10:29; Daniyele 7:18, 27; Vaefesa 2:19) Ina, hi ngati yakwe leyi halatiweke, Kreste u “xavele Xikwembu vanhu lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo naswona u va endle va va mfumo ni vaprista eka Xikwembu xa hina, va ta va tihosi emisaveni.”—Nhlavutelo 5:9, 10.
11. Vatotiwa va kombisa yini hi ku nwa vhinyo ya Xitsundzuxo?
11 Loko Yesu a simeka Xitsundzuxo xa rifu rakwe, u nyike vadyondzisiwa va yena xinwelo xa vhinyo kutani a ku: “Nwanani eka xona, hinkwenu ka n’wina; hikuva leswi swi vula ‘ngati ya ntwanano’ ya mina, leyi nga ta halateriwa vo tala leswaku va rivaleriwa swidyoho.” (Matewu 26:27, 28) Tanihi leswi ngati ya tinkuzi ni timbuti a yi endla leswaku ntwanano wa Nawu wu tiya exikarhi ka Xikwembu ni tiko ra Israyele, ngati ya Yesu yi tiyise ntwanano lowuntshwa lowu Yehovha a a ta wu endla ni Israyele wa moya, ku sukela hi Pentekosta ya 33 C.E. (Eksoda 24:5-8; Luka 22:20; Vaheveru 9:14, 15) Hi ku nwa vhinyo leyi yimelaka “ngati ya ntwanano” vatotiwa va kombisa leswaku va amukela ntwanano lowuntshwa naswona va amukela ni mbuyelo wa wona.
12. Xana vatotiwa va khuvuriwa eka rifu ra Kreste hi ndlela yihi?
12 Vatotiwa va tlhela va tsundzuxiwa mhaka yin’wana. Yesu u byele vadyondzisiwa vakwe vo tshembeka a ku: “Xinwelo lexi ndzi xi nwaka mi ta xi nwa, ni nkhuvulo lowu ndzi khuvuriwaka ha wona mi ta khuvuriwa ha wona.” (Marka 10:38, 39) Muapostola Pawulo u vulavule hi Vakreste tanihi lava va “khuvuriwe[ke] eka rifu ra [Kreste].” (Varhoma 6:3) Vatotiwa va hanya vutomi bya ku tinyiketela. Rifu ra vona i ra ku tinyiketela hikuva va tshika ntshembo wa vutomi lebyi nga heriki emisaveni. Ku khuvuriwa ka Vakreste lava totiweke hi rifu ra Kreste ku hetisisiwa loko va fa va tshembekile, kutani va pfuxiwa tanihi swivumbiwa swa moya leswaku va ta va “tihosi swin’we” na Kreste etilweni.—2 Timotiya 2:10-12; Varhoma 6:5; 1 Vakorinto 15:42-44, 50.
Ku Dya Swifanekiselo
13. Ha yini lava nga ni ntshembo wo hanya emisaveni va nga dyi swifanekiselo swa Xitsundzuxo, kambe ha yini va va kona eXitsundzuxweni?
13 Tanihi leswi ku dya xinkwa ni ku nwa vhinyo hi nkarhi wa Xitsundzuxo swi katsaka hinkwaswo leswi ku buriweke hi swona laha, swi le rivaleni leswaku a swi nge faneleki leswaku lava va nga ni ntshembo wo hanya emisaveni va dya swifanekiselo leswi. Lava va nga ni ntshembo wo hanya emisaveni va swi twisisa leswaku a hi swirho leswi totiweke swa miri wa Kreste, nakambe a va katseki eka ntwanano lowuntshwa lowu Yehovha a wu endleke ni lava va nga ta fuma na Yesu Kreste. Leswi “xinwelo” xi yimelaka ntwanano lowuntshwa, swifanekiselo swi dyiwa ntsena hi lava va katsekaka eka ntwanano lowuntshwa. Lava va nga ni ntshembo wo hanya vutomi lebyi nga heriki emisaveni tanihi vanhu lava hetisekeke ehansi ka Mfumo a va khuvuriwi eka rifu ra Yesu naswona a va rhambiwanga ku ya fuma na yena etilweni. Loko vo dya swifanekiselo leswi, swi nga kombisa leswaku va endla nchumu lowu hoxeke. Hikwalaho, a va dyi, hambileswi va vaka kona eXitsundzuxweni tanihi vahlaleri lava xiximaka. Va tlangela hinkwaswo leswi Yehovha a va endleleke swona hi ku tirhisa N’wana wa yena ku katsa ni ku kuma ndzivalelo exisekelweni xa ngati ya Kreste leyi halatiweke.
14. Xana vatotiwa va tiyisiwa njhani emoyeni loko va dya xinkwa ni ku nwa vhinyo?
14 Ku funghiwa ko hetelela ka nhlayo leyitsongo ya Vakreste lava nga ta fuma na Kreste etilweni ku le kusuhi ni ku hela. Vatotiwa va tiyisiwa emoyeni hi ku dya swifanekiselo swa Xitsundzuxo, kukondza va heta vutomi bya vona bya laha misaveni, lebyi va nga ta byi nyikela. Tanihi swirho swa miri wa Kreste, va titwa va ri ni vun’we ni vatotiwa-kulobye. Ku dya ka vona xinkwa ni vhinyo yo fanekisela swi va tsundzuxa vutihlamuleri bya vona bya leswaku va fanele ku tshembeka ku fikela eku feni.—2 Petro 1:10, 11.
Ku Hlengeleta “Swilo Swa Le Misaveni”
15. I vamani lava hlengeletiwaka lava seketelaka Vakreste lava totiweke?
15 Ku sukela exikarhi ka va-1930, nhlayo leyi kulaka ya “tinyimpfu tin’wana,” leti nga riki xiphemu xa “ntlhambinyana” naswona leti ntshembo wa tona ku nga vutomi lebyi nga heriki emisaveni, ti seketele vatotiwa. (Yohane 10:16; Luka 12:32; Zakariya 8:23) Ti hundzuke vanghana vo tshembeka va vamakwavo wa Kreste, ti va pfuneta swinene eku chumayeleni ka “mahungu lamanene lawa ya mfumo” leswaku byi va vumbhoni ematikweni hinkwawo. (Matewu 24:14; 25:40) Hi ku endla tano ti tiendla ti fanelekela leswaku Kreste a ti teka tanihi “tinyimpfu” ta yena, leti a nga ta tiveka “evokweni [rakwe] ra xinene,” a ti amukela loko a avanyisa matiko. (Matewu 25:33-36, 46) Hi ripfumelo engatini ya Kreste, ti ta vumba “ntshungu lowukulu” lowu nga ta pona “nhlomulo lowukulu.”—Nhlavutelo 7:9-14.
16. “Swilo swa le misaveni” swi ta katsa vamani, naswona xana swi ta kotekisa ku yini leswaku hinkwavo va va “vana va Xikwembu”?
16 Ku funghiwa ko hetelela ka lava 144 000 ku ta vula leswaku “timheho” ta misava ti ta tshikiwa leswaku ku lovisiwa xiyimiso xa mafambiselo ya Sathana yo homboloka laha misaveni. (Nhlavutelo 7:1-4) Hi nkarhi wa Gidi ra Malembe ra ku fuma ka Kreste ni vaprista-kulobye lava nga tihosi, ntshungu lowukulu wu ta hlangana ni nhlayo leyikulu ya lava va nga ta pfuxiwa eku feni. (Nhlavutelo 20:12, 13) Va ta va ni lunghelo ro va malandza ya la misaveni ya Hosi leyi nga Mesiya, Kreste Yesu hilaha ku nga heriki. Eku heleni ka Mfumo wa Gidi ra malembe, hinkwaswo “swilo swa le misaveni” swi ta langutana ni ndzingo wo hetelela. Lava va nga ta kombisa ku tshembeka va ta va “vana va Xikwembu” va le misaveni.—Vaefesa 1:10; Varhoma 8:21; Nhlavutelo 20:7, 8.
17. Xana swikongomelo swa Yehovha swi ta hetisisiwa njhani?
17 Hikwalaho, hi ku tirhisa “vukongomisi” byakwe lebyi tlhariheke hi ku helela kumbe ndlela ya yena yo lawula swilo, Yehovha u ta va a hetisise xikongomelo xa yena xo “hlengeleta swilo hinkwaswo nakambe eka Kreste, swilo swa le tilweni ni swilo swa le misaveni.” Swivumbiwa hinkwaswo swo tlhariha etilweni ni le misaveni swi ta va swi hlanganisiwe hi ku rhula, swi titsongahatela vuhosi bya Muhetisisi Lonkulu wa Swikongomelo, Yehovha.
18. Xana vatotiwa ni vanghana va vona va ta pfuneka njhani hi ku va kona eXitsundzuxweni?
18 Swi ta va swi tiyisa ripfumelo hakunene, eka masalela ya vatotiwa ni vanghana va vona va tinyimpfu tin’wana ta timiliyoni loko va hlengeletana hi April 12, 2006! Va ta tlangela Xitsundzuxo xa rifu ra Kreste hilaha Yesu hi byakwe a vuleke hakona a ku: “Tshamani mi ri karhi mi endla leswi leswaku mi ndzi tsundzuka.” (Luka 22:19) Hinkwavo lava nga ta va kona va fanele va tsundzuka leswi Yehovha a va endleleke swona hi ku tirhisa N’wana wakwe la rhandzekaka, Kreste Yesu.
Mpfuxeto
• Hi xihi xikongomelo xa Yehovha hi swilo leswi nga le matilweni ni swilo leswi nga le misaveni?
• I vamani “swilo swa le matilweni,” naswona va hlengeletiwa njhani?
• I vamani “swilo swa le misaveni,” naswona hi wihi ntshembo lowu va nga na wona?
[Swivutiso Swa Dyondzo]
[Bokisi leri nga eka tluka 23]
“Miri Wa Kreste”
Eka 1 Vakorinto 10:16, 17, loko Pawulo a hlamusela ntikelo wo karhi wa xinkwa eka vamakwavo va Kreste lava totiweke, u vulavule hi “miri” hi ndlela yo hlawuleka. U te: “Xinkwa lexi hi xi phemaka, xana a hi ku hlanganyela emirini wa Kreste? Hikwalaho ka leswi ku nga ni xinkwa xin’we, hina, hambileswi hi nga tala, hi miri wun’we, hikuva hinkwerhu hi dya xinkwa xexo xin’we.” Loko Vakreste lava totiweke va dya xinkwa xa Xitsundzuxo, va twarisa vun’we bya vona ni vandlha ra lava totiweke, leri fanaka ni miri lowu Nhloko ya kona ku nga Kreste.—Matewu 23:10; 1 Vakorinto 12:12, 13, 18.
[Swifaniso leswi nga eka tluka 23]
Hikwalaho ka yini ku ri vatotiwa ntsena lava dyaka xinkwa ni ku nwa vhinyo?
[Xifaniso lexi nga eka tluka 25]
Hi ku tirhisa vukongomisi bya Yehovha, swivumbiwa hinkwaswo swa le tilweni ni le misaveni swi ta va ni vun’we