Xana Ha N’wi Lava Mesiya?

U NGA ha vutisa xivutiso lexi, “Xana ha n’wi lava Mesiya?” Phela, swi nga ha fanela ku lava ku tiva loko yi ri kona ndlela leyi Mesiya a nga ta ku pfuna ha yona.

Van’wana lava swi nga ha endlekaka u xixima vonelo ra vona va ta ku tiyisekisa leswaku nhlamulo yi lo dla, erivaleni: Kunene wa n’wi lava Mesiya, tanihi leswi ni vanhu van’wana va n’wi lavaka. Mutivi wa nawu wa Vayuda wa lembe-xidzana ro sungula u tsale leswi malunghana na Mesiya: “Ku nga khathariseki leswaku switshembiso swa Xikwembu swi tarise ku yini, swi ve Ina ha yena.” Xisweswo u kandziyise ndzima leyi Mesiya a yi hetisisaka exikongomelweni xa Muvumbi wa hina xa ku katekisa matiko hinkwawo ya misava. (2 Vakorinto 1:20) Ntirho wa Mesiya i wa nkoka ngopfu lerova ku fika kakwe ni vutomi byakwe ku buriwe ngopfu ha swona evuprofeteni bya Bibele. Ebukwini leyi tirhisiweke hi vanhu va timiliyoni emalembeni lama tlulaka 70 lama hundzeke, Henry H. Halley u tiyisekisile: “Testamente ya Khale yi tsaleriwe ku endla leswaku vanhu va langutela [Mesiya] la Taka, yi tlhela yi n’wi pfulela ndlela.” Kambe, xana a swi ri swa nkoka leswaku a ta? Ha yini u fanele u karhateka?

Rito leri nge “Mesiya” entiyisweni ri vula “Mutotiwa” naswona ra fana ni rito leri dumeke leri nge “Kreste.” Yena loyi, loyi Encyclopædia Britannica, Nkandziyiso wa 1970 yi kombeteleke eka yena tanihi “mukutsuri lonkulu ngopfu,” a a fanele a ta hikwalaho ka swiendlo leswi hoxeke swa mpatswa wo sungula wa vanhu, ku nga Adamu na Evha. Va vumbiwe va hetisekile, va ri ni ntshembo lowu tsakisaka wo hanya hilaha ku nga heriki eParadeyisini, kambe va lahlekeriwe hi ntshembo wolowo. Ntsumi leyi xandzukeke, leyi tiviweke tanihi Sathana Diyavulosi, yi ringanyete leswaku Muvumbi wa vona a a ri ni milawu yo tala nileswaku a swi ta va fambela kahle loko vo tiendlela xiboho malunghana ni leswinene ni leswo biha.—Genesa 3:1-5.

Evha u kanganyisiwile kutani a kholwa mavunwa wolawo. Adamu, loyi swi vonakaka onge u teke vuxaka byakwe ni nsati wakwe byi ri bya nkoka ku tlula ku tshembeka eka Xikwembu, na yena u hlanganyerile eka ku xandzuka koloko ku sunguriweke hi Diyavulosi. (Genesa 3:6; 1 Timotiya 2:14) Va lahlekeriwe hi ntshembo wa ku hanya hilaha ku nga heriki emisaveni ya paradeyisi hikwalaho ka leswi va swi endleke. Va hundzisele ndzhaka ya xidyoho ni vuyelo bya xona, ku nga rifu, eka vana va vona lava a va nga si tswariwa.—Varhoma 5:12.

Muvumbi wa hina, ku nga Yehovha, xikan’we-kan’we u hlawule nchumu lowu a nga ta wu tirhisa ku herisa swiendlakalo swo biha leswi a swi ta landzelelana hikwalaho ka ku xandzuka loku. A a ta veka xisekelo xa ndzivalelano hi ku tirhisa leswi hi ku famba ka nkarhi a swi ta va xisekelo xa nsinya wa nawu lowu kumekaka eNawini wa Muxe—nchumu wu fanele wu rihiwa hi lowu wu ringanaka na wona. (Deteronoma 19:21; 1 Yohane 3:8) A ku fanele ku landzeriwa nsinya lowu wa nawu loko vana va Adamu na Evha lava a va ri  ekhombyeni va fanele va kuma vutomi lebyi nga heriki emisaveni ya paradeyisi, tanihi leswi a ku ri xikongomelo xa Muvumbi hi ndyangu wa vanhu. Leswi swi hi yisa eka Mesiya.

Loko a gweva Diyavulosi, Yehovha Xikwembu u vule leswi evuprofeteni byo sungula bya Bibele: “Ndzi ta veka vulala exikarhi ka wena ni wansati ni le xikarhi ka mbewu ya wena ni mbewu ya yena. Yi ta ku pfotlosa nhloko kutani wena u ta yi luma xirhendze.” (Genesa 3:15) Xidyondzi xin’wana xa Bibele xi vule leswaku “mhaka ya switshembiso swa mesiya hilaha Matsalwa ma yi andlalaka hakona yi sungula hi marito [lawa].” Xin’wana xi vule leswaku Mesiya i xitirho lexi Xikwembu xi nga ta xi tirhisa ku “sula xidyoho xa vanhu vo sungula,” kutani xi tisela vanhu mikateko.—Vaheveru 2:14, 15.

Kambe, wa swi vona leswaku vanhu a va katekisiwanga sweswi. Ematshan’weni ya sweswo, vanhu va heleriwe hi ntshembo naswona va ni gome lerikulu. Hikwalaho, The World Book Encyclopedia yi vula leswaku “Vayuda vo tala va ha rindzele leswaku Mesiya a ta” nileswaku “u ta lulamisa leswi hoxeke kutani a hlula valala va vanhu.” Hambiswiritano, Bibele yi vula leswaku Mesiya ana se u tile. Xana xi kona xivangelo xo kholwa leswi Bibele yi swi vulaka? Xihloko lexi landzelaka xi ta hlamula.