“Hi Byele Leswi Engetelekeke!”

LE Nezlobnaya, eRussia, swichudeni swa le xikolweni xa sekondari a swi ri karhi swi dyondza tibuku ta mutsari wa le Russia la vuriwaka Mikhail Bulgakov. Eka tibuku teto a ku ri ni xibukwana lexi tsongahataka Yesu Kreste, kasi hi hala tlhelo xi vula leswaku Sathana i nghwazi. Endzhaku ko dyondza hi mhaka leyi, mudyondzisi u tsarise swichudeni xikambelo lexi sekeriweke exibukwanini xexo. Hambiswiritano, xichudeni xin’wana xa malembe ya 16 lexi nga Mbhoni ya Yehovha lexi vuriwaka Andrey, hi moya wo rhula xi kombele ku ka xi nga tsali xikambelo lexi, hikuva ripfalo ra xona a ri nga xi pfumeleli ku hlaya xibukwana xo tano. Kambe xi kombele ku tsala xitsalwana lexi hlamuselaka ndlela leyi a xi n’wi teka ha yona Yesu Kreste. Mudyondzisi u pfumerile.

Eka xitsalwana xa yena, Andrey u hlamusele leswaku hambileswi a xiximaka langutelo ra van’wana, u kume leswaku ndlela yo antswa yo dyondza hi Yesu i ku hlaya yin’wana ya Tievhangeli ta mune. Loko u endla tano, “u ta dyondza hi vutomi bya Yesu na hi tidyondzo ta yena leti sekeriweke eka swiviko swa timbhoni leti swi voneke hi mahlo.” Andrey u engeterile: “Mhaka yin’wana leyi ndzi karhataka i ndlela leyi Sathana a hlamuseriweke ha yona. Van’wana swi nga va tsakisa ku hlaya xibukwana lexi hlamuselaka leswaku Sathana i nghwazi, kambe mina a swi ndzi tsakisi.” U hlamusele leswaku kahle-kahle Sathana i xivumbiwa xa moya xo homboloka, xa matimba, lexi xandzukeleke Xikwembu, lexi vangaka vuhomboloki ni nhlomulo, naswona xi endla leswaku vanhu va xaniseka. Andrey u gimete xitsalwana xakwe a ku: “A ndzi pfumeli leswaku swi nga ndzi pfuna ku hlaya xibukwana lexi. Entiyisweni, a ndzi lwisani na yena Bulgakov loyi a xi tsaleke. Kambe mina swi nga antswa ndzi hlaya Bibele leswaku ndzi dyondza matimu ya ntiyiso hi ta Yesu Kreste.”

Mudyondzisi wa Andrey a a tsake ngopfu hikwalaho ka xitsalwana xexo lerova u n’wi kombele leswaku a lunghiselela xiviko xa malunghana na Yesu Kreste lexi a nga ta xi hlaya kunene emahlweni ka vayingiseri. Andrey u pfumerile. Hi nkarhi wo hlaya swibukwana lowu landzeleke, Andrey u hlaye xiviko xakwe emahlweni ka tlilasi hinkwayo. U hlamusele leswaku ha yini a teka Yesu a ri nghwazi leyi tshameke yi hanya. Kutani u hlaye ndzima leyi vulavulaka hi ta rifu ra Yesu ebukwini ya Bibele ya Matewu. Leswi nkarhi lowu vekiweke wa xiviko a wu hela, Andrey u lave ku xi gimeta, kambe vadyondzi-kulobye va te: “Hi byele leswi engetelekeke! Xana ku landzele yini?” Kutani u ye emahlweni a hlaya rungula ra Matewu leri vulavulaka hi ta ku pfuxiwa ka Yesu.

Loko Andrey a hetile, vadyondzi-kulobye va n’wi vutise swivutiso swo tala hi ta Yesu na Yehovha. Andrey u ri: “Ndzi kombele vutlhari eka Yehovha naswona u hlamule xikhongelo xa mina. Ndzi kote ku hlamula swivutiso swa vona hinkwaswo!” Loko nkarhi wo hlaya swibukwana wu herile, Andrey u nyike mudyondzisi wakwe kopi ya buku leyi nge Nghwazi Leyi Tshameke Yi Hanya, * leyi a yi amukeleke hi mandla mambirhi. Andrey u ri: “Mudyondzisi u ndzi nyike timaraka to tala hikwalaho ka xiviko xa mina naswona u ndzi bumabumerile hikwalaho ko va ni xivindzi xo yimela vupfumeri bya mina. Nakambe u vule leswaku na yena u pfumela eka tin’wana ta tidyondzo ta hina.”

Andrey wa tsaka leswi a endleke xiboho xo landzela ripfalo rakwe leri leteriweke hi Bibele hi ku ka a nga hlayanga rungula leri tsongahataka Yehovha ni N’wana wa yena, Yesu Kreste. Sweswo swi n’wi sirhelele eka malangutelo lama kanetanaka ni Matsalwa swi tlhela swi n’wi pfulela ndlela leyinene yo chumayela van’wana tidyondzo ta nkoka ta Bibele.

[Nhlamuselo ya le hansi]