Swivutiso Swa Vahlayi

Xana muapostola Pawulo a a vula yini loko a hlamusela leswaku vavasati a va “tshame va miyerile emavandlheni”?

Pawulo u tsalele Vakreste evandlheni ra le Korinto a ku: “Tanihi le mavandlheni hinkwawo ya vakwetsimi, vavasati a va tshame va miyerile emavandlheni, hikuva a swi pfumeleriwi leswaku va vulavula.” (1 Vakorinto 14:33, 34) Leswaku hi yi twisisa kahle mhaka leyi, i swa nkoka ku kambisisa mongo wa ndzayo ya Pawulo.

Eka Vakorinto vo Sungula ndzima 14, Pawulo u vulavule hi timhaka leti khumbaka minhlangano ya le vandlheni ra Vukreste. U hlamusele leswi ku faneleke ku buriwa hi swona eminhlanganweni yo tano naswona u kombise ndlela leyi yi faneleke ku khomiwa ha yona. (1 Vakorinto 14:1-6, 26-34) Ku tlula kwalaho, u kandziyise xikongomelo xa minhlangano ya Vukreste—“leswaku vandlha ri ta akiwa.”—1 Vakorinto 14:4, 5, 12, 26.

Xileriso xa Pawulo xa leswaku a va “tshame va miyerile” xi humelela kanharhu eka Vakorinto vo Sungula ndzima 14. Xin’wana ni xin’wana a xi kongomisiwa eka ntlawa lowu hambaneke evandlheni, kambe hinkwaswo a swi nyikeriwa hi xivangelo xin’we xa leswaku “swilo hinkwaswo [swi endliwa] hi ku tenga ni hi ku hleleka.”—1 Vakorinto 14:40.

Xo sungula, Pawulo u te: “Loko ku ri ni loyi a vulavulaka hi ririmi rimbe, va nga tluli vambirhi kumbe vanharhu, nakambe a va siyerisane; kutani un’wana a a hundzuluxele. Kambe loko muhundzuluxeri a nga ri kona, a a miyele evandlheni a vulavulela embilwini ni ku vulavula ni Xikwembu.” (1 Vakorinto 14:27, 28) Sweswo a swi nga vuli leswaku munhu wo tano a a nga fanelanga a vulavula hi ku helela eminhlanganweni kambe a ku ri ni minkarhi leyi a faneleke ku miyela ha yona. Entiyisweni, xikongomelo xa minhlangano i ku aka van’wana, kambe sweswo a swi nga ta koteka loko a vulavula hi ririmi leri nga twisisiwiki hi munhu.

Xa vumbirhi, Pawulo u te: “A ku vulavule vaprofeta vambirhi kumbe vanharhu, naswona lavan’wana a va twisise nhlamuselo ya kona. Kambe loko un’wana a ri ni nhlavutelo loko a ha tshame kwalaho, lowo sungula a a miyele.” Leswi a swi nga vuli leswaku muprofeta lowo sungula a a fanele a papalata ku vulavula eminhlanganweni,  kambe a a fanele ku miyela minkarhi yin’wana. Kutani la nga ni nhlavutelo ya singita a a fanele ku vulavula ni vandlha, leswi a swi ta endla leswaku nhlangano lowu wu hetisisa xikongomelo xa wona—ku nga leswaku “hinkwavo va khutaziwa.”—1 Vakorinto 14:26, 29-31.

Xa vunharhu, Pawulo u kongomise mhaka yakwe eka vavasati va Vakreste ntsena, a ku: “Vavasati a va tshame va miyerile emavandlheni, hikuva a swi pfumeleriwi leswaku va vulavula, kambe a va titsongahate.” (1 Vakorinto 14:34) Ha yini Pawulo a nyike vavasati xileriso lexi? Leswaku ku va ni ku hleleka evandlheni. U te: “Kutani loko va lava ku dyondza swo karhi, a va vutise vanuna va vona ekaya, hikuva swa nyumisa leswaku wansati a vulavula evandlheni.”—1 Vakorinto 14:35.

Kumbexana vamakwerhu van’wana va xisati a va kaneta leswi vuriwaka evandlheni. Ndzayo ya Pawulo yi pfune vamakwerhu va xisati leswaku va papalata moya wolowo wa hasahasa, kutani hi ku titsongahata va amukela xikhundlha xa vona ehansi ka lunghiselelo ra Yehovha ra vunhloko, ngopfu-ngopfu eka vanuna va vona. (1 Vakorinto 11:3) Ku engetela kwalaho, hi ku tshama va miyerile, vamakwerhu va xisati va kombisa leswaku a va lavi ku va vadyondzisi evandlheni. Loko a tsalela Timotiya, Pawulo u kombise leswaku a hi swi swinene leswaku wansati a lava ntirho wa ku va mudyondzisi evandlheni: “A ndzi n’wi pfumeleli wansati leswaku a dyondzisa, kumbe ku lawula wanuna, kambe a a miyele.”—1 Timotiya 2:12.

Xana sweswo swi vula leswaku wansati wa Mukreste a nga fanelanga a vulavula hi nkarhi wa nhlangano evandlheni? Doo! Enkarhini wa Pawulo a ku ri ni minkarhi leyi vavasati va Vakreste, kumbexana hi ku susumetiwa hi moya wo kwetsima, a va khongela kumbe va profeta evandlheni. Eka swiendlakalo swo tano, a va tifunengeta tinhloko va kombisa leswaku va xi lemuka xikhundlha xa vona. * (1 Vakorinto 11:5) Ku tlula kwalaho, enkarhini wa Pawulo ni namuntlha, vamakwerhu va xisati swin’we ni va xinuna va khutaziwa ku twarisa ntshembo wa vona erivaleni. (Vaheveru 10:23-25) Ku engetela eka vutirheli bya vona bya le nsin’wini, vamakwerhu va xisati va twarisa ntshembo wa vona naswona va khutaza van’wana hi nkarhi wa minhlangano ya vandlha hi ku nyikela tinhlamuselo leti rhangeke ti gayeriwa kahle loko va komberiwe ku endla tano, ni hi ku amukela swiavelo swo endla minkombiso kumbe ku nyikela tinkulumo ta xikolo.

Hikwalaho, vavasati va Vakreste va ‘tshama va miyerile’ hi ku papalata ku lava mintirho leyi endliwaka hi va xinuna kun’we ni hi ku lava ku dyondzisa evandlheni. A va pfuxi swivutiso swa ku tlhontlha vulawuri bya lava dyondzisaka. Hi ku hetisisa mintirho ya vona evandlheni, vamakwerhu va xisati va hoxa xandla swinene eku kondleteleni ka ku rhula, leswaku ‘swilo hinkwaswo eminhlanganweni ya vandlha swi endleriwa ku aka.’—1 Vakorinto 14:26, 33.

[Nhlamuselo ya le hansi]