I Yini Lexi Nga Ta Ku Pfuna Ku Twisisa Bibele?

“SWILO leswi u va fihlele hi vukheta lavo tlhariha ni lava va nga ni ku twisisa, kutani u swi hlavutele swihlangi.” (Luka 10:21) Marito wolawo lawa Yesu a a ma kongomisa eka Tata wakwe wa le tilweni ma kombisa leswaku loko hi lava ku twisisa Bibele, hi fanele ku va ni langutelo lerinene. Vutlhari bya Yehovha byi kombisiwa hileswi a hi nyikeke buku leyi nga twisisiwaka ntsena hi vanhu lava titsongahataka, lava rhandzaka ku dyondzisiwa.

Vunyingi bya hina swa hi nonon’hwela ku titsongahata. Hinkwerhu hi velekiwe hi ri ni mboyamelo wa ku tikurisa. Ku tlula kwalaho, hi hanya “emasikwini yo hetelela” exikarhi ka vanhu “lava tirhandzaka, . . . lava omeke tinhloko, lava tikukumuxaka hi ku tinyungubyisa.” (2 Timotiya 3:1-4) Mimboyamelo leyi hi yona yi hi sivelaka ku twisisa Rito ra Xikwembu. Lexi vavisaka, hinkwerhu hi kuceteriwa hi ndlela yo karhi hi langutelo ra vanhu lava tikurisaka lava hi hanyaka na vona. Hikwalaho, xana u nga ri kuma njhani langutelo leri lavekaka leswaku u twisisa Bibele?

Ku Lunghiselela Mbilu Ni Mianakanyo

Ezra loyi a a ri murhangeri wa khale wa vanhu va Xikwembu, u “lunghiselele mbilu yakwe leswaku yi kambisisa nawu wa Yehovha.” (Ezra 7:10) Xana yi kona ndlela leyi hi nga lunghiselelaka mbilu ya hina ha yona? Ina. Hi nga sungula hi ku va ni langutelo lerinene hi Matsalwa. Muapostola Pawulo u tsalele Vakreste-kulobye a ku: “Loko mi amukela rito ra Xikwembu, leri mi ri tweke eka hina, mi ri amukerile, ku nga ri kukotisa rito ra vanhu, kambe, mi ri amukele hilaha ri nga hakona hakunene rito ra Xikwembu.” (1 Vatesalonika 2:13) Hambileswi vanhu va tirhisiweke ku tsala Matsalwa, leswi va swi tsaleke a swi huma eka Yehovha. Loko hi xiya mhaka yoleyo ya nkoka swi ta hi pfuna leswaku hi swi amukela swinene leswi hi swi hlayaka.—2 Timotiya 3:16.

Ndlela yin’wana yo lunghiselela mbilu ya hina i ku khongela. Leswi Bibele yi huhuteriweke hi moya lowo kwetsima, moya wolowo wu nga tlhela wu hi pfuna ku yi twisisa. Hi fanele hi khongela leswaku hi kuma mpfuno wolowo. Xiya ndlela leyi mupisalema a khumbekeke ha yona hi mhaka leyi, lerova a tsala a ku: “Ndzi endle ndzi twisisa, leswaku ndzi ta hlayisa nawu wa wena leswaku ndzi ta wu hlayisa hi mbilu ya mina hinkwayo.” (Pisalema 119:34) A hi fanelanga hi khongelela ku kuma vutlhari byo twisisa leswi tsariweke ntsena, kambe ni leswaku mbilu ya hina yi amukela leswi Bibele yi swi vulaka. Leswaku hi twisisa Bibele, hi fanele hi amukela leswi nga ntiyiso.

Loko u ri karhi u anakanyisisa leswaku u va ni langutelo lerinene, xiya ndlela leyi ku dyondza Bibele swi nga ku pfunaka ha yona. Hi ni swivangelo swo tala leswinene swo hlaya Rito ra Xikwembu, kambe xa nkoka swinene ku tlula hinkwaswo hileswi ri hi pfunaka ku tshinela eka Xikwembu.  (Yakobo 4:8) Loko hi ri karhi hi hlaya ndlela leyi Yehovha a angulaka ha yona eka swiyimo swo hambana-hambana, ndlela leyi a va tlangelaka ha yona lava n’wi rhandzaka, ni ndlela leyi a angulaka ha yona eka lava n’wi fularhelaka, hi dyondza leswaku i munhu wa muxaka muni. Xikongomelo-nkulu xa hina xo hlaya Bibele ku fanele ku va ku lava ku tiva Xikwembu ku antswa kutani hi tiyisa vuxaka bya hina na xona.

Leswi Nga Ku Sivelaka Ku Va Ni Langutelo Lerinene

I yini leswi nga hi sivelaka ku twisisa Rito ra Xikwembu? Xihinga xin’wana i ku tshemba vanhu lava hoxeke. Hi xikombiso, u nga ha namarhela tidyondzo ni mavonelo ya vanhu van’wana va swiyimo swa le henhla. Kambe, ku vuriwa yini loko vanhu volavo va nga namarheli ntiyiso wa Rito ra Xikwembu kumbe va nga wu teki wu ri wa nkoka? Eka swiyimo swo tano, swi nga tika ku twisisa leswi Bibele yi swi dyondzisaka hakunene. Xisweswo, Bibele yi hi khutaza leswaku hi swi kambisisa kahle leswi hi dyondzisiweke swona.—1 Vatesalonika 5:21.

Mariya mana wa Yesu u langutane ni ntlhontlho wo tano. U kurisiwe hi ndhavuko wa Xiyuda. A a wu namarhela swinene Nawu wa Muxe naswona handle ko kanakana a a ya esinagogeni. Endzhakunyana u swi xiyile leswaku ndlela yo gandzela leyi a a dyondzisiwe yona hi vatswari vakwe a yi nga ha amukeleki eka Xikwembu. Hikwalaho ka sweswo, Mariya u amukele tidyondzo ta Yesu naswona a a ri un’wana wa swirho swo sungula swa vandlha ra Vukreste. (Mintirho 1:13, 14) Sweswo a swi nga kombisi leswaku u delela vatswari vakwe kumbe mindhavuko ya vona; kambe a a kombisa leswaku u rhandza Xikwembu. Loko hi lava ku pfuniwa hi Bibele, hina ku fana na Mariya, hi fanele hi tshembeka eka Xikwembu ku ri ni munhu wihi ni wihi un’wana.

Lexi vavisaka, vanhu vo tala a va na mhaka ni ntiyiso wa Bibele. Van’wana va tiyimisele ku landzela mindhavuko ya vukhongeri leyi sekeriweke eka mavunwa. Van’wana va kombisa ku nga khathali ka vona hi ntiyiso hi mavulavulelo ni hi mahanyelo ya vona. Xisweswo, ku amukela ntiyiso wa Bibele swi vula ku lahlekeriwa hi swin’wana: Swi nga ha ku hambanisa ni vanghana, vaakelani, vatirhi-kuloni hambi ku ri swirho swa ndyangu. (Yohane 17:14) Kambe, wanuna wo tlhariha u tsarile: “Xava ntiyiso, u nga wu xavisi.” (Swivuriso 23:23) Loko u teka ntiyiso wu ri wa nkoka, Yehovha u ta ku pfuna leswaku u twisisa Bibele.

Xihinga xin’wana xo twisisa rungula ra Bibele i ku papalata ku tirhisa leswi yi swi vulaka. Yesu u byele vadyondzisiwa vakwe a ku: “N’wina mi nyikiwe ku twisisa swihundla swo kwetsima swa mfumo wa matilo, kambe vanhu volavo a va nyikiwanga. Hikuva timbilu ta vanhu lava ti sihalarile, naswona hi tindleve ta vona va swi twile kambe va nga anguli.” (Matewu 13:11, 15) Vanhu vo tala lava Yesu a va chumayeleke a va nga anguli, a va nga tiyimiselanga ku hundzuka. A va fani ni muxavisi la famba-fambaka loyi Yesu a vulavuleke ha yena exifanisweni xakwe! Loko a kume perela ya risima lerikulu, muxavisi loyi u hatle a xavisa swilo hinkwaswo leswi a a ri na swona leswaku a yi xava. Ku twisisa ntiyiso wa Bibele swi fanele ku va swa risima hi ndlela yoleyo eka hina.—Matewu 13:45, 46.

Ntlhontlho Wa Ku Va Munhu La Dyondzisekaka

Ntlhontlho lowukulu wo twisisa Bibele i ku va munhu la dyondzisekaka. Munhu swi nga n’wi tikela ku amukela tidyondzo letintshwa leti humaka eka munhu la tikombaka a ri wa xiyimo xa le hansi. Kambe, hambi ku ri vaapostola va Yesu Kreste a va ri vanhu lava nga “dyondzekangiki, lava tolovelekeke.” (Mintirho 4:13) Loko a hlamusela xivangelo xa kona, Pawulo u tsarile: “Ma swi vona eku mi vitaneni ka xona vamakwerhu, leswaku a va talanga lava tlhariheke hi tlhelo ra nyama lava vitaniweke, a hi vo tala lava nga ni matimba, a hi vo tala va le vukosini; kambe Xikwembu xi hlawule swilo swa vuphukuphuku emisaveni leswaku xi ta va khomisa tingana vanhu vo tlhariha.” (1 Vakorinto 1:26, 27) Loko u vona onge ku dyondzisiwa hi munhu wa xiyimo xa le hansi swi ku chicha xiyimo, tsundzuka leswaku munhu yoloye o tirhisiwa ntsena hi Xikwembu leswaku a ku dyondzisa. Xana ri kona lunghelo leri tlulaka ra ku dyondzisiwa hi Yehovha, loyi a nga “Muleteri [wa hina] Lonkulu”?—Esaya 30:20; 54:13.

Un’wana loyi swi n’wi tikeleke ku dyondzisiwa hi munhu wa xiyimo xa le hansi i Namani loyi a a ri ndhuna ya masocha ya le Siriya. Leswi a a lava  ku hanyisiwa eka nhlokonho wakwe, u ye eka Elixa muprofeta wa Yehovha. Kambe Namani u tivisiwe swiletelo swa Xikwembu swo hanyisa hi nomu wa nandza. Rungula hi roxe ni ndlela leyi ri vekiweke ha yona ri endle leswaku swi tikela Namani ku ri amukela, lerova eku sunguleni a ala ku yingisa rito ra muprofeta wa Xikwembu. Endzhakunyana, Namani u cince langutelo ra yena kutani a hanyisiwa. (2 Tihosi 5:9-14) Na hina hi langutana ni ntlhontlho lowu fanaka loko hi hlaya Bibele. Hi nga ha dyondza leswaku loko hi lava ku lulamisiwa emoyeni ni le mahanyelweni, hi fanele hi landzela ndlela leyintshwa ya vutomi. Xana hi ta titsongahata hi pfumelela munhu un’wana leswaku a hi dyondzisa leswi hi faneleke hi swi endla? Lava va tsakelaka ku dyondzisiwa hi vona ntsena lava nga twisisaka Bibele.

Langutelo lerinene ri kombisiwe hi wanuna un’wana la nga ni xikhundlha xa le henhla loyi a a ri ehansi ka Kandake, hosi ya xisati ya Vaetiyopiya. A a ri karhi a tlhelela eAfrika hi kalichi yakwe loko mudyondzisiwa Filipi a tsutsumela eka yena. Filipi u vutise wanuna loyi loko a swi twisisa leswi a a swi hlaya. Mulawuri loyi u titsongahatile a ku: “Xana ndzi nga swi tivisa ku yini, handle ka loko ndzi kongomisiwa hi un’wana?” Loko a twisise Rito ra Xikwembu, wanuna loyi u khuvuriwile. Endzhaku ka sweswo, u “ye emahlweni a tifambela a tsakile.”—Mintirho 8:27-39.

Timbhoni ta Yehovha i vanhu lava tolovelekeke. Vhiki na vhiki ti fambisa tidyondzo ta Bibele emakaya ya vanhu lava tlulaka timiliyoni ta tsevu. Leswi Bibele yi dyondzisaka ndlela yo antswa swinene ya vutomi, yi hlamusela ntshembo wa xiviri wa vanhu, naswona yi hi kombisa ndlela leyi hi nga xi tivaka ku antswa ha yona Xikwembu, kutani timiliyoni ta vanhu ti kume leswaku ku dyondza Bibele ni ku twisisa leswi yi swi vulaka i nchumu lowu tsakisaka swinene. I ntsako lowu na wena u nga wu kumaka.

[Xifaniso lexi nga eka tluka 7]

Namani swi n’wi tikerile ku amukela swiletelo leswi humaka eka nandza wa xiyimo xa le hansi

[Xifaniso lexi nga eka tluka 7]

Ku twisisa Bibele swi hi nyika ntsako