Ntsako Lowu U Nga Wu Kumaka Hi Ku Twisisa Bibele

BIBELE yi tamele tidyondzo ta risima leti humaka eka Xikwembu. Yi hi byela hi xikongomelo xa vutomi, xivangelo xa ku xaniseka ka vanhu ni hi vumundzuku bya vona. Yi hi dyondzisa ndlela yo kuma ntsako, ku endla vanghana ni ku kota ku tlhantlha swiphiqo. Xa nkoka swinene, hi dyondza hi Muvumbi wa hina ku nga Tata wa hina wa le tilweni, Yehovha. Vutivi byo tano byi hi tisela ntsako naswona byi hi nyika xikongomelo evuton’wini.

EBibeleni ku kuma vutivi hi Xikwembu swi fanisiwa ni ku dya. Yesu u te: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:4; Vaheveru 5:12-14) Tanihi leswi ku dya swakudya leswi akaka miri siku ni siku swi nga swa nkoka eka hina leswaku hi hanya, kutani ku hlaya Rito ra Xikwembu minkarhi hinkwayo i swa nkoka eka hina leswaku hi kuma vutomi lebyi nga heriki lebyi tshembisiweke hi Xikwembu.

Hi tsakela ku dya hikuva hi endliwe hi ndlela yoleyo naswona swi enerisa xilaveko xa hina xa nkoka. Hambiswiritano, hi ni xilaveko xin’wana xa nkoka lexi hi faneleke ku xi enerisa loko hi lava ku va ni ntsako. Yesu u te: “Va tsaka lava khathalaka hi xilaveko xa vona xa moya.” (Matewu 5:3) Ntsako wu nga kumeka hikuva xilaveko xexo xa moya xi nga enerisiwa hi ku twisisa Rito ra Xikwembu.

I ntiyiso, van’wana va swi vona swi nga olovi ku twisisa Bibele. Hi xikombiso, u nga ha lava mpfuno eka tindzimana leti vulavulaka hi mikhuva leyi nga tolovelekangiki kumbe leti tirhisaka swiga-ririmi. Nakambe ku ni vuprofeta lebyi tsariweke hi ririmi ro fanekisela leri nga twisisiwaka ntsena hi ku kambisisa tindzimana tin’wana ta Bibele leti vulavulaka hi mhaka  leyi fanaka. (Daniyele 7:1-7; Nhlavutelo 13:1, 2) Hambiswiritano, u nga yi twisisa hakunene Bibele. Xana u nga tiyiseka njhani hi sweswo?

Ntsako Lowu Nga Kumiwaka Hi Vanhu Hinkwavo

Bibele i Rito ra Xikwembu. Eka yona Xikwembu xi hi hlamusela leswi ku rhandza ka xona ku nga swona. Xana Xikwembu a xi ta hi nyika buku leyi swi nga kotekiki ku yi twisisa kumbe leyi twisisiwaka hi swidyondzeki ntsena? Nikatsongo, Yehovha a nge pfuki a ve ni mona. Kreste Yesu u te: “Xana hi wihi tatana exikarhi ka n’wina, loyi loko n’wana wakwe a kombela nhlampfi, swi nga ha endlekaka a n’wi nyika nyoka ematshan’weni ya nhlampfi? Kumbe loko a kombela tandza, a nga n’wi nyikaka xipame ke? Hikokwalaho, loko n’wina, hambiloko mi hombolokile mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!” (Luka 11:11-13) Xisweswo, u nga tiyiseka leswaku u nga swi kota ku yi twisisa Bibele naswona loko u kombela Xikwembu swi huma embilwini, xi ta ku pfuna leswaku u twisisa Rito ra xona. Phela, tidyondzo ta xisekelo ta Bibele ti nga twisisiwa ni hi vana!—2 Timotiya 3:15.

Hambileswi ku twisisa Bibele swi lavaka matshalatshala, ku endla tano swi nga hi tiyisa ngopfu. Endzhaku ka ku pfuxiwa ka yena, Yesu u humelele eka vadyondzisiwa vakwe vambirhi kutani a vulavula na vona hi vuprofeta bya Bibele. Xiviko xa Luka xi ri: “Ku sukela eka Muxe ni Vaprofeta hinkwavo a va hlamusela swilo leswi khumbaka yena eMatsalweni hinkwawo.” Vuyelo byi ve byihi? Hi vusiku byebyo, loko va anakanya hi swilo leswi va swi dyondzeke, vadyondzisiwa va vutisanile va ku: “Xana timbilu ta hina a ti nga pfurhi loko a ri karhi a vulavula na hina egondzweni, loko a hi pfulela Matsalwa hi ku helela?” (Luka 24:13-32) Ku twisisa Rito ra Xikwembu swi va tisele ntsako hikuva swi tiyise ripfumelo ra vona eka switshembiso swa Xikwembu kutani swi endla leswaku va va ni langutelo lerinene hi vumundzuku.

Ematshan’weni yo va ndzhwalo, ku twisisa Rito ra Xikwembu swa tsakisa naswona swa vuyerisa, ku fana ni leswi ku dya swakudya leswi akaka miri swi nandzihaka. Xana u fanele u endla yini leswaku u kuma ku twisisa loku? Xihloko lexi landzelaka xi kombisa ndlela leyi u nga byi tsakelaka ha yona “vutivi bya Xikwembu.”—Swivuriso 2:1-5.

[Xifaniso lexi nga eka tluka 4]

Ku fana ni tatana la nga ni rirhandzu, Yehovha u hi nyika moya lowo kwetsima leswaku a hi pfuna ku twisisa Bibele