Mfanelo Yo Va Ni Vito

MUNHU un’wana ni un’wana u ni mfanelo yo va ni vito. Le Tahiti, ni ricece leri lahliweke leri vatswari va rona va nga tiviwiki ri thyiwa vito. Mfumo wu n’wi thya vito n’wana la lahliweke, wu tlhela wu n’wi nyika xivongo.

Kambe, ku ni munhu loyi hi ndlela yo karhi a tsoniweke mfanelo leyi ya nkoka, mfanelo leyi vanhu hinkwavo va nga na yona. Lexi hlamarisaka, i “Tatana, loyi vito ra ndyangu wun’wana ni wun’wana etilweni ni le misaveni ri humaka eka yena”! (Vaefesa 3:14, 15) Phela, vanhu vo tala va ala ku tirhisa vito ra Muvumbi leri nga kona eBibeleni. Va hlawula ku ri siva hi swithopo swo tanihi “Xikwembu,” “Hosi,” kumbe “La Nga Riki Na Makumu.” Kutani, i mani vito ra yena? Mupisalema u hlamula xivutiso lexi a ku: “Wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.”—Pisalema 83:18.

Eka hafu yo sungula ya lembe-xidzana ra vu-19 loko varhumiwa vo huma eka Vandla ra Vurhumiwa ra le London va fika eTahiti, vanhu va le Polynesia a va gandzela swikwembu swo tala. Xin’wana ni xin’wana a xi ri ni vito ra xona, swikwembu leswikulu swa kona a ku ri Oro na Taaroa. Leswaku va hambanisa Xikwembu xa le Bibeleni eka swikwembu swin’wana, varhumiwa volavo a va kanakananga ku ri tirhisa swinene vito ra xona, leri hundzuluxeriweke ri va Iehova hi Xitahiti.

Vito rero ri tiviwe swinene naswona a a ri tirhisiwa swinene loko ku vulavuriwa niloko ku tsariwa. Hosi Pomare wa Vumbirhi wa le Tahiti, loyi a fumeke eku sunguleni ka lembe-xidzana ra vu-19, a a ri tirhisa nkarhi na nkarhi loko a tsala matsalwa. Vumbhoni bya mhaka yoleyo byi humelela eka papila leri kombisiweke laha. Papila leri, leri tsariweke hi Xinghezi ri vekiwe eMuziyama ya le Tahiti ni le Swihlaleni swa Kona. Papila leri ri kombisa leswaku vanhu a va ri tirhisa vito ra Xikwembu hi nkarhi wolowo. Ku tlula kwalaho, vito ra Xikwembu ri humelela minkarhi ya magidi eka Bibele yo sungula ya Xitahiti, leyi hetiweke hi 1835.

[Swifaniso leswi nga eka tluka 32]

Hosi Pomare wa Vumbirhi

[Laha Xifaniso Xi Humaka Kona eka tluka 32]

King and letter: Collection du Musée de Tahiti et de ses Îles, Punaauia, Tahiti