Swivutiso Swa Vahlayi

Loko munhu a karhatiwa hi madimona, xana a nga endla yini leswaku ma nga ha n’wi karhati?

Rito ra Xikwembu ri kombisa leswaku lava karhatiwaka hi madimona va nga ntshunxeka. Xikhongelo xi pfuna swinene. (Marka 9:25-29) Kambe loyi a karhatiwaka hi madimona swi nga ha lava a teka magoza lama engetelekeke. Leswi endlekeke eka Vakreste va lembe-xidzana ro sungula swi kombisa leswaku i yini swin’wana leswi lavekaka.

Vanhu van’wana va le Efesa wa khale a va tirhisana ni madimona loko va nga si va valandzeri va Kreste. Hambiswiritano, endzhaku ka loko va tiyimisele ku tirhela Xikwembu, “lava a va hanya hi masalamusi va hlengeleta tibuku ta vona kutani va ti hisa emahlweni ka vanhu hinkwavo.” (Mintirho 19:19) Hi ku hisa tibuku ta vona ta ku hlahluva, vapfumeri volavo lavantshwa va le Efesa va va vekele xikombiso vanhu vahi ni vahi lava lavaka ku ntshunxeka eku karhatiweni hi madimona namuntlha. Vanhu volavo va fanele va lahla swilo hinkwaswo leswi fambisanaka ni vungoma. Swilo swa kona swi nga ha katsa tibuku, timagazini, tifilimi, rungula leri kumekaka eka khompyuta, vuyimbeleri lebyi vulavulaka hi vungoma, swin’we ni switshungulo kumbe swilo swin’wana leswi vanhu va swi ambalaka leswaku va “tisirhelela” kumbe leswi fambisanaka ni vungoma.—Deteronoma 7:25, 26; 1 Vakorinto 10:21.

Endzhaku ka malembe Vakreste volavo va le Efesa va hise tibuku ta vona ta masalamusi, muapostola Pawulo u tsarile: “Hi dodombisan[a] . . . ni mavandla lama hombolokeke ya moya.” (Vaefesa 6:12) Pawulo u khutaze Vakreste a ku: “Ambalani mahavelo hinkwawo lama humaka eka Xikwembu leswaku mi kota ku yima mi tiyile, mi lwisana ni marhengu ya Diyavulosi.” (Vaefesa 6:11) Xitsundzuxo xexo xa ha tirha ninamuntlha. Vakreste va fanele va tiyisa swisirhelelo swa vona swa moya leswaku va nga hlaseriwi hi madimona. Pawulo u kandziyisile: “Ehenhla ka swilo hinkwaswo, rhwalani xitlhangu lexikulu xa ripfumelo, lexi mi nga ta kota ku timela ha xona miseve hinkwayo leyi pfurhaka ya lowo homboloka.” (Vaefesa 6:16) Munhu u tiyisa ripfumelo ra yena hi ku dyondza Bibele. (Varhoma 10:17; Vakolosa 2:6, 7) Hikwalaho, ku dyondza Bibele nkarhi na nkarhi swi hi pfuna leswaku hi va ni ripfumelo leri hi sirhelelaka eka nkucetelo wa mimoya leyo biha.—Pisalema 91:4; 1 Yohane 5:5.

Vakreste volavo va le Efesa a va fanele va teka goza rin’wana ra nkoka. Pawulo u te: “Hi swikhongelo swa mixaka hinkwayo ni xikombelo mi hamba mi khongela nkarhi hinkwawo hi moya.” (Vaefesa 6:18) Ina, ku khongela swi huma embilwini u kombela Yehovha leswaku a ku sirhelela i swa nkoka hakunene eka lava va nga swi laviki ku karhatiwa hi madimona namuntlha. (Swivuriso 18:10; Matewu 6:13; 1 Yohane 5:18, 19) Bibele yi vula hilaha ku faneleke yi ku: “Hikwalaho, tivekeni ehansi ka Xikwembu; kambe mi kaneta Diyavulosi, kutani u ta mi balekela.”—Yakobo 4:7.

Hambileswi loyi a karhatiwaka hi madimona a faneleke a khongela hi mbilu hinkwayo leswaku ma nga ha n’wi karhati, Vakreste van’wana va ntiyiso na vona va nga ha n’wi khongelela munhu yoloye loyi a swi navelaka swinene ku tirhela Yehovha naswona a ringetaka hi mbilu hinkwayo ku lwisana ni mimoya yo biha. Va nga kombela Xikwembu leswaku xi nyika loyi a karhatiwaka hi madimona matimba ya moya yo lwisana ni ku karhatiwa hi madimona. Leswi Rito ra Xikwembu ri vulaka leswaku “xikombelo xa munhu la lulameke, loko xi endliwa, xi ni matimba lamakulu,” swikhongelo leswi endliwaka hi malandza ya Xikwembu handle ko kanakana swi ta pfuna lava karhatiwaka hi madimona lava ringetaka hilaha va nga kotaka hakona leswaku va “kaneta Diyavulosi.”—Yakobo 5:16.

[Xifaniso lexi nga eka tluka 31]

Vapfumeri va le Efesa va hise tibuku ta vona leti vulavulaka hi masalamusi