Ku Fikelela Mbilu Ya N’wana

XANA u tshame u karhateka loko u vona n’wana a tlanga mintlangu ya nyimpi? Se swi toloveleke ngopfu ku vona ni vana lavatsongo va tlanga mintlangu yo tano, tanihi leswi vuhungasi byi taleke madzolonga. Xana u nga n’wi pfuna njhani n’wana leswaku a tsakela switlangisi leswinene ku ri ni swa nyimpi? Waltraud, murhumiwa la nga ni ntokoto swinene loyi a nga Mbhoni ya Yehovha eAfrika, u kume ndlela yo pfuna xifanyetana xin’wana ku endla sweswo.

Hikwalaho ka nyimpi, Waltraud u boheke ku baleka etikweni leri a a tshama eka rona kutani a rhurhela etikweni rin’wana ra le Afrika. Kwalaho u sungule ku dyondza Bibele ni mana wa xifanyetana lexi nga ni ntlhanu wa malembe. Nkarhi ni nkarhi loko a endzela mana wa kona, a a kuma xifanyetana lexi xi ri karhi xi tlangisa xibamu xa plasitiki, ku nga xitlangisi xin’we ntsena lexi a xi ri na xona. Waltraud a a nga si tshama a vona xifanyetana lexi xi kombetela nchumu wo karhi hi xibamu lexi, kambe a xi tshamela ku xi pfula ni ku xi pfala, onge hi loko xi nghenisetela makulu.

Waltraud u vulavule ni xifanyetana xexo a ku: “Werner, xana wa swi tiva leswaku ndzi vekiwe hi yini etikweni ra ka n’wina? Ndzi vekiwe hi nyimpi—ndzi boheke ku baleka etikweni ra ka hina hikwalaho ka vanhu lava nga ni khombo lava a va balesela van’wana hi swibamu swo fana ni xa wena. Xana u anakanya leswaku sweswo swi lulamile?”

Werner u hlamule a ku: “Doo!”

“U be kona,” ku vula Waltraud. Hiloko a ya emahlweni a ku: “Xana wa swi tiva leswaku ha yini ndzi endzela wena ni mana wa wena vhiki rin’wana ni rin’wana? Xivangelo hileswi Timbhoni ta Yehovha ti lavaka ku pfuna van’wana leswaku va va ni ku rhula ni Xikwembu ni vaakelani va vona.” Endzhaku ko pfumelelana ni mana wa Werner, Waltraud u te: “Loko wo ndzi nyika xibamu xa wena, ndzi ta xi cukumeta ekule, kutani ndzi endla pulani ya leswaku u kuma lori yo tlangisa leyi nga ni mavhilwa ya mune.”

Werner u n’wi nyike xibamu xakwe. U boheke ku rindza mavhiki ya mune ku ri kona a kumaka xitlangiso xakwe lexintshwa—lori leyi endliweke hi mapulanga, leyi a yi amukeleke hi ntsako lowukulu.

Xana u tinyika nkarhi wa ku vulavula ni vana va wena, u ringeta ku fikelela timbilu ta vona lerova va susumeteleka ku lahla switlangisi swo fana ni matlhari ya nyimpi? Loko swi ri tano, u ta va u va dyondzisa dyondzo leyi nga ta va pfuna vutomi hinkwabyo.