Yehovha U Letela Varisi Va Ntlhambi Wakwe
Yehovha U Letela Varisi Va Ntlhambi Wakwe
“Yehovha u nyika vutlhari; enon’wini wakwe ku ni vutivi ni ku twisisa.”—SWIVURISO 2:6.
1, 2. Ha yini vamakwerhu lava khuvuriweke va tikarhatela ku fanelekela ku va ni vutihlamuleri lebyi engetelekeke evandlheni?
NICK, loyi a veke nkulu ku ringana malembe ya nkombo, u ri: “A ndzi tsake ngopfu loko ndzi va nkulu evandlheni. Lunghelo leri ndzi ri vone ri ndzi pfulele ndlela yo tirhela Yehovha hi xitalo. Ndzi titwe ndzi ri ni xikweleti xo n’wi nkhensa hikwalaho ka swilo hinkwaswo leswi a ndzi endleleke swona. Nakambe a ndzi lava ku pfuna swirho swa vandlha hilaha ndzi nga swi kotaka hakona, ndzi swi pfuna hilaha vakulu van’wana va ndzi pfuneke hakona.” Hambiswiritano, ntsako wakwe a wu pfangane ni ku karhateka. Nick wa engetela: “Leswi a ndzi ri ehansinyana ka malembe ya 30 hi vukhale loko ndzi va nkulu, a ndzi karhateka hi ku anakanya leswaku a ndzi si va ni ntokoto lowu lavekaka—ku twisisa ni vutlhari—leswaku ndzi kota ku risa vandlha hi ndlela leyi humelelaka.”
2 Lava Yehovha a va hlawulaka leswaku va khathalela ntlhambi wakwe va ni swivangelo swo tala leswi endlaka leswaku va tsaka. Muapostola Pawulo u tsundzuxe vakulu va le Efesa hi xivangelo xin’wana xa ku tsaka loko a tshaha marito ya Yesu, a ku: “Ku nyika swi tisa ntsako lowukulu ku tlula ku amukela.” (Mintirho 20:35) Ku va nandza wa vutirheli kumbe nkulu swi pfulela vamakwerhu lava khuvuriweke tindlela leti engetelekeke to nyikela swo karhi eka Yehovha ni le vandlheni. Hi xikombiso, malandza ya vutirheli ma pfuna vakulu. Malandza lawa ma tlhela ma khathalela swiavelo swin’wana swo hlayanyana leswi dyaka nkarhi kambe swi ri swa nkoka. Vamakwerhu lava va endla ntirho lowu wa nkoka hileswi va rhandzaka Xikwembu ni vamakwavo.—Marka 12:30, 31.
3. Ha yini van’wana va kanakana ku tikarhatela ku fanelekela malunghelo evandlheni?
3 Ku vuriwa yini hi Mukreste la khuvuriweke la nga ha kanakanaka ku tikarhatela ku fikelela lunghelo ro va nandza kumbe nkulu hileswi a titwaka a nga faneleki? Ku fana na Nick, a nga ha karhateka, a ehleketa leswaku a nga na wona ntokoto lowu lavekaka wa ku va murisi la humelelaka. Loko u ri makwerhu la khuvuriweke, xana na wena u titwa hi ndlela leyi? Ku karhateka hi mhaka yo tano swa twala. Vakulu va ta tihlamulela eka Yehovha malunghana ni ndlela leyi va khomaka ntlhambi ha yona. Yesu u te: “Un’wana ni un’wana loyi a nyikiweke swo tala, ku ta laviwa swo tala eka yena; naswona loyi vanhu va n’wi vekaka leswaku a langutela swo tala, va ta lava swo tala ku tlula leswi tolovelekeke eka yena.”—Luka 12:48.
4. Yehovha u va pfuna njhani lava a va hlawulaka leswaku va khathalela tinyimpfu takwe?
4 Xana Yehovha u langutela leswaku lava a va hlawulaka ku va malandza ni vakulu va rhwala ndzhwalo lowu engetelekeke va ri voxe? Ematshan’weni ya sweswo, wa va pfuna leswaku va kota ku rhwala ndzhwalo lowu va tlhela va humelela. Hilaha swi kambisisiweke hakona eka xihloko lexi hundzeke, Yehovha u va nyika moya wakwe lowo kwetsima, lowu mihandzu ya wona yi va pfunaka ku khathalela tinyimpfu hi musa. (Mintirho 20:28; Vagalatiya 5:22, 23) Ku tlula kwalaho, Yehovha u va nyika vutlhari, vutivi ni ku twisisa. (Swivuriso 2:6) U swi endlisa ku yini sweswo? A hi tlhuvutseni tindlela tinharhu leti Yehovha a va letelaka ha tona vanhu lava a va hlawulaka leswaku va khathalela tinyimpfu takwe.
Ku Leteriwa Hi Varisi Lava Nga Ni Ntokoto
5. Ha yini Petro na Yohane va ve varisi lava humelelaka?
5 Loko muapostola Petro na Yohane va ri emahlweni ka Sanedri, vaavanyisi lava tlhariheke hi ndlela ya misava va huvo yoleyo a va teka vavanuna lava va ri vanhu lava nga “dyondzekangiki, lava tolovelekeke.” Ina, a va swi kota ku hlaya ni ku tsala, kambe a va nga dyondzanga Matsalwa eka xikolo xa varhabi. Hambiswiritano, Petro na Yohane swin’we ni vadyondzisiwa van’wana va ve vadyondzisi lava humelelaka hikuva va pfune vo tala lava va yingiseleke leswaku va va vapfumeri. Swi te njhani leswaku vavanuna lava, lava tolovelekeke va va vadyondzisi lavanene swonghasi? Endzhaku ko yingisela Petro na Yohane, huvo yi “lemuk[e] leswaku a va tshama va ri na Yesu.” (Mintirho 4:1-4, 13) Kunene, a va amukele moya lowo kwetsima. (Mintirho 1:8) Kambe a swi ri erivaleni hambi ku ri eka vaavanyisi volavo lava feke mahlo hi tlhelo ra moya leswaku Yesu a a va leterile vavanuna lava. Loko a ha ri emisaveni swin’we na vona, Yesu a nga dyondzisanga vaapostola ndlela yo hlengeleta vanhu vo fana ni tinyimpfu ntsena, kambe u va dyondzise ni ndlela yo ti risa loko se ti ri xiphemu xa vandlha.—Matewu 11:29; 20:24-28; 1 Petro 5:4.
6. I xikombiso xihi lexi Yesu na Pawulo va xi vekeke malunghana ni ku letela van’wana?
6 Endzhaku ka loko Yesu a pfuxiwile, u hambete a letela lava vekiweke ku va varisi. (Nhlavutelo 1:1; 2:1–3:22) Hi xikombiso, yena hi byakwe u hlawule Pawulo ivi a kongomisa ku leteriwa ka yena. (Mintirho 22:6-10) Pawulo u tlangele ndzetelo lowu a wu kumeke naswona leswi a swi dyondzeke u swi hundzisele eka vakulu van’wana. (Mintirho 20:17-35) Hi xikombiso, u tirhise nkarhi wo tala ni matimba a letela Timotiya leswaku a va “mutirhi” entirhweni wa Xikwembu “la nga riki na nchumu wo khomiwa hi tingana ha wona.” (2 Timotiya 2:15) Vavanuna lava va ve ni xinakulobye lexikulu. Eku sunguleni, Pawulo u tsale leswi malunghana na Timotiya: “Ku fana ni n’wana na tatana u tirhe na mina ku yisa mahungu lamanene emahlweni.” (Vafilipiya 2:22) Pawulo a nga kalanga a lava ku endla leswaku Timotiya kumbe munhu un’wana a va mudyondzisiwa wakwe. Ematshan’weni ya sweswo, u khutaze vapfumeri-kulobye leswaku va va ‘vatekeleri vakwe, tanihi leswi yena a a ri mutekeleri wa Kreste.’—1 Vakorinto 11:1.
7, 8. (a) Hi wihi ntokoto lowu kombisaka leswaku ku va ni vuyelo lebyinene loko vakulu va tekelela Yesu na Pawulo? (b) Vakulu va fanele va sungula rini ku letela lava anakanyeriwaka ku va malandza ya vutirheli ni vakulu?
7 Ku fana na Yesu na Pawulo, varisi lava nga ni ntokoto va teka goza ro letela vamakwerhu lava khuvuriweke naswona va kuma vuyelo lebyinene na vona. Xiya ntokoto wa Chad. U kurisiwe endyangwini lowu avaneke hi tlhelo ra vukhongeri kambe wa ha ku va nkulu evandlheni. U ri: “Emalembeni lama hundzeke, vakulu vo hlayanyana lava nga ni ntokoto va ndzi pfunile leswaku ndzi endla nhluvuko hi tlhelo ra moya. Leswi Tatana a a nga ri mupfumeri, vakulu volavo va ndzi khathalele ngopfu naswona a va fana na vatatana va moya eka mina. Va hete nkarhi va ndzi letela evutirhelini naswona endzhakunyana, nkulu un’wana u ndzi kombe ndlela yo tamela swiavelo swa vandlha leswi ndzi swi kumeke.”
8 Hilaha ntokoto wa Chad wu kombisaka hakona, varisi lava nga ni ku twisisa va sungula ku letela vamakwerhu lava anakanyeriwaka ku va malandza ya vutirheli ni vakulu va nga si endla nhluvuko lowu lavekaka leswaku va fanelekela malunghelo yo tano. Ha yini leswi swi laveka? Hikuva Bibele yi lerisa leswaku lava anakanyeriwaka ku va malandza ya vutirheli ni vakulu va fanele va fikelela timfanelo ta le henhla ta mahanyelo ni ta moya va nga si kuma malunghelo wolawo. Va fanele va “rhang[a] hi ku kamberiwa loko [v]a faneleka.”—1 Timotiya 3:1-10.
9. Hi byihi vutihlamuleri lebyi varisi lava wupfeke va nga na byona, naswona ha yini?
9 Loko vamakwerhu lava khuvuriweke va fanele ku kamberiwa, i swa nkoka leswaku va rhanga hi ku leteriwa. Hi xikombiso: Loko xichudeni exikolweni xi byeriwa ku tsala xikambelo lexi tikaka hi swilo leswi vadyondzisi va nga xi dyondzisangiki swona, xana xichudeni a xi ta pasa xikambelo xexo? A swi kanakanisi leswaku a xi ta feyila. Hikokwalaho, ndzetelo wa laveka. Hambiswiritano, vadyondzisi lava nga ni vukheta a va leteli swichudeni leswaku swi pasa xikambelo ntsena, kambe va tlhela va swi pfuna ku dyondza ndlela yo tirhisa vutivi lebyi swi byi kumeke. Hi ndlela leyi fanaka, vakulu lava gingiritekaka va pfuna vamakwerhu lava khuvuriweke ku hlakulela timfanelo leti lavekaka eka nandza wa vutirheli kumbe nkulu hi ku va nyika ndzetelo lowu faneleke. A va swi endli ntsena hileswi va lavaka ku pfuna vamakwerhu lava leswaku va ta kuma malunghelo lawa, kambe va tlhela va va pfuna leswaku va faneleka kahle ku khathalela ntlhambi. (2 Timotiya 2:2) Ina, vamakwerhu lava khuvuriweke va fanele va endla matshalatshala ni ku tirha hi matimba leswaku va fikelela timfanelo leti lavekaka eka nandza wa vutirheli kumbe nkulu. (Tito 1:5-9) Nilokoswiritano, varisi lava nga ni ntokoto va nga swi tsakela ku pfuna lava tikarhatelaka ku fanelekela vutihlamuleri evandlheni, hi ku va pfuna leswaku va endla nhluvuko hi ku hatlisa.
10, 11. Varisi va nga va letela njhani van’wana leswaku va kota ku tamela swiavelo leswi engetelekeke?
10 Varisi lava nga ni ntokoto va nga va letela njhani van’wana hi ku kongoma leswaku va hetisisa swiavelo swa vandlha? Xo sungula, va fanele ku kombisa leswaku va khathala hi vamakwerhu evandlheni—va tirha na vona nkarhi na nkarhi ensin’wini ni ku va pfuna leswaku va antswisa vuswikoti bya vona byo ri “tamela khwatsi rito ra ntiyiso.” (2 Timotiya 2:15) Varisi lava wupfeke va burisana ni vamakwerhu volavo malunghana ni ntsako lowu kumiwaka hi ku tirhela van’wana swin’we ni ku eneriseka loku varisi hi voxe va ku kumaka hi ku tivekela tipakani ta moya ni ku ti fikelela. Va tlhela va nyikela swiringanyeto leswi kongomeke swa ndlela leyi makwerhu a nga antswisaka ha yona leswaku a va ‘xikombiso entlhambini.’—1 Petro 5:3, 5.
11 Loko makwerhu a va nandza wa vutirheli, varisi lava tlhariheke va hambeta va n’wi letela. Bruce loyi se a heteke makume ya malembe a ri nkulu evandlheni, u ri: “Ndzi rhandza ku tshama ehansi ni makwerhu la ha ku vaka nandza kutani ndzi pfuxeta na yena swiletelo leswi kandziyisiweke hi hlonga ro tshembeka ni ro tlhariha. Hi tlhela hi hlaya nkongomiso wun’wana ni wun’wana malunghana ni swiavelo swakwe kutani ndzi tirha na yena kukondza a swi tolovela kahle swiavelo swakwe.” Loko nandza a sungula ku va ni ntokoto, a nga tlhela a leteriwa entirhweni wo risa. Bruce wa engetela a ku: “Loko ndzi famba ni nandza wa vutirheli eka riendzo ra vurisi, ndzi n’wi pfuna ku hlawula matsalwa lama faneleke lama nga ta khutaza munhu kumbe ndyangu lowu hi nga ta wu endzela. Ku dyondza ndlela yo tirhisa Matsalwa leswaku ma khumba mbilu ya munhu i swa nkoka loko nandza a lava ku va murisi la humelelaka.”—Vaheveru 4:12; 5:14.
12. Varisi lava nga ni ntokoto va nga va letela njhani vakulu lavantshwa?
12 Nakambe varisi lavantshwa va vuyeriwa swinene eka ndzetelo lowu engetelekeke. Nick la boxiweke eku sunguleni u ri: “Ndzetelo lowu ndzi wu kumeke eka valanguteri vambirhi lava kuleke wu ndzi pfune ngopfu. Vamakwerhu lava hakanyingi a va yi twisisa ndlela leyi timhaka to karhi a ti fanele ti tameriwa ha yona. Minkarhi hinkwayo a va lehisa mbilu va ndzi yingisela naswona a va kambisisa mavonelo ya mina hi vukheta—hambiloko va nga pfumelelani na wona. Ndzi dyondze swo tala loko ndzi xiyisisa ndlela leyi a va tirhisana ha yona ni vamakwerhu evandlheni hi ku titsongahata ni hi xichavo. Vakulu lava va ndzi kombe nkoka wo tirhisa Bibele hi vutlhari loko ndzi lulamisa swiphiqo kumbe loko ndzi nyikela xikhutazo.”
Va Leteriwe Hi Rito Ra Xikwembu
13. (a) I yini leswi lavekaka leswaku makwerhu a va murisi la humelelaka? (b) Ha yini Yesu a te: “Leswi ndzi swi dyondzisaka a hi swa mina”?
13 Hakunene, Rito ra Xikwembu, ku nga Bibele, ri ni milawu, misinya ya milawu ni swikombiso leswi murisi a swi lavaka leswaku a “faneleka hi ku helela, a hlomisiwa hi ku helela eka ntirho wun’wana ni wun’wana lowunene.” (2 Timotiya 3:16, 17) Swi nga ha endleka makwerhu wo karhi a dyondzekile, kambe i vutivi bya yena bya Matsalwa ni ndlela leyi a byi tirhisaka ha yona leswi nga ta n’wi pfuna leswaku a va murisi la humelelaka. Xiya xikombiso xa Yesu. A a ri ni vutivi lebyikulu, a a twisisa swinene, naswona a a ri murisi wa moya la tlhariheke swinene eka hinkwavo lava tshameke va hanya emisaveni; kambe, a nga titsheganga hi vutlhari bya yena n’wini loko a dyondzisa tinyimpfu ta Yehovha. U te: “Leswi ndzi swi dyondzisaka a hi swa mina, kambe i swa loyi a ndzi rhumeke.” Ha yini Yesu a yise ku dzuneka eka Tata wakwe wa le tilweni? U hlamuserile: “Loyi a vulavulaka hi ku tisungulela u lava ku tivangamisa.”—Yohane 7:16, 18.
14. Varisi va swi papalata njhani ku lava ku tivangamisa?
14 Varisi lavo tshembeka va papalata ku lava ku tivangamisa. Ndzayo ni xikhutazo xa vona va swi sekela eRitweni ra Xikwembu, ku nga ri eka vutlhari bya vona. Va swi twisisa leswaku vutihlamuleri bya murisi i ku pfuna tinyimpfu leswaku ti kuma “mianakanyo ya Kreste,” ku nga ri ya vakulu. (1 Vakorinto 2:14-16) Hi xikombiso, ku vuriwa yini loko nkulu loyi a a pfuna mpatswa ku lulamisa swiphiqo swa vukati a nyikela ndzayo yakwe hi ku tirhisa ntokoto wa yena n’wini ematshan’weni yo tirhisa misinya ya milawu ya Bibele ni rungula leri kandziyisiweke hi “hlonga ro tshembeka ni ro tlhariha”? (Matewu 24:45) Xitsundzuxo xakwe xi nga ha va xi sekeriwe ngopfu eka mikhuva ya le ndhawini leyi a tshamaka eka yona ni le ka vutivi bya yena lebyi nga entangiki. I ntiyiso leswaku mikhuva yin’wana a yi bihanga hi yoxe, naswona nkulu wa kona a nga ha va a ri ni ntokoto evuton’wini. Kambe tinyimpfu ti vuyeriwa ngopfu loko varisi va ti khutaza ku yingisa rito ra Yesu ni swileriso swa Yehovha ematshan’weni ya mavonelo ya munhu kumbe milawu ya mikhuva ya laha va tshamaka kona.—Pisalema 12:6; Swivuriso 3:5, 6.
Va Leteriwe Hi “Hlonga Ro Tshembeka Ni Ro Tlhariha”
15. Hi wihi ntirho lowu Yesu a wu nyikeke “hlonga ro tshembeka ni ro tlhariha,” naswona hi xihi xin’wana xa swivangelo swa ku humelela ka ntlawa wa hlonga?
15 Varisi vo tanihi muapostola Petro, Yohane na Pawulo hinkwavo a va ri swirho swa ntlawa lowu Yesu a wu hlamuseleke tanihi “hlonga ro tshembeka ni ro tlhariha.” Ntlawa lowu wa hlonga wu vumbiwa hi vamakwavo va Yesu lava totiweke hi moya va laha emisaveni lava nga ni ntshembo wa ku fuma na Kreste etilweni. (Nhlavutelo 5:9, 10) Emasikwini lawa yo hetelela ya mafambiselo lawa ya swilo, nhlayo ya vamakwavo va Kreste lava ha riki laha emisaveni yi hungutekile. Hambiswiritano, ntirho lowu Yesu a va leriseke leswaku va wu endla—ku nga ku chumayela mahungu lamanene ya Mfumo ku nga si fika makumu—wu ndlandlamukile swinene sweswi. Hambiswiritano, ntlawa wa hlonga wu humelela hi ndlela leyi hlamarisaka! Ha yini? Xivangelo xin’wana hileswi wu leteleke swirho swa “tinyimpfu tin’wana” leswaku swi wu pfuna eka ntirho wo chumayela ni wo dyondzisa. (Yohane 10:16; Matewu 24:14; 25:40) Namuntlha, xiphemu lexikulu xa ntirho xi endliwa hi ntlawa lowu wo tshembeka wa tinyimpfu tin’wana.
16. Ntlawa wa hlonga wu va letela njhani vavanuna lava vekiweke evandlheni?
16 Xana ntlawa wa hlonga wu wu nyikela njhani ndzetelo lowu? Hi lembe-xidzana ro sungula, vayimeri va ntlawa lowu wa hlonga va pfumeleriwe ku letela ni ku veka valanguteri emavandlheni, kutani vona va letela tinyimpfu. (1 Vakorinto 4:17) Lunghiselelo leri fanaka ra tirha ni namuntlha. Huvo leyi Fumaka—ntlawa lowutsongo wa vakulu lava totiweke lava yimelaka ntlawa wa hlonga—wu pfumelela vayimeri va wona leswaku va letela ni ku veka malandza ya vutirheli ni vakulu emavandlheni ya makume ya magidi emisaveni hinkwayo. Ku tlula kwalaho, Huvo leyi Fumaka yi lunghiselela swikolo leswaku yi letela swirho swa Tikomiti ta Marhavi, valanguteri lava famba-fambaka, vakulu ni malandza ya vutirheli leswaku va dyondza ndlela leyinene yo khathalela tinyimpfu. Nkongomiso lowu engetelekeke wu nyikeriwa hi ku tirhisa mapapila, swihloko leswi kandziyisiweke eka Xihondzo xo Rindza ni minkandziyiso yin’wana yo tanihi buku leyi nge Ku Hleleriwa Ku Endla Ku Rhandza Ka Yehovha. *
17. (a) Yesu u swi kombise njhani leswaku wa wu tshemba ntlawa wa hlonga? (b) Varisi va moya va nga swi kombisa njhani leswaku va wu tshemba ntlawa wa hlonga?
17 Yesu u wu tshemba ngopfu ntlawa wa hlonga lerova u wu veke leswaku wu langutela “hinkwaswo leswi nga swa yena”—swilo swa yena hinkwaswo leswi khumbaka timhaka ta moya emisaveni. (Matewu 24:47) Varisi lava vekiweke na vona va kombisa leswaku va wu tshemba ntlawa wa hlonga hileswi va tirhisaka nkongomiso lowu humaka eka Huvo leyi Fumaka. Ina, varisi va kondletela vun’we exikarhi ka ntlhambi loko va letela van’wana, loko va pfumela ku leteriwa hi Rito ra Xikwembu ni loko va tirhisa ndzetelo lowu humaka eka ntlawa wa hlonga. Hakunene ha tsaka hileswi Yehovha a leteleke vavanuna lava khathalaka swinene hi xirho xin’wana ni xin’wana xa vandlha ra Vukreste!
[Nhlamuselo ya le hansi]
^ par. 16 Yi kandziyisiwe hi Timbhoni ta Yehovha.
A Wu Ta Hlamurisa Ku Yini?
• Varisi lava wupfeke va moya va va letela njhani van’wana?
• Ha yini varisi va nga dyondzisi hi ku tirhisa mavonelo ya vona?
• Varisi va swi kombisa njhani leswaku va tshemba ntlawa wa hlonga, naswona ha yini?
[Swivutiso Swa Dyondzo]
[Swifaniso leswi nga eka tluka 24, 25]
Vakulu lava nga Vakreste va letela majaha evandlheni
[Swifaniso leswi nga eka tluka 26]
“Hlonga ro tshembeka ni ro tlhariha” ri nyika vakulu ndzetelo lowukulu