Hi Xihi Xikongomelo Xa Xikwembu Hi Misava?

I YINI lexi ku endlaka u tsakela ku famba-famba entangeni wo saseka kumbe endhawini leyi nga ni swiluva leswi nun’hwelaka kahle? Ha yini u nyanyuka loko u vona tiva ro saseka kumbe u vona tintshava to leha leti maninginingi ya tona ma funengetiweke hi mapapa? I yini lexi ku endlaka u yima u yingisela tinyenyana leti yimbelelaka tinsimu leti tsakisaka ehenhla ka mirhi? Naswona hikwalaho ka yini swi ku tsakisa swinene ku vona mhunti yi ri karhi yi tlula-tlula kumbe ku vona ntlhambi wa tinyimpfu wu ri emadyelweni ya wona?

Nhlamulo ya swivutiso leswi i yin’we. Hi endleriwe ku hanya eParadeyisini! Kwalaho, hi laha Adamu na Evha, vatswari va hina vo sungula, va sunguleke kona ku hanya. Ku navela ku hanya eParadeyisini hi ku teke eka vona naswona Muvumbi wa vona, Yehovha Xikwembu, hi yena a endleke leswaku va navela ku hanya kwalaho. A a swi tiva leswaku hina vanhu hi ta tiphina eParadeyisini hikuva u hi endle hi va ni timfanelo leti nga ta endla leswaku hi tsakela kaya leri ro saseka.

Ha yini Yehovha a vumbe misava? U ‘yi vumbele leswaku ku tshama’ vanhu. (Esaya 45:18) “Muendli wa misava” u nyike Adamu na Evha kaya ro saseka ra paradeyisi, ku nga ntanga wa Edeni. (Yeremiya 10:12; Genesa 2:7-9, 15, 21, 22) Va fanele va swi tsakerile ku vona milambu, swiluva ni mirhi leyi a yi ri kwalaho! A va vona tinyenyana leti hahaka empfhukeni ni swiharhi swo hambana-hambana swi tifamba-fambela enhoveni—hinkwaswo a swi nga ri na khombo eka vanhu. Tinhlampfi ni swikokovi swin’wana a swi tifamba-fambela endzeni ka mati lama baseke hi ndlela leyi hlamarisaka. Xa nkoka eka hinkwaswo, Adamu na Evha a va tshama swin’we. A va ta tikumela vana kutani va ndlandlamuxa kaya ra vona ra Paradeyisi, va tsakile naswona va tirha swin’we ni ndyangu wa vona lowu kulaka.

Hambileswi misava yi nga riki paradeyisi namuntlha, yi nga fanisiwa ni kaya lerinene ngopfu ra ndyangu lowu tsakeke. Kaya ra hina leri hi ri nyikiweke hi Xikwembu ri ni swilo leswi hi swi lavaka—ku vonakala, ku hisa, mati ni swakudya. Ha ku tlangela swinene ku vonakala ni ku hisa ka dyambu swin’we ni ku vonakala ka n’weti ka mpimo lowunene  nivusiku! (Genesa 1:14-18) Laha misaveni ku ni swilo swo endla ndzilo, swo tanihi malahla ni oyili. Laha misaveni hi ni mati hikwalaho ka leswi ku nga ni ndzhendzeleko wa mati, milambu, mativa ni malwandle. Naswona misava a yi titshamelanga ntsena, yi funengetiwe hi byanyi bya rihlaza.

Misava yi hlayisa swakudya swo tala hilaha swakudya swi hlayisiwaka hakona ekaya. Hi swimila ni mihandzu leyi nga emasin’wini, Yehovha u hi ‘nyika tinguva ta mihandzu, a tlhela a tata timbilu ta hina hi ku khana lokukulu.’ (Mintirho 14:16, 17) Tanihi leswi misava leyi se yi nga kaya lerinene swonghasi, anakanya leswaku yi ta va yi ri njhani loko Yehovha “Xikwembu lexi tsakeke,” a yi endla yi va paradeyisi!—1 Timotiya 1:11.

 [Laha Xifaniso Xi Humaka Kona eka tluka 2]

COVER: Earth: NASA photo; Stars: NASA, ESA and AURA/Caltech