Ntikelo Wa “Xibya Xo Tsana Swinene”

MUAPOSTOLA PETRO u tsarile a ku: “N’wina vavanuna lava tekeke, hambetani mi tshama [ni vasati va n’wina] hi ku ya hi vutivi, mi va xixima leswi va nga xibya xo tsana swinene, xa xisati.” (1 Petro 3:7) Xana Ndzimana leyi yi tsongahata wansati hi ndlela yo karhi, tanihi leswi yi vulaka leswaku i “xibya xo tsana swinene”? A hi voneni leswi mutsari la huhuteriweke a a vula swona hakunene.

Riviti ra Xigriki leri hundzuluxeriwaka ri va “xixima” ri vula “nxavo, ntikelo, . . . xichavo.” Xisweswo, wanuna la nga Mukreste u fanele ku khoma nsati wakwe hi ntwela-vusiwana, a n’wi anakanyela ku fana ni xibya xa risima lexi fayekaka hi ku olova. Sweswo a swi n’wi tsongahati nikatsongo wansati. Hi xikombiso, anakanya hi rivoni ra Tiffany leri fanaka ni xiluva lexi vuriwaka lotus. Rivoni leri, leri xongeke swinene a ri tiyanga. Xana ntikelo wa rivoni leri wu nga tekeriwa ehansi hi leswi rivoni leri ri nga tiyangiki? Nikatsongo! Hi 1997 rivoni ra Tiffany leri fanaka ni xiluva lexi vuriwaka lotus ri xaviwe hi R17,9 wa timiliyoni eka nxavo wa mphikizano! Leswi ri nga tiyangiki, sweswo swi tlakuse ntikelo wa rona ematshan’weni yo wu yisa ehansi.

Hilaha ku fanaka, ku xixima wansati ku fana ni xibya xo tsana swinene a swi n’wi tsongahati. Ku tshama ni nsati wakwe “hi ku ya hi vutivi” swi vula leswaku wanuna u anakanyela matimba ni ku tsana ka nsati wakwe, swilo leswi a swi rhandzaka ni leswi a nga swi rhandziki, mavonelo ni mintlhaveko ya yena. Wanuna la khathalaka u anakanyela ku hambana ka vumunhu bya yena ni bya nsati wakwe. Wa n’wi anakanyela “leswaku swikhongelo swa [yena] swi nga siveriwi.” (1 Petro 3:7) Wanuna la tsandzekaka ku xixima timfanelo ta nsati wakwe u veka vuxaka bya yena n’wini ni Xikwembu ekhombyeni. Swi le rivaleni leswaku Rito ra Xikwembu a ri va tekeli ehansi vavasati. Kambe, ri va nyika xindzhuti ni ku va fundzha.

[Laha Xifaniso Xi Humaka Kona eka tluka 32]

© Christie’s Images Limited 1997