“Hi Fanele Ku Yingisa Xikwembu Tanihi Mufumi Ku Tlula Vanhu”

“Nyimpi I Ya Yehovha”

MAVUTHU mambirhi a ma jamelanile. Vavanuna va Vaisrayele a va khomiwe hi rhumbyana ku ringana masiku ya 40 naswona a va tshamela ku rhukaniwa hi Goliyadi, nhenha ya matimba ya Vafilisita.—1 Samuwele 17:1-4, 16.

Goliyadi u huwelele Vaisrayele a va tlhontlha hi marito lawa: “Tihlawuleleni wanuna, a rhelela a ta eka mina. Loko a swi kota ku lwa na mina naswona a ndzi dlaya, hi fanele hi va malandza ya n’wina. Kambe loko mina ndzi ringana na yena hi matimba kutani ndzi n’wi dlaya, n’wina mi fanele mi va malandza ya hina, mi fanele mi hi tirhela. . . . Mina ndza wu tlhontlha nxaxamelo wa nyimpi ya Israyele esikwini leri. Ndzi nyikeni wanuna hi lwa!”—1 Samuwele 17:8-10.

Eminkarhini ya khale, a swi tolovelekile leswaku tinhenha leti yimelaka mavuthu ya tona ti lwa ti ri toxe. Vuthu ra loyi a hluleke hi rona leri a ri va ri hlurile. Kambe nhenha leyi a yi tlhontlha Israyele a yi nga ri socha leri tolovelekeke. A yi ri nhenha yo leha—nala wa tihanyi la chavisaka. Hambiswiritano, leswi a a hlekula vuthu ra vanhu va Yehovha, Goliyadi a a ta weriwa hi khombo.

Leyi a ku nga ri nyimpi leyi tolovelekeke. Nyimpi leyi, a yi ri exikarhi ka Yehovha ni swikwembu swa Vafilisita. Ematshan’weni yo rhangela vuthu ra yena hi xivindzi a lwa ni valala va Xikwembu, Hosi Sawulo wa le Israyele u ve ni rhumbyana.—1 Samuwele 17:11.

Jaha Leri Tshembeke Yehovha

Loko va ha jamelanile, jaha rin’wana leri se a ri totiwile leswaku ri va hosi ya le Israyele ri endzele vamakwavo lava a va ri evuthwini ra Sawulo. Vito ra rona i Davhida. Loko ri twa marito ya Goliyadi, ri vutisile ri ku: “I mani Mufilisita loyi la nga yimbangiki leswaku a tlhontlha nxaxamelo wa nyimpi ya Xikwembu lexi hanyaka?” (1 Samuwele 17:26) Eka Davhida, Goliyadi a a yimela Vafilisita hinkwavo ni swikwembu swa vona. Leswi a swi fanerile leswaku a hlundzuka, Davhida a a navela ku lwela vito ra Yehovha ni Vaisrayele ni ku lwa ni xihontlovila lexi xa muhedeni. Kambe Hosi Sawulo u te: “A wu nge swi koti ku ya eka Mufilisita loyi u ya lwa na yena, hikuva wena wa ha ri mufana.”—1 Samuwele 17:33.

Hakunene ku ni ku hambana lokukulu exikarhi ka langutelo ra Sawulo ni ra Davhida! Sawulo a a teka Davhida tanihi mufana loyi a nga murisi loyi a lavaka ku lwa ni xihontlovila xa nsele. Hambiswiritano, hi ku ya hi Davhida, Goliyadi a a ri wanuna la nga nyawuriki la delelaka Yehovha, Hosi leyi Lawulaka. Davhida a a ri ni xivindzi hikwalaho ka leswi a a khorwiseka leswaku Xikwembu a xi nge tshuki xi pfumelele munhu leswaku a sandza vito ra xona ni vanhu va xona ivi a nga xupuriwi. Loko Goliyadi a tibuma hi matimba ya yena, Davhida a a veke ntshembo wa yena eka Yehovha, a teka xiyimo lexi hi ku ya hi langutelo ra Xikwembu.

“Ndzi Ta Eka Wena Hi Vito Ra Yehovha”

Ripfumelo ra Davhida a ri sekeriwe exisekelweni lexi tiyeke. A a tsundzuka leswaku Xikwembu xi n’wi pfunile leswaku a ponisa tinyimpfu ta yena eka bere ni le ka nghala. Murisi loyi lontsongo a a tiyiseka leswaku Yehovha a a ta n’wi pfuna sweswi ku lwa ni nala loyi wo chavisa wa Mufilisita. (1 Samuwele 17:34-37) Davhida u fambile a ya lwa na Goliyadi a hlome hi xipelupelu ni maribye ya ntlhanu yo tswulungeka ntsena.

Davhida loyi a a ha ri jaha u hlawule ku ya lwa nyimpi leyi a swi tikomba onge a nge hluli eka yona, hileswi a a titshege hi matimba ya Yehovha.  Hi xivindzi u byele Mufilisita loyi a ku: “U ta eka mina hi banga ni fumu ni tlhari, kambe mina ndzi ta eka wena hi vito ra Yehovha wa mavuthu, Xikwembu xa nxaxamelo wa nyimpi ya Israyele lexi u xi tlhontlheke. Esikwini leri Yehovha u ta ku nyiketa evokweni ra mina . . . Vanhu va misava hinkwayo va ta tiva leswaku ku ni Xikwembu xa Israyele. Nhlengeletano leyi hinkwayo yi ta tiva leswaku Yehovha a nga ponisi hi banga kumbe hi fumu, hikuva nyimpi i ya Yehovha, u fanele a mi nyiketa evokweni ra hina.”—1 Samuwele 17:45-47.

Vuyelo byi ve byihi? Rungula leri huhuteriweke ri ri: “Davhida, hi xipelupelu ni ribye, u tikombise a ri ni matimba ku tlula Mufilisita, a ba Mufilisita a n’wi dlaya; Davhida a a nga tamelanga banga.” (1 Samuwele 17:50) A a nga tamelanga banga evokweni ra yena, kambe a a seketeriwa swinene hi Yehovha Xikwembu. *

Davhida u hlurile hakunene enyimpini yoleyo hikwalaho ka ripfumelo leri a a ri na rona eka Yehovha! Loko hi fanele hi hlawula exikarhi ka ku chava vanhu ni ku tshemba matimba ya Yehovha yo ponisa, swi le rivaleni leswaku hi ta hlawula yini: “Hi fanele ku yingisa Xikwembu tanihi mufumi ku tlula vanhu.” (Mintirho 5:29) Ku tlula kwalaho, loko hi languta swiyimo leswi tlhontlhaka hi ku ya hi langutelo ra Yehovha Xikwembu, hi ta swi kota ku langutana ni swiphiqo leswikulu hi ndlela leyi faneleke.

[Nhlamuselo ya le hansi]

[Bokisi/Xifaniso lexi nga eka tluka 9]

XANA GOLIYADI A A RI TANIHI KWIHI?

Rungula leri nga eka 1 Samuwele 17:4-7 ri hi byela leswaku Goliyadi a a lehe ku tlula swisungunhu swa tsevu—kwalomu ka timitara tinharhu. Lexi kombisaka leswaku Mufilisita loyi a a ri nkulu a tlhela a va ni matimba a ku ri nguvu ya yena ya mahakatimba ya koporo. A yi tika 57 wa tikhilogiramu! Mphiselo wa fumu ra yena a wu fana ni mhandzi, naswona nhompfu ya rona ya nsimbi a yi tika tikhilogiramu ta nkombo. Phela, swi nga ha endleka leswaku swihlomo swa Goliyadi a swi tika ku tlula na Davhida hi yexe!