Kuma Ku Eneriseka Hi Ku Tirhisa Misinya Ya Milawu Ya Bibele

A SWI kanakanisi leswaku u tshama u vona ximanga xi vurhamile naswona xi rila hi rito ra le hansi—ku nga xikombiso xa ku eneriseka. Hakunene a swi ta va swinene ku tikuma u ri exiyin’weni xo fana ni xa ximanga lexi! Hambiswiritano, vo tala swa va tikela ku eneriseka naswona loko va eneriseka hi swo karhi i swa xinkarhana. Ha yini swi ri tano?

Hikuva hi endla swihoxo hikwalaho ka ku nga hetiseki ka hina, naswona hi fanele hi tiyisela swihoxo swa van’wana. Nakambe hi hanya eminkarhini leyi Bibele yi yi vitanaka ‘masiku yo hetelela,’ lama katsaka “minkarhi ya mangava leyi swi nonon’hwaka ku langutana na yona.” (2 Timotiya 3:1-5) Hambiloko hi kumbuka minkarhi ya le vutsongwanini bya hina leyi a hi nga vileli ha nchumu, vunyingi bya hina sweswi hi langutane ni ntshikilelo wa “minkarhi [leyi] ya mangava.” Xana swa koteka ku eneriseka namuntlha?

Xiya leswaku Matsalwa a ma vuli swona leswaku minkarhi leyi ya mangava a swi nge koteki ku langutana na yona, kambe ma kombisa leswaku swi ta tika ku langutana na yona. Hi nga langutana na yona hi ku tirhisa misinya ya milawu ya Bibele. Hi nga ka hi nga swi koti ku lulamisa swiphiqo swa hina minkarhi hinkwayo, kambe hi nga kuma ku eneriseka ko karhi. A hi kambisiseni misinya yinharhu ya milawu emhakeni leyi.

Vana Ni Langutelo Lerinene

Leswaku hi eneriseka, hi fanele hi ringeta ku va ni langutelo lerinene hi ku tsana ka hina ni ka van’wana. Eka papila ra yena leri yaka eka Varhoma, muapostola Pawulo u te: “Hinkwavo va dyohile, naswona va kayivela ku vangama ka Xikwembu.” (Varhoma 3:23) Swikombiso swo tala swa ku vangama ka Yehovha a hi nge swi twisisi hi vuenti. Xikombiso xin’wana i mhaka yo olova leyi vuriweke eka Genesa 1:31: “Xikwembu xi vona hinkwaswo leswi xi swi endleke, kutani waswivo, a swi ri swinene ngopfu.” Loko Yehovha a lava ku tsundzuka leswi a swi endleke, minkarhi hinkwayo a nga vula leswaku i “swinene ngopfu.” A nga kona munhu loyi a nga vulaka sweswo minkarhi hinkwayo. Goza ro sungula ro kuma ku eneriseka i ku xiya ku tsana ka hina. Hambiswiritano, ku katseka swo tala emhakeni leyi. Hi fanele hi twisisa ni ku amukela langutelo ra Yehovha emhakeni ya kona.

Rito ra Xigriki leri hundzuluxeriweke va ku “xidyoho” ri huma eka rimitsu leri vulaka ku hupa. (Varhoma 3:9) Hi xikombiso: Anakanya hi munhu loyi a nga ni ntshembo wo wina sagwadi ro karhi hi ku copa nchumu wo karhi hi nseve. U ni miseve yinharhu. U copa hi nseve wo sungula kutani a hupela ekule hi mitara. U korola ku antswa hi nseve wa vumbirhi kambe a hupela ekusuhi. Kutani hi nseve wo hetelela u korola hi vurhonwana kambe a hupela ekusuhi swinene. A ku sele katsongo, kambe mhaka leyi salaka hileswaku u hupile.

Hinkwerhu hi fana ni mucopi loyi a heleke matimba. Minkarhi yin’wana ‘hi hupela pakani ya hina’ ekule swinene. Minkarhi yin’wana hi hupela ekusuhi swinene. Hi hela matimba hi ku va hi tikarhate swinene, kambe hi nga xi fikeleli  xikongomelo xa hina. A hi tlheleleni eka mucopi.

U hundzuluka hi ku nonoka a sungula ku famba, a hele matimba hikuva sagwadi a nga ri kumanga. Hi xitshuketa, mufambisi wa mphikizano wa n’wi vitana kutani a n’wi nyika sagwadi, a ku: “Ndzi lava ku ku nyika sagwadi leri hikuva ndza ku rhandza, naswona ndzi vone ndlela leyi u tikarhateke ha yona.” Mucopi wa tsaka swinene!

A nga tikoti hi ntsako! Hinkwavo lava kumaka “nyiko” ya vutomi lebyi nga heriki ni lebyi hetisekeke eka Xikwembu va ta titwa hi ndlela leyi. (Varhoma 6:23) Endzhaku ka sweswo, swilo hinkwaswo leswi va swi endlaka swi ta va swinene—a va nge he yi hupi nakambe pakani. Va ta eneriseka hi ku helela. Na hina, loko hi tsundzuka sweswo, hi ta va ni langutelo lerinene hi hina vini swin’we ni hi vanhu lava hi hanyaka na vona.

Tsundzuka Leswaku Swilo Swi Teka Nkarhi

I ntiyiso leswaku nchumu wun’wana ni wun’wana wu teka nkarhi. Kambe, xana u tshame u swi xiya leswaku swa tika ku tshama u enerisekile loko u rindze nchumu wo karhi kambe wu vonaka wu teka nkarhi wo leha ku tlula lowu u wu rindzeke, kumbe loko xiyimo lexi nga tsakisiki xi vonaka xi teka nkarhi wo leha swinene? Nilokoswiritano, van’wana swi vonaka va enerisekile eswiyin’weni swo tano. Xiya xikombiso xa Yesu.

Loko a nga si ta emisaveni, Yesu a a ri xikombiso lexinene xa ku yingisa etilweni. Hambiswiritano, u “dyondze ku yingisa” laha misaveni. Njhani? U ku dyondze “eka swilo leswi a xanisekeke ha swona.” Eku sunguleni, a a ku vona ku xaniseka kambe yena a a nga si tshama a xaniseka. Loko a ri emisaveni, ngopfu-ngopfu ku sukela loko a khuvuriwile eYordani ku ya fika enkarhini lowu a feke ha wona eGolgota, u vone maxangu swinene. A hi tivi vuxokoxoko hinkwabyo bya ndlela leyi Yesu a “endliwe[ke] la hetisekeke” ha yona emhakeni leyi, kambe hi tiva leswaku nkarhi lowu a wu lehile.—Vaheveru 5:8, 9.

Yesu u humelerile hikuva u anakanye hi “ntsako lowu a wu vekiwe emahlweni ka yena,” ku nga hakelo ya ku tshembeka ka yena. (Vaheveru 12:2) Nilokoswiritano, minkarhi yin’wana u “endle swikombelo ni swikhongelo . . . hi swirilo swa matimba ni mihloti.” (Vaheveru 5:7) Na hina minkarhi yin’wana hi nga khongela hi ndlela leyi fanaka. Xana Yehovha u swi languta njhani sweswo? Ndzimana yoleyo yi kombisa leswaku Yehovha u twe Yesu “hi tindleve timbirhi.” Ni le ka hina Xikwembu xi ta endla leswi fanaka. Ha yini?

Hikuva Yehovha u tiva ku tsana ka hina, naswona wa hi pfuna. Un’wana ni un’wana u ni swipimelo swo karhi swa laha a nga tiyiselaka ku fika kona. Le Benin, eAfrika, ku ni xivuriso lexi nge: “Hambi machela ma nga nwela loko mati ma tele ngopfu.” Yehovha u swi tiva kahle ku tlula hina loko hi ri ekusuhi ni ku wa mapa. Hi rirhandzu u hi nyika “tintswalo ni musa lowu nga faneriwiki [leswaku] hi ta pfuneka enkarhini wa kona.” (Vaheveru 4:16) U endle sweswo eka Yesu ni le ka vanhu va ntsandza-vahlayi. Xiya ndlela leyi Monika a tokoteke sweswo ha yona.

Monika loko a ha kula a a nga vileli hi nchumu, a a ri munhu wa khinkhi naswona a a tshama a tsakile. Hi 1968, loko a ha ri emalembeni ya va-20, u tsemeke nhlana loko a byeriwa leswaku u ni vuvabyi byo hlasela byongo lebyi vuriwaka  multiple sclerosis, lebyi hi ntolovelo byi siyaka munhu a lamarile. Sweswo swi cince vutomi byakwe hi ku helela naswona a ku laveka leswaku a endla mindzulamiso leyikulu evutirhelini bya yena bya nkarhi hinkwawo. Monika u swi xiyile leswaku ku ta va vuvabyi lebyi nga ta teka nkarhi wo leha. Endzhaku ka malembe ya 16, u te: “Ni sweswi vuvabyi bya mina a byi tshunguleki naswona byi nga tshamisa sweswi byi nga tshunguleki kukondza loko mafambiselo lamantshwa ya Xikwembu ma endla swilo hinkwaswo swi va leswintshwa.” U pfumerile leswaku a swi nga olovi: “Hambileswi vanghana va mina va vulaka leswaku ni sweswi ndzi tshama ndzi titsakerile, . . . kambe vanghana va mina lavakulu va swi tiva leswaku minkarhi yin’wana mihloti ya mina yi halaka kunene.”

Hambiswiritano, u ri: “Ndzi dyondze ku lehisa mbilu ni ku tsaka loko ndzi antswanyana eka mavabyi ya mina. Vuxaka bya mina na Yehovha byi tiyisiwile hi ku vona ndlela leyi munhu a hlulekeke ha yona emhakeni yo lwisana ni vuvabyi. I Yehovha ntsena loyi a nga tshungulaka munhu hi ku helela.” Hi ku pfuniwa hi Yehovha, Monika u kote ku tshama a enerisekile naswona sweswi u tsundzuka malembe lama tlulaka 40 lama a ma heteke entirhweni wa nkarhi hinkwawo.

Ku vula ntiyiso, swiyimo swo fana ni swa Monika a swi olovi. Kambe ntiyiso wa mhaka hileswaku u ta eneriseka swinene loko u swi xiya leswaku swilo swin’wana swi nga teka nkarhi wo leha ku tlula lowu wena u languteleke wona. Ku fana na Monika, na wena u nga tiyiseka leswaku Yehovha u ta ku ‘pfuna enkarhini wa kona.’

U Nga Tiringanisi Ni Van’wana—Tivekele Tipakani Leti U Nga Kotaka Ku Ti Fikelela

U hlawulekile. A nga kona munhu la fanaka na wena hi ku kongoma. Xivuriso xin’wana xa ririmi ra le Afrika ra Xigun xi veka mhaka leyi hi ku olova xi ku: “Tintiho a ti ringani hi ku leha.” Ku ta va vuphukuphuku ku ringanisa tintiho ta wena ni ta munhu un’wana. A wu nge swi tsakeli leswaku Yehovha a ku ringanisa ni munhu un’wana naswona a nge pfuki a swi endlile. Hambiswiritano, exikarhi ka vanhu, moya wa ku phikizana wu tele naswona wu nga endla leswaku va nga eneriseki. Xiya ndlela leyi Yesu a kombiseke sweswo ha yona, loko hi hlaya eka Matewu 20:1-16.

Yesu u vulavule hi “n’wini” loyi a laveke vatirhi va le nsin’wini yakwe ya vhinya. U kume vanhu van’wana lava pfumalaka mintirho kutani a va thola “nimixo swinene,” kumbexana hi 6:00 a.m. Va twanane ku hakelana mali ya siku, ku nga denari yin’we eka tiawara ta 12 hi siku. A swi kanakanisi leswaku va tsakile leswi va kumeke ntirho nileswaku va ta kuma muholo lowu tolovelekeke. Endzhakunyana, n’wini u kume mintlawa yin’wana ya vanhu lava nga tirhiki kutani a yi thola—hi 9:00 a.m., hi 12:00 ninhlikanhi, hi 3:00 p.m., ni hi 5:00 p.m. loko ri ya eku peleni. A wu kona eka mintlawa leyi lowu a wu ta tirha siku hinkwaro. N’wini u va tshembise muholo wun’we, ku nga “xin’wana ni xin’wana lexi lulameke,” kutani vatirhi va pfumerile.

Loko ri pela, n’wini u byele munhu wakwe loyi a langutelaka leswaku a holela vatirhi. U n’wi byele leswaku a vitana vatirhi kutani a rhanga hi ku holela lava va thoriweke eku heteleleni. Volavo va tirhe awara yin’we ntsena, kambe lexi hlamarisaka va holeriwe muholo wa siku hinkwaro. Hi mahlo ya mianakanyo hi nga vona ku gungula loku veke kona. Lava tirheke tiawara ta 12 va anakanye leswaku va ta kuma muholo lowu engetelekeke. Hambiswiritano, na vona va kume muholo lowu fanaka.

Xana va angule njhani? “Loko va wu kumile, va sungula ku gungula va sola n’wini wa yindlu va ku, ‘Lavo hetelela va tirhe awara yin’we; kambe na vona u va ringanisa na hina lava hi tiyiseleke ndzhwalo wa siku ni mumu lowukulu!’”

Kambe, n’wini u ve ni vonelo leri hambaneke hi mhaka leyi. U vule leswaku va holeriwe xuma lexi va twananeke ha xona, a nga hungutanga nchumu. Lavan’wana, u kunguhate ku va nyika muholo wa siku hinkwaro, entiyisweni muholo wo tlula lowu va wu languteleke. Hakunene a nga kona loyi a kumeke muholo wutsongo eka lowu va twananeke wona; entiyisweni, vo tala va kume muholo wo tlula lowu a va wu languterile. N’wini u gimete hi ku vutisa, a ku: “Xana a ndzi pfumeleriwi ku endla leswi ndzi swi lavaka hi swilo swa mina?”

Sweswi anakanya hiloko muthori a a lo rhanga hi ku holela ntlawa wo sungula kutani wu namba  wu tifambela. Vanhu volavo a va ta va va enerisekile. Ku vilela ku pfuke loko va vone leswaku van’wana va kume muholo wo ringana ni wa vona kambe va tirhe ntirho wutsongo. Sweswo swi va hlundzukisile, ku fikela laha va gungulelaka muthori wa vona, loyi a va fanele va n’wi khensa hikwalaho ka leswi a va tholeke.

Mhaka leyi yi swi kombisa kahle leswi humelelaka loko hi tipimanisa ni van’wana. Loko u anakanya hi vuxaka bya wena na Yehovha ni ku tlangela ndlela leyi a ku katekisaka ha yona, u ta eneriseka. U nga pimanisi xiyimo xa wena ni xa van’wana. Loko swi vonaka onge Yehovha u endle xiboho xo endlela van’wana leswi engetelekeke, tsaka na vona.

Hambiswiritano, Yehovha u langutele leswaku u endla swo karhi. I yini swilo swa kona? Vagalatiya 6:4 yi ri: “Un’wana ni un’wana a a kombise leswi ntirho wa yena wu nga swona, kutani u ta va ni xivangelo xo khana malunghana na yena hi yexe.” Hi marito man’wana, tivekele tipakani leti u nga ta kota ku ti fikelela. Hlela leswi u nga kotaka ku swi endla, kutani u swi endla. Loko pakani ya wena yi ri yinene kutani u kota ku yi fikelela, u ta va ni “xivangelo xo khana.” U ta eneriseka.

Ku Ta Va Ni Hakelo

Misinya yinharhu ya milawu leyi hi yi kambisiseke yi kombisa leswaku ku tirhisa misinya ya milawu ya Bibele swi nga hi pfuna ku kuma ku eneriseka hakunene hambi ku ri emasikwini lawa yo hetelela, hambiloko hi nga hetisekanga. Loko u ri karhi u hlaya Bibele ya wena siku ni siku, ha yini u nga lavisisi misinya ya milawu leyi vekiweke hi ku kongoma kumbe leyi tirhisiweke eka swiviko kumbe swifaniso swo karhi?

Loko u twa leswaku ku eneriseka ka wena ka vohla, ringeta ku kuma xivangelo xa kona. Kutani languta misinya ya milawu leyi u nga yi tirhisaka leswaku u lulamisa xiyimo. Hi xikombiso, u nga languta matluka 110-11 ya buku leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna.” * Eka yona, buku ya Swivuriso yi tlhuvutsiwile, naswona u ta kuma nxaxamelo lowukulu wa misinya ya milawu ni tindzayo swi xaxametiwile ehansi ka tinhloko-mhaka ta 12. The Watch Tower Publications Index * na Watchtower Library ya CD-ROM * na swona swi ni rungula leri pfunaka swinene. Loko u swi tirhisa minkarhi hinkwayo, u ta tiva lomu u nga kumaka misinya ya milawu leyi pfunaka.

Nkarhi wa ta lowu Yehovha a nga ta nyika lava yingisaka vutomi lebyi nga heriki lebyi va nga ta byi hanya va hetisekile emisaveni leyi nga paradeyisi. Va ta eneriseka evuton’wini bya vona hinkwabyo.

[Tinhlamuselo ta le hansi]

[Marito lama tshahiweke exihlokweni lama nga eka tluka 12]

“Hinkwavo va dyohile, naswona va kayivela ku vangama ka Xikwembu.”—Varhoma 3:23

[Marito lama tshahiweke exihlokweni lama nga eka tluka 13]

Yesu “u dyondze ku yingisa eka swilo leswi a xanisekeke ha swona.”—Vaheveru 5:8, 9

[Marito lama tshahiweke exihlokweni lama nga eka tluka 15]

“U ta va ni xivangelo xo khana malunghana na yena hi yexe, naswona ku nga ri hi ku tiringanisa ni munhu un’wana.”—Vagalatiya 6:4