Ina, U Nga Wu Kuma Ntsako

MINKARHI yin’wana swa tika ku kuma ntsako wa xiviri, lowu tshamaka wu ri kona. Xivangelo-nkulu xa leswi hileswi vanhu vo tala va tshamelaka ku lava ntsako etindhawini leti hoxeke. A va ta va va katekile swonghasi loko a va ri ni munghana la tshembekaka ni loyi a nga ni vuswikoti loyi a nga va pfunaka ku kuma xihlovo xa ntsako wo tano!

Bibele i xihlovo xa nkongomiso wolowo lowu lavekaka. Anakanya hi yin’wana ya tibuku ta yona, ku nga Tipisalema. Buku leyi yi vumbiwa hi tinsimu to kwetsima ta 150 leti kongomisiwaka eka Yehovha Xikwembu, leti hafu ya tona ti tsariweke hi Hosi Davhida wa le Israyele wa khale. Ku tiva leswaku vatsari va buku leyi i vamani a hi swa nkoka ngopfu, kambe leswi nga swa nkoka swinene i ku tiva leswaku lava tsaleke buku leyi a va huhuteriwe hi Munghana lonkulu wa vanhu, ku nga Yehovha. Xisweswo hi nga tiyiseka leswaku buku leyi yi ni nkongomiso wa Yehovha lowu hi vuyerisaka naswona yi hi komba ndlela yo kuma ntsako.

Vatsari va Tipisalema a va tiyiseka leswaku munhu u kuma ntsako loko a ri ni vuxaka lebyikulu ni Xikwembu. Mupisalema u tsarile a ku: “Wa tsaka munhu la chavaka Yehovha.” (Pisalema 112:1) Ku va ni vuxaka lebyikulu ni vanhu van’wana, ku va ni swilo swo tala leswi vonakaka ni ku kota ku fikelela swikongomelo swa munhu hi yexe a swi nge hi tiseli ntsako lowu kumiwaka hi ku va un’wana wa “vanhu lava Xikwembu xa vona ku nga Yehovha.” (Pisalema 144:15) Malandza ya Xikwembu yo tala ya manguva lawa ma swi tiyisekisa leswaku marito lawa i ntiyiso.

Xikombiso xin’wana i Susanne, loyi a hundzekenyana emalembeni ya 40. * U te: “Namuntlha, vanhu vo tala va joyina mintlawa yo karhi leswaku va kota ku fikelela tipakani ta vona leti fanaka kumbe leswaku va hlangana ni vanhu van’wana lava rhandzaka swilo leswi fanaka. Hambiswiritano, a va tali ku teka un’wana ni un’wana la nga eka ntlawa wolowo a ri munghana wa vona. Kambe a swi tano hi vanhu va Yehovha. Ndlela leyi hi rhandzaka Yehovha ha yona  yi hi susumetela leswaku hi rhandzana. Loko hi ri exikarhi ka vanhu va Xikwembu hi titwa hi ri ekaya, ku nga khathariseki leswaku hi nkarhi wolowo hi va hi ri kwihi. Vun’we byolebyo byi endla leswaku vutomi bya hina byi tsakisa swinene. Xana va kona vanhu lava nga vulaka leswaku va ni vanghana lava nga riki va rixaka ra vona naswona lava nga ni ndhavuko lowu nga faniki ni wa vona, lava humaka ematikweni yo hambana-hambana? Ndzi nga vula hi mbilu ya mina hinkwayo leswaku ku va un’wana wa vanhu va Yehovha hi swona swi tisaka ntsako.”

Maree la velekiweke eScotland, na yena u dyondze leswaku loko munhu a lava ku va ni ntsako u fanele a va ni vuxaka lebyikulu na Yehovha. U ri: “Loko ndzi nga si dyondza ntiyiso wa le Bibeleni, a ndzi rhandza ku hlalela tifilimi leti chavisaka. Kambe nivusiku a ndzi nga etleli loko ndzi nga khomanga xihambano, hikuva a ndzi tshemba leswaku xi nga hlongola swipuku ni swin’wanakaji, leswi tifilimi to tala leti a ndzi ti hlalela a ti vulavula ha swona. Hambiswiritano, loko se ndzi dyondze ntiyiso, naswona ndzi tshike ku hlalela tifilimi to tano, vuxaka bya mina na Yehovha byi endle leswaku ndzi swi kota ku ya eku etleleni handle ko chava, ndzi tsakela ku tirhela Xikwembu lexi nga ni matimba lamakulu ku tlula madimona kumbe swin’wanakaji leswi swi ngo anakanyiwa ntsena.”

Ku Tshemba Yehovha Swi Yisa eNtsakweni

A hi na xivangelo xo kanakana matimba lamakulu ya Muvumbi wa hina swin’we ni vutlhari bya yena lebyi nga pimekiki. Leswi Davhida a a swi tiva leswaku a nga n’wi tshemba hi ku helela Yehovha nileswaku a nga kuma vutumbelo eka Yena, u tsarile a ku: “Wa tsaka munhu la tiyeke emirini la vekeke Yehovha leswaku a va ntshembo wakwe.”—Pisalema 40:4.

Maria u te: “Ntokoto lowu ndzi wu kumeke eSpain ni le tindhawini tin’wana hi lowu nge, loko hi endla swilo hi ndlela ya Yehovha ha vuyeriwa swinene, hambileswi hi nga vaka ni mboyamelo wo lava ku endla leswi hina hi swi rhandzaka. Sweswo swi tisa ntsako hikuva ndlela ya Yehovha i yinene minkarhi hinkwayo.”

Andreas, nkulu la nga Mukreste loyi a tirheke ematikweni yo hlayanyana ya le Yuropa, na yena u tivonele hi yexe leswaku hi nga n’wi tshemba hi ku helela Yehovha. U te: “Buti wa mina loyi a nga riki Mbhoni, u ndzi kucetele ngopfu loko ndza ha ri mufana, a ndzi khutaza leswaku ndzi lava ntirho lowu hakelaka kahle. U hele matimba ngopfu loko ndzi nghenela ntirho wa nkarhi hinkwawo, naswona ndzi nga titshegi hi mintirho leyi ku vuriwaka leswaku ya ku sirhelela hi ku ku nyika mali ya mudende. Loko ndza ha ri entirhweni wa nkarhi hinkwawo a ndzi kalanga ndzi pfumala nchumu, naswona ndzi kume mikateko leyi van’wana va ngo to yi navela kunene.”

Hi 1993, Felix u rhambiwile leswaku a ya pfuneta eku ndlandlamuxiweni ka hofisi ya rhavi ya  Timbhoni ta Yehovha eSelters le Jarimani. Loko ntirho wu herile, u rhambiwe leswaku a namba a va xirho xa ndyangu wa Bethele. U angule njhani? U ri: “Ndzi amukele xirhambo lexi ndzi ri karhi ndzi kanakana. Kambe sweswi se ndzi ni malembe ya kwalomu ka khume ndzi ri laha naswona ndza khorwiseka leswaku Yehovha u swi hlamurile swikhongelo swa mina. Wa swi tiva leswi nga swinene eka mina. Leswi ndzi vekaka ntshembo wa mina hi ku helela eka yena naswona ndzi n’wi pfumelelaka leswaku a ndzi kongomisa, ndzi n’wi nyika nkarhi wo ndzi komba leswi a lavaka leswaku ndzi swi endla.”

Susanne, loyi a boxiweke eku sunguleni, a a lava ku va mutirheli wa nkarhi hinkwawo, kumbe phayona, kambe a a nga wu kumi ntirho wa nkarhinyana. Endzhaku ko rindza lembe hinkwaro leswaku a kuma ntirho, u teke goza leri kombisaka leswaku u tshemba Yehovha. U te: “Ndzi fambise xikombelo xa mina xa ku va phayona ra nkarhi hinkwawo. A ndzi veke mali leyi ringaneke yo hakelela swilo leswi a ndzi ta swi lava eka n’hweti yoleyo. Hakunene n’hweti yoleyo yi ve leyi tsakisaka swinene! Ntirho wa mina wo chumayela a wu ndzi tisela ntsako lowukulu, kambe hinkwako lomu a ndzi ya kona ndzi ya lava ntirho a ndzi byeriwa leswaku ntirho a wu kona. Hambiswiritano, hilaha Yehovha a tshembiseke hakona, a nga ndzi tshikanga. Hi siku ro hetelela ra n’hweti, ndzi kume ntirho. Se a ndzi swi tiva leswaku hakunene ndzi nga n’wi tshemba Yehovha! Ntokoto lowu a wo sungula ku ndzi endlekela loko ndzi ri entirhweni wa nkarhi hinkwawo, wu endle leswaku ndzi va ni vutomi lebyi vuyerisaka ni lebyi tsakisaka.”

Ku Amukela Ndzayo Leyi Humaka Eka Xikwembu Swi Engetela Ntsako

Hosi Davhida u endle swihoxo swin’wana leswikulu. Minkarhi yin’wana a a lava ndzayo ya vutlhari. Loko hi tshinyiwa ni ku nyikiwa switsundzuxo, xana hi swi amukela hi tsakile ku fana na Davhida?

Aida loyi a humaka eFurwa, u tshame a swi lemuka leswaku u endle xihoxo lexikulu. U te: “Mhaka leyi a yi ndzi karhata ngopfu a ku ri ku lulamisa vuxaka bya mina na Yehovha. Swilo leswin’wana a swi nga ri swa nkoka.” U ye a ya lava mpfuno eka vakulu lava nga Vakreste. Endzhaku ko heta malembe lama tlulaka 14 entirhweni wa nkarhi hinkwawo, u ri: “Swi ndzi tsakisa ngopfu ku tiva leswaku Yehovha u ndzi rivalele xihoxo xa mina!”

Ku amukela ndzayo leyi humaka eka Xikwembu hi mbilu hinkwayo swi nga hi sivela leswaku hi nga endli swihoxo. Judith u te: “Loko ndzi ri ni malembe ya 20, ndzi sungule ku kokiwa mbilu hi mutirhi-kulorhi wa le Jarimani, loyi a ringeteke ku endla hinkwaswo leswi nga ematimbeni ya yena leswaku a ndzi koka rinoko. A a xiximiwa, a a ri ni ntirho lowu humelelaka swinene naswona se a a catile! Ndzi xiye leswaku a ndzi fanele ndzi hlawula exikarhi ka ku yingisa milawu ya Yehovha kumbe ndzi N’wi fularhela hi ku helela. Ndzi phofulele vatswari va mina mhaka leyi. Tatana u ndzi tsundzuxe handle ko jika-jika leswi Yehovha a a lava leswaku ndzi swi endla. U vulavule na mina handle ko tilumaluma—ku nga leswi a ndzi swi lava! Hambiswiritano, ndzi ringete ku tiyimelela. Manana u hete mavhiki a ri karhi a vulavurisana na mina nimadyambu, a ndzi komba ndlela leyi milawu ya Xikwembu yi nga ya nkoka ha yona ni ndlela leyi yi hi ponisaka ha yona. Ndza khensa swinene hileswi hakatsongo-tsongo mbilu ya mina yi tlheleleke eka Yehovha. Ku tshinyiwa ni ku dyondzisiwa hi yena swi ndzi tisele ntsako lowukulu, lowu katsaka ku heta malembe yo tala lama vuyerisaka evutirhelini bya nkarhi hinkwawo ni ku kuma munghana wa vukati wa Mukreste la ndzi rhandzaka naswona a rhandzaka Yehovha hi mbilu ya yena hinkwayo.”

Swi le rivaleni leswaku mintokoto leyi yi kandziyisa ntiyiso ni nkoka wa marito ya Davhida lama nge: “Wa tsaka loyi a rivaleriweke swiendlo swakwe swo pfukela, loyi xidyoho xakwe xi funengetiweke. Wa tsaka munhu loyi Yehovha a nga vekiki xidyoho evitweni rakwe.”—Pisalema 32:1, 2.

Ku Kuma Ntsako Hi Ku Ehleketelela Van’wana

Davhida u tsarile a ku: “Wa tsaka un’wana ni un’wana la ehleketelaka xisiwana.” U ye emahlweni a ku: “Hi siku ra khombo Yehovha u ta n’wi ponisa. Yehovha u ta n’wi rindza, a n’wi londzovota a hanya. U ta vuriwa la tsakeke.” (Pisalema 41:1, 2) Ku ehleketelela loku nga ni rirhandzu loku Davhida a ku kombeke Mefiboxete, n’wana la lamaleke wa Yonathani, munghana la rhandzekaka wa Davhida, i xikombiso xa ku va ni langutelo lerinene hi swisiwana.—2 Samuwele 9:1-13.

Marlies, loyi se a nga ni malembe ya 47 a ri murhumiwa, u ni lunghelo ro chumayela vahlapfa lava bohekeke ku baleka ematikweni lama nga ni nkitsikitsi  ya le Afrika, Asia ni le Yuropa Vuxa. U te: “Va ni swiphiqo swo hambana-hambana naswona va vona onge va tekiwa va ri switaswifamba, entiyisweni va languteriwa ehansi. Ku pfuna vanhu vo tano swi tisa ntsako minkarhi hinkwayo.”

Marina, la hundzekenyana emalembeni ya 40, u tsarile: “Leswi ndzi nga tekiwangiki, swa ndzi chavelela swinene ku tiva leswaku van’wana va tiyimisele ku ndzi pfuna tanihi vanghana va mina. Leswi swi ndzi susumetela ku khutaza vanhu hi ku va bela riqingho kumbe hi ku va tsalela mapapila. Vo tala va swi tlangerile swinene sweswo. Ku pfuna van’wana swi ndzi tisela ntsako.”

Dimitar, loyi a nga exikarhi ka malembe ya va-20, u te: “Manana u ndzi kurise a ri yexe. Loko ndza ha ri mufana, a ndzi tsaka ngopfu loko mulanguteri wa Dyondzo ya Buku ya Vandlha a ndzi teka hi famba swin’we vhiki na vhiki leswaku a ndzi letela entirhweni wa nsimu. Na sweswi ndza ha ku tlangela ku phikelela ka yena. Ndza swi tiva leswaku a swi nga n’wi oloveli minkarhi hinkwayo ku ndzi khutaza.” Leswi Dimitar a wu tlangelaka mpfuno lowu a tshameke a wu kuma, sweswi u pfuna van’wana, u ri: “Ndzi ringeta ku famba ni muntshwa ni munhu lonkulu ensin’wini kan’we hi n’hweti.”

Buku ya Tipisalema yi tlhela yi boxa swilo swin’wana leswi tisaka ntsako. Xin’wana xa swona i ndlela leyi swi nga swa nkoka ha yona ku titshega hi matimba ya Yehovha ematshan’weni yo tshemba matimba ya hina vini: “Va tsaka vanhu lava ntamu wa vona wu nga eka [Yehovha].”—Pisalema 84:5.

Corinna u yi tiva kahle mhaka leyi. U rhurhele etikweni leri a ku ri ni xilaveko lexikulu xo chumayela. U ri: “Ndzi langutane ni ririmi lerintshwa, ndhavuko lowuntshwa ni ndlela leyintshwa yo ehleketa. Ndzi titwe onge ndzi le ka pulanete yin’wana. Ndzi karhateke swinene loko ndzi ehleketa hi ku chumayela endhawini leyi ndzi nga yi tolovelangiki. Ndzi kombele Yehovha leswaku a ndzi pfuna, kutani hikwalaho ka matimba ya yena ndzi swi kotile ku chumayela siku hinkwaro ensin’wini leyi nga yoxe. Hi ku famba ka nkarhi, ku chumayela swi tikombe swi ri nchumu lowu tolovelekeke. Ndzi sungule tidyondzo to tala ta Bibele naswona ndza ha vuyeriwa eka ntokoto lowu. Ndzi dyondze leswaku matimba ya Yehovha ma nga hi pfuna ku hlula swihinga leswi nga tikombaka swi ri swikulu swinene.”

Ina, swi tele swilo leswi endlaka leswaku hi tsaka, swo tanihi ku hlakulela ku va ni vuxaka ni Xikwembu swin’we ni vanhu va xona, ku tshemba Yehovha hi ku helela, ku amukela ndzayo ya yena ni ku ehleketelela van’wana. Loko hi famba etindleleni ta Yehovha ni ku yingisa milawu ya yena, hi nga tsakela ku amukeriwa hi yena.—Pisalema 89:15; 106:3; 112:1; 128:1, 2.

[Nhlamuselo ya le hansi]

[Xifaniso lexi nga eka tluka 12]

Maria

[Xifaniso lexi nga eka tluka 13]

Maree

[Xifaniso lexi nga eka tluka 13]

Susanne na Andreas

[Xifaniso lexi nga eka tluka 15]

Corinna

[Xifaniso lexi nga eka tluka 15]

Dimitar