Thelevhixini—Xana I Xihungasi Lexinene Xa Vana?

MINKARHI yin’wana ku tshika vana va wena va tihungasa hi ku hlalela thelevhixini loko wena u ri karhi u endla mintirho ya siku ni siku swi nga languteka swi ri swinene ngopfu. Kambe, xana leswi swi nga va khumba njhani vana va wena?

The New York Times ya vika: “Ni swihlangi swi nga kuceteriwa hi ndlela leyi vanhu lava humaka eka thelevhixini va titwaka ha yona.” Eka nkambisiso wun’wana wa sweswinyana, swihlangi leswi nga ni lembe rin’we hi vukhale swi kombiwe swifaniso swo koma eka thelevhixini laha mutlangi un’wana wa xisati a titweke hi tindlela to hambana-hambana loko a nyikiwa thoyi. Times yi ri: “Loko mutlangi loyi a chava thoyi yo karhi, swihlangi a swi tshika ku tlanga ha yona naswona hakanyingi a swi tikomba swi karhateka, swi visingana kumbe swi rila. Kambe loko mutlangi a tsakisiwa hi thoyi yo karhi, swihlangi a swi tsakela swinene ku tlanga hi thoyi yoleyo.”

Swi le rivaleni leswaku thelevhixini yi nga khumba ndlela leyi swihlangi swi titwaka ha yona. Ku vuriwa yini hi nkucetelo wa yona lowu nga tshamaka nkarhi wo leha eka vana? Dok. Naoki Kataoka, profesa wa vutshila bya vutshunguri bya vana wa le Kholichi ya swa Vutshunguri ya le Kawasaki eKurashiki, le Japani, u vone vana vo tala lava miyeleke ngopfu naswona lava tinghohe ta vona ti nga kombisiki ndlela leyi va titwaka ha yona. Vana lava hinkwavo va hlalele TV kumbe tivhidiyo nkarhi wo leha ngopfu. Mufana un’wana la nga ni malembe mambirhi hi vukhale a a nga swi koti ku bula ni vanhu naswona a a nga ri tivi kahle ririmi. A a tshamela ku hlalela tivhidiyo ku sukela nimixo ku fikela nimadyambu siku rin’wana ni rin’wana ku sukela loko a ri ni lembe rin’we hi vukhale. Hakatsongo-tsongo u sungule ku ri tiva kahle ririmi endzhaku ka loko mana wakwe a landzele xitsundzuxo xa dokodela xa leswaku a tshikisa mufana wakwe ku hlalela tivhidiyo naswona a sungula ku tlanga swin’we na yena. Ina, vatswari va fanele ku tlanga swin’we ni vana va vona.

Yehovha Xikwembu, Musunguri wa ndyangu, u kandziyise ndlela leyi swi nga swa nkoka ha yona ku bula ni vana. Khale ka khaleni u byele vanhu vakwe a ku: “U fanele u dyondzisa n’wana wa wena [marito ya Xikwembu] hi ku phindha-phindha naswona u vulavula ha wona loko u tshama endlwini ya wena, loko u famba egondzweni, loko u etlela niloko u pfuka.” (Deteronoma 6:7) Vatswari va nga swi kota kahle ku dyondzisa hi ku tirhisa marito ni xikombiso “hi ndlela” leyi nga ya vona, ku nga ri hi ku tirhisa thelevhixini.—Swivuriso 22:6.