“Ndlela Leyinene Ngopfu Leyi Ndzi Heteke Ha Yona Tidyondzo Ta Mina”

MUDYONDZISI un’wana wa le xikolweni xa le henhla wa le Spain u tsale a ku: “Ku tlula dzana ra malembe, Timbhoni ta Yehovha ti kombise vun’we bya ntiyiso, vutshembeki ni ripfumelo leri nga tsekatsekiki.” I yini lexi susumeteleke mudyondzisi yoloye—loyi a alaka vukona bya Xikwembu—leswaku a vula marito lawa?

Sweswo hinkwaswo swi sungule loko Noemí, mudyondzi un’wana wa le xikolweni xa le henhla la nga Mbhoni ya Yehovha, a averiwe ku tsala xitsalwana lexi a xi ta va xiphemu xa xikambelo xo hetelela xa tidyondzo takwe. U hlawule nhloko-mhaka leyi nge “Mfungho Wa Swilapana Swa Xivunguvungu Swa Tinhla Tinharhu eHansi Ka Mfumo Wa Manazi.”

Hikwalaho ka yini a hlawule nhloko-mhaka leyi? Noemí wa hlamusela: “Tanihi leswi xitsalwana xa mina a xi ta kambisisiwa hi mudyondzisi loyi, ndzi vone swi ndzi pfulele ndlela leyinene yo n’wi chumayela. Xiviko xa ndlela leyi Timbhoni ta Yehovha ti tshameke ti tshembekile ha yona eJarimani ra Manazi xi ndzi khumbe mbilu. A ndzi ehleketa leswaku xi ta khumba ni timbilu ta van’wana.”

Xitsalwana xa Noemí xi khumbe vanhu vo tala hi ndlela leyi a a nga yi anakanyi. Hi October 5, 2002, xitsalwana xa yena xi kume sagwadi eka mphikizano wa tiko wa ndzavisiso wa timhaka ta sayense ni mahanyelo ya vanhu. Masagwadi ya mphikizano wolowo ma nyikiwa swichudeni hi vaavanyisi va 20 lava nga vadyondzisi vo huma etiyunivhesiti leti dumeke ta le Spain.

Noemí u nyikiwe sagwadi rakwe hi Pilar del Castillo, ku nga holobye wa dyondzo wa le Spain. Noemí u tirhise nkarhi wolowo a nyika holobye kopi ya khasete ya vhidiyo leyi nge Jehovah’s Witnesses Stand Firm Against Nazi Assault. Holobye u yi amukele hi mandla mambirhi nyiko leyi.

Laha Noemí a tshamaka kona, edorobeni ra Manresa, phepha-hungu ra kwalaho ri hlamusele ntirho wakwe lowunene exikolweni ri tlhela ri vulavula hi xitsalwana xakwe hi vuxokoxoko. Enkarhini wolowo, nhloko ya xikolo lexi a a nghena eka xona yi kombele kopi ya xitsalwana xakwe leswaku xi ta nghenisiwa eka nongonoko wo tlangela lembe ra vu-75 ra ku pfuriwa ka xikolo lexi xa le henhla.

Noemí u ri: “Leyi i ndlela leyinene ngopfu leyi ndzi heteke ha yona tidyondzo ta mina exikolweni xa le henhla. Ndzi tsake ngopfu loko ndzi hlaya marito lawa mudyondzisi wa mina, Nkul. Jorge Tomás Calot, a ma tsaleke eka xingheniso xakwe xa malunghana ni xitsalwana xa mina:

“‘Ndzi ala vukona bya Xikwembu, kambe ndza khorwiseka hi ku helela leswaku ku ni Munhu la Tlakukeke, loyi a susumetelaka vagandzeri va yena leswaku va “rhandza vanhu-kulobye” swi suka embilwini.’”