Riendzo Leri Byaleke Vonelo Lerintshwa

“A NDZI swi langutele hi mahlo-ngati ku byela ndyangu wa mina hi ‘tintsumi’ timbirhi leti Xikwembu xi ndzi rhumeleke tona.” Ku tsale wanuna loyi a endzeriweke hi vanhwanyana vambirhi lava nga Timbhoni ta Yehovha. Mavhiki ma nga ri mangani emahlweni ka riendzo ra vona, wanuna loyi u loveriwe hi nsati wakwe la nga ni malembe ya 45 hi vukhale. A a pfilunganyekile. Vana vakwe a va ringete ku n’wi chavelela, kambe a va tshama ekule ni le kaya. Ku hava ni un’we wa vanghana kumbe vaakelani loyi a n’wi endzeleke.

“A ndzi xi khongeli Xikwembu,” ku vula wanuna loyi eka vanhwanyana lava n’wi endzeleke. Kambe, va n’wi twele vusiwana, hiloko va n’wi siyela xiphephana lexi sekeriweke eBibeleni lexi nge Hi Wihi Ntshembo Wa Varhandziwa Lava Feke? U xi hlaye madyambu wolawo kutani a kuma nchavelelo.

Endzhakunyana, vanhwanyana lava va Vakreste va tlhelerile. Va tsundzuke ndlela leyi a a karhateke ha yona loko va n’wi endzerile enkarhini lowu hundzeke, kutani a va ta eku n’wi pfuxeleni. Endzhaku wanuna loyi u tsale a ku: “A ndzi hlamale ngopfu ku vona vanhu vambirhi lava ndzi nga va tiviki va ndzi kombisa nkhathalelo ni ku lava ku tiva hi vuhlayiseki bya mina.” U khutaziwe hi marito lawa va n’wi hlayeleke wona eBibeleni. Vanhwanyana lava va n’wi tshembise ku tlhela va vuya. Wanuna loyi a a tsake ngopfu lerova a susumeteleka ku tsala marito lama nga laha henhla eka papila leri a ri rhumeleke eHolweni ya Mfumo ya Timbhoni ta Yehovha.

Emahlweni ko rhurhela endhawini ya le ekusuhi swinene ni laha n’wana wakwe a tshamaka kona, wanuna loyi u ye enhlanganweni wa Vukreste wa Timbhoni ta Yehovha a tlhela a rhambiwa ku ya dya ni ndyangu wa un’wana wa vanhwanyana lava. U tsarile: “Ndza rhurha eka ndhawu leyi, kambe a ndzi nge va rivali vanhwanyana lava swin’we ni kereke ya n’wina, naswona ndzi ta mi veka eswikhongelweni. Ina, se ndza khongela hakunene. Ndzi ni vonelo lerintshwa hi ku helela. Vanhwanyana volavo hi vona va ndzi pfuneke leswaku ndzi teka goza rero, kutani a ndzi nge va rivali.”