“Ku Sukela Namuntlha, Ndza Tshemba Leswaku Xikwembu Xi Kona”

WANSATI un’wana wa le Ukraine la vuriwaka Alexandra, la tshamaka ePrague, le Riphabliki ra Czechoslovakia, a a ri endleleni yo ya ekaya a huma entirhweni. Exitichini xa mabazi, u vone xinkwamani ehansi, xi ri karhi xi rahiwa hi vanhu lava hundzaka. Loko a teka xinkwamani lexi kutani a langutisa endzeni, u vone nchumu wo hlamarisa. A ku ri ni xijumba xa ti-5 000 koruna! A ku ri hava ni munhu ni un’we loyi a a tikomba a lahlekeriwe hi xinkwamani lexi. Tanihi leswi Alexandra a a ri muhlapfa la tshamaka eRiphabliki ra Czechoslovakia, a a hanya hi rikoko ra xilondza. Xana a a ta endla yini?

Loko Alexandra a fika ekaya, u kombe Victoria, n’wana wa yena wa xisati xinkwamani lexi. Va lavisise vito ni adirese ya n’wini wa xinkwamani lexi endzeni ka xona kambe a va kumanga nchumu. Hambiswiritano, xinkwamani lexi a xi ri na xiphephana lexi nga ni tinomboro. Eka xiphephana lexi a ku tsariwe tinomboro ta akhawunti, kasi eka tlhelo lerin’wanyana a ku ri ni tinomboro tin’wana. Xinkwamani lexi a xi ri ni xiphephana lexi tsariweke leswaku u fambisa ku yini loko u ya ebankini ya kwalaho ni xiphephana xin’wana lexi tsariweke leswaku “330 000 wa ti-koruna” (kwalomu ka R84 000). Leyi hi yona mali leyi a yi ri endzeni ka xinkwamani lexi.

Matshalatshala ya Alexandra yo bela riqingho ebankini a tirhisa nomboro leyi a a ehleketa leswaku i nomboro ya riqingho, a ma pfunanga nchumu. Kutani yena ni n’wana wakwe wa xisati va ye ebankini leswaku va ya hlamusela leswi nga humelela. Va vutise hi nomboro ya akhawunti leyi va nga yi kuma endzeni ka xinkwamani. Hambiswiritano, banki a yi nga ri na rona rungula ra akhawunti yoleyo. Siku leri landzelaka, Alexandra u tlhelele ebankini ni nomboro leyin’wana leyi a yi ri exinkwamanini. Hakunene, ebankini a a ri kona munhu la tirhisaka akhawunti leyi, ku nga wansati un’wana. Alexandra na Victoria va vulavurisane ni wansati loyi, kutani a vula leswaku u lahlekeriwe hi xinkwamani lexi nga ni mali. Eku heteleleni loko va hlanganile, wansati loyi u va nkhensile hi musa kutani a va vutisa a ku, “Mi lava ndzi mi hakela hi yini leswi mi nga ndzi vuyisela mali ya mina?”

Victoria u te: “A hi lavi ku hakeriwa hi nchumu. Loko a hi yi lava mali leyi, a hi ta va hi yi tekile.” U ye emahlweni a n’wi hlamusela hi ririmi leri a a nga ri tivi kahle ra le Czechoslovakia a ku: “Hi ku tlherisela mali leyi hikuva hi Timbhoni ta Yehovha. Ripfalo ra hina leri leteriweke hi Bibele a ri hi pfumeleli ku teka leswi nga riki swa hina.” (Vaheveru 13:18) Wansati loyi u vule a tsakile a ku: “Ku sukela namuntlha, ndza tshemba leswaku Xikwembu xi kona.”