Hembe Ya Voya Ni Vumoya Bya Munhu
Hembe Ya Voya Ni Vumoya Bya Munhu
HOSI LOUIS WA VUKAYE wa le Furwa a a ri na yona. Loko a ri karhi a dyondzela nawu evuntshweni bya yena, Nkulukumba Thomas More a a heta tin’hweti to hlayanyana a tshama a xalamukile ku ringana tiawara ta 19 kumbe 20 hi siku, a pfuniwa hi yona. Phela, ku vuriwa leswaku More u hanye malembe yo tala a ambala yona. Naswona loko Thomas Becket, Bixopo-nkulu wa Canterbury a dlayiwa eKerekeni ya Canterbury, lexi hlamariseke hileswaku u kumeke a rhangise yona endzeni. Xana i yini nchumu lowu vanhu lava va ndhuma a va ri na wona? A va kavanyeta ku navela ka miri hi ku ambala hembe ya voya.
Hembe leyi ya voya a yi ri nguvu yo khwaxa leyi endliweke hi voya bya mbuti naswona a yi rhangisiwa endzeni leswaku yi nyakala miri, yi endla leswaku munhu a nga tshamiseki. Nakambe a yi hundzuka puwa ra tinhwala. Ku vuriwa leswaku Thomas Becket a a ambala hembe ni buruku ra voya ku fikela loko “swi tala hi tinhwala.” Endzhaku ka lembe-xidzana ra vu-16, van’wana va tshike ku ambala hembe ya voya bya mbuti va ambala leyi endliweke hi swinsimbana leswiya swo lala swinene leswi a swi tlhava-tlhava miri. Lava ambalaka hembe leyi endliweke hi ndlela yoleyo a va chachamela va tiphina.
Hi ku ya hi dikixinari yin’wana, xikongomelo xa hembe ya voya ni swiambalo swin’wana swo khwaxa, a ku ri “ku lawula miri lowu voyameleke eku endleni ka xidyoho, leswaku vanhu va anakanya ngopfu hi swilo swa moya.” Hembe leyi a yi nga ambariwi hi vanhu lava titsonaka ntsako ntsena; a yi ambariwa ni hi vanhu ntsena, ku katsa ni lava va nga eswikhundlheni swa le henhla. Ni namuntlha, swirho swa mavandla man’wana ya vukhongeri swa ha ambala hembe yo tano.
Xana ku ambala hembe ya voya kumbe ku tixanisa emirini hi ndlela yo karhi swi nga ku endla munhu wa moya? Doo, ku va munhu wa moya a swi titsheganga hi swilo swo tano. Kahle-kahle, muapostola Pawulo u sole mukhuva wa “ku khoma miri hi tihanyi.” (Vakolosa 2:23) * Ku ri na sweswo, ku va munhu wa moya hakunene swi vangiwa hi ku lavisisa vutivi bya Xikwembu lebyi kumiwaka hi ku hisekela ku dyondza Rito ra xona ni ku tirhisa vutivi byebyo evuton’wini bya wena.
[Nhlamuselo ya le hansi]
^ par. 5 Leswaku u kuma nhlamuselo leyi engetelekeke ya mhaka leyi, vona xihloko lexi nge “Langutelo Ra Bibele: Xana Ku Titsona I Xilotlelo Xo Kuma Vutlhari?” eka Xalamuka! ya October 8, 1997.
[Laha Swifaniso Swi Humaka Kona eka tluka 32]
King Louis IX, top: From the book Great Men and Famous Women; Thomas Becket, center: From the book Ridpath’s History of the World (Vol. IV); Thomas More, bottom: From the book Heroes of the Reformation, 1904